18°C , Partly sunny | Kigali-Rwanda
Perezida Paul Kagame (ibumoso) na mugenzi we Pombe Magufuli wa Tanzania, bemeranyijwe ko umuhanda wa gari ya moshi uhuza u Rwanda na Isaka uzatangira kubakwa uyu mwaka wa 2018

Umuhanda wa gari ya moshi Kigali-Tanzania uratangira uyu mwaka

Yanditswe na MUGABO LAMBERT

Ku ya 15-01-2018 saa 06:58:04

Ku munsi w’ejo hashize Umukuru w’Igihugu Paul Kagame yagiriye uruzinduko rw’akazi rw’umunsi umwe mu gihugu cya Tanzania, agirana ibiganiro na mugenzi we Pombe Magufuli wa Tanzania, aho bemeranyijwe kubaka umuhanda wa gari ya moshi uhuza ibihugu byombi, imirimo igatangira muri uyu mwaka wa 2018.

Perezida Paul Kagame (ibumoso) na mugenzi we Pombe Magufuli wa Tanzania, bemeranyijwe ko umuhanda wa gari ya moshi uhuza u Rwanda na Isaka uzatangira kubakwa uyu mwaka wa 2018

Uruzinduko rwa Perezida Paul Kagame muri Tanzania rwabaye ku munsi w’ejo hashize tariki ya 14 Mutarama 2017. Abakuru b’ibihugu byombi bemeranyijwe kubaka umuhanda wa gari ya moshi uzava Isaka muri Tanzania ukagera i Kigali, bityo ukazaba uhuza Kigali n’icyambu cya Dar es Salaam muri Tanzania.

Uyu muhanda wa gari ya moshi uzaba ureshya na Kilometero 400, uzaterwa inkunga n’ibihugu byombi, u Rwanda na Tanzania nk’uko Perezida Magufuli yabitangarije itangazamakuru nyuma y’ibi biganiro.

Yagize ati “Turashaka ko ba Minisitiri b’ububanyi n’amahanga b’ibihugu byombi bahura iki cyumweru bakaganira uburyo bwo gutera inkunga uyu mushinga. Turashaka ko kubaka bihita bitangira kuko inyigo n’indi myiteguro yose yaratangiye […] Perezida Kagame nange turashaka gushyiraho ibuye ry’ifatizo uyu mwaka.”

Tanzania yatangiye kubaka ibice bibiri bya gari ya moshi kuva Dar es Salaam kugera Morogoro (km 330), no kuva Morogoro kugera Makutupora muri Dodoma hareshya na Km 426, imirimo izatwara amashiringi ya Tanzania trillion zirindwi nk’uko Magufuli yabitangaje.

Magufuli akaba avuga ko igihugu ke cyashyigikiye Perezida Kagame ku buyobozi bw’Umuryango w’Ubumwe bw’Afurika (AU) ibintu Kagame yashimye, na we akaba yaragize ati “Nishimiye gukorana na Perezida Magufuli n’abandi ba Perezida b’Afurika. Bampaye izi nshingano kubera ko biteguye kumfasha kuzuzuza.”

U Rwanda na Tanzania nk’ibihugu bituranye bihurira no mu Muryango w’Ubumwe bw’Afurika y’Iburasirazuba, bisanzwe bifitanye umubano mwiza ushingiye ku buhahirane.

TANGA IGITEKEREZO

Leave a Reply

Be the First to Comment!

avatar