28°C , Sunny | Kigali-Rwanda

Umukino wa Golf ugiye kubyazwa umusaruro w’amadovize

Yanditswe na Rutayisire Emile

Ku ya 12-09-2019 saa 12:57:43
Ikibuga cya Golf kigiye kongerwa giherereye i Nyarutarama mu Mujyi wa Kigali (Foto Rutayisire E)

Kuba umukino wa Golf ugiye kubyazwa umusaruro w’amadovize byatangajwe na Kapiteni wa Kigali Golf Club Dr. Kashaka Karegeya Davis mu kiganiro n’abanyamakuru ashimira uruganda rwa CIMERWA rubigiramo uruhare.

Mu kiganiro cyabaye ku wa Gatatu tariki ya 11 Nzeri 2019 kibera kuri Kigali Golf Club, Dr. Kashaka Karegeya yatangarije abanyamakuru ko kuri uyu wa gatanu no ku wa Gatandatu tariki ya 13 na 14 Nzeri 2019 hateguwe irushanwa rikomeye ry’umukino wa Golf “CIMEGOLF2019” bakaba bizeye umusaruro rizatanga kubera ko Leta y’u Rwanda yiyemeje guteza imbere uyu mukino uzagira uruhare mu kuzana abakinnyi ba Golf mu Rwanda ndese n’abandi bazajya baza baje gutembera. Iyi gahunda ikaba ishyigikirwa n’uruganda rukora Sima rwa Cimerwa rubinyujije mu nkunga rutanga.

Umuyobozi wa CIMERWA PPC,Bhekizitha W. Mthembu i buryi, Kapiteni wa Kigali Golf Club Dr. Kashaka Karegeya Davis hagati na Josue Dushimimana umuyobozi w’agateganyo wa Rwanda Ultimate Golf Course

Agira ati “CIMEGOLF 2019 ni irushanwa rya gatatu kuva mu 2017 rizaba rikomeye kandi rinini rizitabirwa n’abantu benshi. Irushanwa ryatangiye rikoresha miriyoni 30 n’abakinnyi 90, umwaka ukurikiye miriyoni zariyongereye ndetse n’abakinnyi bariyongera. Kuri iyi nshuro ya gatatu amafaranga Cimerwa yatanze ni miriyoni 60 n’abakinnyi bamaze kwiyandikisha 138, harimo abanyamuryango basanzwe n’abandi 15 baturutse mu bihugu bitandukanye cyane cyane aho CIMERWA PPC (Abashoramari bakorana na CIMERWA ) bakorera mu bihugu bya DRC Kongo, Botswana, Zimbabwe na Afurika y’Epfo. CIMERWA yateye inkunga ingana na miriyoni 60 z’amanyarwanda”. Akomeza avuga ko irushanwa rizaba iminsi 2 kugira ngo ribashe kwakira abakinnyi bose.

Bhekizitha W. Mthembu, Umuyobozi Nshingwabikorwa wa CIMERWA PPC avuga ko gutera inkunga Golf ari ingenzi kuko iyo urebye mu bafatanyabikorwa b’abayobozi bakuru benshi usanga bakina Golf bikaba byiza ko mu mitegurire y’irushanwa baba babyumva neza kandi bakaba bamwe mu bafata ibyemezo mu nzego z’ubuyobozi, bakaba ari bamwe mu batuma irushanwa ryitabirwa cyane kandi rikaba buri mwaka.

Agira ati “CIMERWA PPC ikora ibintu birenze gukora Sima kuko iyo duteye inkunga irushanwa, tuba duteye inkunga iterambere ry’umukino, umukino ukinwa akenshi n’abantu bafite bashobora kuza mu Rwanda, bakarumenya, bakaba mu mahoteri yaho ndetse n’abakozi babitaho bakabona imirimo.”

Akomeza avuga ko badatera inkunga umukino wa Golf gusa kuko batera inkunga na Tenis n’indi, gutera inkunga mu burezi harimo kubaka ibigo by’amashuri abanza n’ayisumbuye, mu buvuzi no mu myuga igamije kuzamura abaturage.

Mu Rwego rwo gukurura abantu benshi bazajya baza mu Rwanda bamwe baje gusura ikibuga, abandi baje gukina, Ikibuga cya Golf kirimo kwagurwa kugira ngo kige ku rwego mpuzamahanga. Biteganyijwe ko kizikuba gatatu kikazajya cyakira amarushanwa ku rwego rw’Isi, Abanyarwanda bakazajya bibonera abakinnyi bakomeye ku Isi baje mu marushanwa.

Dr. Kashaka Karegeya ati “Ikibuga nikirangira tuzunguka byinshi birimo amadovize kuko abazajya baza bazaba bakeneye amahoteri, Hoteri zikeneye abakozi kugira ngo bashobore kwakira abantu kuko hazaba harimo n’ababa bashaka gusura ibindi bintu nyaburanga biri mu Gihugu. Ibi bizateza imbere ubukerarugendo kuko bazajya baza ntacyo bishisha baza mu gihugu kirimo amahoro n’umutekano bazi ko bazasubira iwabo amahoro”.

Dushimimana Josue, Umuyobozi Mukuru w’agateganyo w’Ikigo Rwanda Ultimate Golf Course Ltd kirimo gukurikirana imirimo yo kwagura ikibuga kikaba ari nacyo kizaba kigenzura kandi kinacunga ibijyanye na Golf, yatangarije Imvaho Nshya ko kiba kigizwe n’imyobo 18 mu gihe ikibuga cyari gisanzwe cyari gifite imyobo 9. Kigomba kuba ku rwego mpuzamahanga kikagira n’aho abantu bazajya bitoreza.

Agira ati “Iki kigo cyashyizweho na RSSB nk’umushoramari washoye imari igomba kunguka, imicungire y’imirimo ni uko ikibuga kizabyazwa umusaruro byashyizwe mu maboko ya “Rwanda Ultimate Golf Course” naho Kigali Golf Club ikaba ikorana na Rwanda Ultimate Golf Course”.

Ikibuga cya Golf kigiye kongerwa giherereye i Nyarutarama mu Mujyi wa Kigali (Foto Rutayisire E)

TANGA IGITEKEREZO

Leave a Reply

Your email address will not be published. Required fields are marked *