19°C , Mostly cloudy | Kigali-Rwanda
Eng. Rwunguko Jean D’amour, Umuyobozi Mukuru w’agateganyo ushinzwe ibikorwa remezo, imiturire n’ubwikorezi mu Mujyi wa Kigali

Umujyi wa Kigali wihaye intego yo kubaka ruhurura nibura 3 buri mwaka

Yanditswe na MUKAGAHIZI ROSE

Ku ya 14-09-2018 saa 08:25:41

Eng. Rwunguko Jean D’amour, Umuyobozi Mukuru w’agateganyo ushinzwe ibikorwa remezo, imiturire n’ubwikorezi  mu Mujyi wa Kigali avuga ko hagamijwe  ko amazi anyura mu nzira zabugenewe aho kugira ngo agende asandare mu ngo z’abaturage cyangwa abasenyere cyangwa asenye n’imihanda, Umujyi wa Kigali wihaye intego yo kujya wubaka ruhurura nibura 3 buri mwaka, ugakora n’inyigo 3 za ruhurura kugira ngo umwaka ukurikiyeho hazage hubakwa ruhurura zakorewe inyigo kugira ngo amazi abashe kugezwa mu gishanga aho byateganyijwe ko agezwa.

Eng. Rwunguko Jean D’amour, Umuyobozi Mukuru w’agateganyo ushinzwe ibikorwa remezo, imiturire n’ubwikorezi mu Mujyi wa Kigali

Mu kiganiro n’Imvaho Nshya, Eng. Rwunguko yavuze ko ubundi amazi yangiza iyo ateretswe inzira anyuramo, kuko yo yishakira inzira hakaba ubwo anyuze aho atakwiye kuba anyura.

Yagize ati “Kubaka za ruhurura ni ukugira ngo tuyahe inzira zizwi agomba kunyuramo kandi nini ngari zikwiranye n’ingano y’amazi y’imvura ateganywa kunyuramo aho ngaho.”

Iyi akaba ari inkuru nziza kuri bamwe mu banyakigali barimo Habimana Leonard na Kamanzi Liliane batuye mu murenge wa Rwezamenyo mu karere ka Nyarugenge kuko bavuga ko ruhurura zidatunganye zibateje impungenge.

Eng. Rwunguko avuga ko hirya no hino mu mujyi wa Kigali harimo kubakwa ruhurura hagamijwe guhashya ikibazo cy’amazi yibasira ingo z’abaturage.

Aboneraho gusaba Abanyakigali kubungabunga izo ruhurura cyangwa imihanda.

Yagize ati “Ku bijyanye no kubungabunga ibikorwa remezo ku buryo bwagutse dusaba abatuye Umujyi wa Kigali kuba abafatanyabikorwa bacu kuko ibyo umugi wubaka n’ubundi ni iby’Abanyakigali n’abahagenda n’abahatuye n’abaturutse impande n’impande, icyo tubasaba ni ukuba abafatanyabikorwa bacu, ibintu bakabigira ibyabo, bakareka kwangiza ibidukikije.”

Uretse ibi, ngo inzira zagiye zishyirwaho z’abanyamaguru, bakazikoresha ntibanyure mu byatsi , abantu bakirinda kunyura muri za ruhurura kuko ziba  zitagenewe kunyurwaho, abatwaye ibinyabiziga biremereye bakigengesera igihe batwaye ku mihanda y’amabuye ku buryo batagenda bangiza.

Agaruka ku birebana n’isuku n’umutekano, asaba abaturage kwirinda kujugunya imyanda aho babonye hose kuko mu mujyi wa Kigali haba hari ahantu habugenewe ho kuyijugunya.

Iyo bitabaye ibyo, ngo ni ho usanga ya myanda  ari yo n’ubundi igenda ikitekera muri ibyo biraro amazi akayoba akajya aho atagenewe kujya, bigateza ingaruka zitandukanye.

TANGA IGITEKEREZO

Leave a Reply

Your email address will not be published. Required fields are marked *