18°C , Mostly cloudy | Kigali-Rwanda

Umujyi wa Kigali umaze gufasha abagera ku 1.000 kubona akazi

Yanditswe na Rutayisire Emile

Ku ya 03-11-2019 saa 15:48:10
Rusimbi Charles Umukozi w'Umujyi wa Kigali ukorera ikigo KESC akaba ashinzwe amahugurwa (Foto Rutayisire E)

Umujyi wa Kigali washyizeho ikigo cyunganira abakoresha n’abashaka akazi kurushaho gusobanukirwa ibyerekeranye n’akazi n’amakuru ajyanye n’isoko ry’umurimo mu Gihugu, KESC (Kigali Employment Service Centre), aho abashaka akazi bamaze kugera ku 6.000 bize amashuri bafite ubumenyi butandukanye, abamaze kukabona bo bakaba bagera ku 1000.

Mu kiganiro Imvaho Nshya yagiranye na Rusimbi Charles, Umukozi w’Umujyi wa Kigali ukorera muri icyo kigo cy’Umujyi wa Kigali, KESC, ushinzwe gutegura amahugurwa, kuganiriza abashaka akazi no kubashishikariza kwitabira serivisi zitangwa n’ikigo KESC, yibukije ko  iki kigo cyashyizweho n’Umujyi wa Kigali mu 2013.

Agira ati “Muri iki kigo ni ho bategurira abashaka akazi kugira ngo nibagera ku isoko ry’umurimo bazitware neza. Tugira n’abafatanyabikorwa haba mu rwego rwa Leta ndetse no mu bigo byigenga tubona ko bafite amahirwe yo gutanga akazi ku rubyiruko tugasinyana na bo amasezerano ku buryo igihe cyose habonetse imyanya y’akazi tubahuza n’abashaka akazi.”

Akomeza avuga ko abantu bamaze kubona akazi bagera ku 1000 hakaba n’abandi bagera ku bihumbi 3000 bahawe amahugurwa bishakira akazi.

Mu byo KESC ikora, ku ruhande rw’abakoresha ni uguhuza abakoresha n’abashaka akazi hibandwa ku kubanza gusuzuma ubushobozi bw’abashaka akazi, ibikenewe, gutegura umunsi uhuza abakoresha n’abashaka akazi, imyimenyerezo n’ubundi bufasha.

Hari gutegura ububiko bw’inyandiko z’abashaka akazi ndetse no gutanga urubuga rwa internet abakoresha bamamazaho imirimo bafite nta kiguzi bagombye gusabwa, gusesengura urutonde rw’abashaka akazi bakarebamo abakandida bujuje ibisabwa ku myanya yashyizwe ku isoko bakaba ari bo basaba akazi.

Hari kandi no gufasha abashaka akazi kwimenya no gukoresha ubushobozi bafite kugira ngo bibafashe kubona imirimo no guhugura abashaka akazi ku buryo bwo kuzagakora neza.

Rusimbi avuga ko ku ruhande rw’abashaka akazi, KESC ibafasha kubona amatangazo y’akazi, amahugurwa no kwimenyereza akazi mu bigo by’abikorera, ibya Leta, ibyo mu gihugu n’imiryango mpuzamahanga, bandika abashaka akazi no kubagezaho amakuru y’akazi, gufasha abashaka akazi kubongerera ubumenyi n’amahirwe yo kubona akazi ku isoko ry’umurimo.

Hari no gufasha abashaka akazi kwimenya no gukoresha ubumenyi bifitemo kugira ngo bibafashe mu rugendo rwo gushaka akazi no kubona akazi no guhabwa ubufasha n’amakuru ajyanye n’umurimo n’abajyanama basobanukiwe ndetse babihuguriwe.

Rusimbi agaruka kuri serivisi baha abashaka akazi nko kuborohereza kubona interineti ibafasha gushaka amakuru yerekeranye n’akazi, akagira ati ”Hari icyumba gifunguye kuva mu gitondo kugeza nimugoroba kirimo mudasobwa abashaka akazi bifashisha bashaka amakuru. Iyo babonye ahantu baka akazi barandika bagasaba nk’abandi maze natwe tukabongerera ubumenyi ku buryo twizera ko ko mu bizamini bakora biborohera kuko hari ubumenyi babifitemo.”

Ibindi bikorerwa abashaka akazi ni uguhitamo ibyo bazakora, uburyo bwo kwihangira imirimo, kwimenyereza akazi n’amahugurwa.

Usibye ibyo kandi ku rubyiruko rufite izindi mpano z’ubumenyi ngo babateganyirije icyumba cyo kumurikamo ibihangano bakora cyane cyane ibikorerwa mu Rwanda (Made in Rwanda), aho usanga ibikoze mu biti, imigano, imikindo n’ibindi.

Rusimbi ati ”Abo bakora ibyo bintu baba barahawe amahugurwa yo kubinoza, kwihangira imirimo ndetse hakaba n’abandi bahugurwa mu gukora imishinga n’ibindi. Guhuriza hamwe ibyo bakora ni byiza kuko abantu babasha kubisura bakamenya ba nyirabyo kandi bakaba bashobora no kugura mu gihe babishimye.”

Mu butumwa yahaye abantu bashobora gutanga akazi, avuga ko KESC ifite abantu bize bafite ubumenyi n’ubushake.  Ati “Turifuza ko twafatanya tukabaha abakozi beza tugakemura ikibazo cy’ubushomeri mu Mujyi wa Kigali.”

Umwanditsi:

Rutayisire Emile

One Comment on “Umujyi wa Kigali umaze gufasha abagera ku 1.000 kubona akazi”

  1. Ibyo nukuri rwose, nanjye ndumwe mubari muri database za KESC ubufasha turabubona muburyo bugaragara, icyo dusaba nuko mbere yuko abakoresha bashyira amatangazo ahamagarira abantu akazi bajya babanza kuvugana nubuyobozi bwa KESC. Dushimiye umujyi wa kgl kubwiki gitekerezo cyiza bagize.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.