19°C , Mostly cloudy | Kigali-Rwanda
Umuherwe wa mbere muto muri Afurika ukomoka muri Tanzania, Mohammed Dewji

Umuherwe muto wa mbere muri Afurika yashimuswe

Yanditswe na Imvaho Nshya

Ku ya 11-10-2018 saa 12:58:27

Polisi ya Tanzania iravuga ko Mohammed Dewji yashimuswe n’abantu bitwaje intwaro mu Mujyi wa Dar es Salaam.

Mohammed w’imyaka 43, yashimuswe ubwo yari hanze y’inzu bananuriramo imitsi (gym) ya hoteli abamo.

Abantu batatu barimo abazungu babiri batawe muri yombi bakekwaho uruhare mu ishimutsa rye.

Impamvu y’iri shimutwa ntabwo irasobanuka.

Ikinyamakuru Forbes kigaragaza ko uyu mukire afite imitungo ifite agaciro k’amadolari miliyari 1.5.

Umwaha ushize, Forbes isanzwe ikora intonde z’abakire yavuze ko Dewji ari we muherwe muto muri Afurika.

Dewji ni umwe mu baterankunga b’imena b’ikipe ya Simba, imwe mu zikomeye muri Tanzania.

Mu mwaka wa 2016 yavuze ko azagenera 1/3 cy’imitungo ye ibikorwa byo gufasha ikiremwamuntu.

Mohammed Dewji, umuherwe wa mbere muto muri Afurika ukomoka muri Tanzania

Mohammed Dewji akuriye sosiyete ya mbere ikomeye y’umunyatanzania ya METL ikorera mu bihugu 14.

Ni sosiyete yashizwe na se mu myaka ya 1970 ikora amavuta yo guteka n’ibinyobwa.

Dewji yamaze imyaka 10 ari umudepite ku itike y’ishyaka riri ku butegetsi rya CCM kugeza mu mwaka wa 2005.

Minisitiri w’Ibidukikije muri Tanzania, January Makamba, yanditse kuri Twitter ko yavuganye na se wa Dewji akamubwira ko koko yashimuswe.

Yagize ati “Naganiriye na se wa Mohammed. Amakuru yo gushimutwa kwe ni impamo. Byambabaje cyane. Ndizera polisi iza gutanga amakuru yuzuye. Mohammed afite umuryango n’abana bato. Tumusengere we n’umuryangwo we. Dutange amakuru ashobora gutuma aboneka.”

BBC dukesha iyi nkuru iravuga ko Dewji yashimutiwe ahitwa Oysterbay muri Dar es Salaam.

Abamushimuse ngo babanje kurasa mu kirere ubundi baramuvudukana.

Umuyobozi w’Umujyi wa Dar es Salaam, Paul Makonda yabwiye abanyamakuru ko Dewji nta barinzi yari afite.

TANGA IGITEKEREZO

Leave a Reply

Your email address will not be published. Required fields are marked *