17°C , Intermittent clouds | Kigali-Rwanda

Umuhanda Nyagatare-Rukomo uhuza Uburasirazuba n’Amajyaruguru watangiye kubakwa

Yanditswe na Hitimana Servand

Ku ya 07-03-2019 saa 17:04:37
Eng. Uwihanganye J de Dieu n'umuybozi 'intara y'iburasirazuba mu modoka izifashishwa mu gukora umuhanda

Umuhanda uhuza Uburasirazuba n’Amajyaruguru watangiye kubakwaHITIMANA SERVAND Imirimo yo kubaka no kwagura umuhanda Nyagatare-Rukomo uhuza  Intara y’Iburasirazuba n’iyAmajyaruguru yatangijwe ku mugaragaro kuri uyu wa Kane tariki 7 Werurwe 2019.

Uyu muhanda witezweho byinshi mu iterambere ry’abaturage, nk’uko byagarutsweho ubwo watahwaga n’abayobozi muri Minisiteri, Intara, uturere n’abandi bari mu byiciro binyuranye.

Umuhanda Nyagatare–Rukomo ni umuhanda w’igitaka ufite uburebure bwa kilometero 73.3, biteganyijwe ko ugiye gushyirwamo kaburimbo ukazuzura mu gihe k’imyaka ibiri n’igice.

Ni umuhanda uzatwara ingengo y’imari ingana n’amafaranga y’u Rwanda  38.607.657.652 kugira ngo utunganywe.
Umunyamabanga wa Leta muri Minisiteri y’Ibikorwa Remezo (MININFRA) ushinzwe gutwara abantu n’ibintu Eng. Uwihanganye Jean de Dieu, yavuze ko uyu muhanda niwuzura uzagira uruhare rukomeye mu guhuza Iburasirazuba n’Amajyaruguru y’igihugu nk’ibice bizwiho kugira umusaruro mwinshi mu buhinzi n’ubworozi, bityo ubucuruzi butere imbere n’abahinzi babashe kugera ku masoko biboroheye.

Yavuze kandi ko uyu muhanda uzaha akazi abaturage b’aka gace imibereho yabo ikarushaho kuba myiza ndetse ukazatuma igiciro cy’ubwikorezi kigabanuka kandi bikoroshya ibijyanye no kugeza umusaruro ku masoko.

Eng. Uwihanganye ati “Uyu muhanda ni umwe mu mishinga minini y’imyaka 7 ukaba uri mu byo Umukuru w’Igihugu yemereye abaturage. Ni igisubizo ku migenderanire n’ubwikorezi aho bizatuma n’ibiciro byagendaga kuri ibi bintu bibiri bigabanuka.

Umunyamabanga wa Leta muri minisiteri y’ibikorwa remezo atangiza ku mugaragaro imirimo yo kubaka umuhanda Nyagatare Rukomo

Kanyamihigo Fidèle wavuze mu izina ry’abandi baturage, yashimiye Perezida wa Repubulika ko adahwema kubagezaho ibikorwa by’iterambere.

Ati “Nyakubahwa Perezida wa Repubulika imvugo ye ni yo ngiro, kandi uyu muhanda ugiye kudufasha kwiteza imbere. Twavaga hano Ngarama tujya kurangura ibintu i Kigali tugakoresha amasaha atatu n’igice kuko twazengurukaga. Nyamara  Kaburimbo niyuzura isaha imwe n’igice tuzajya tuba tugeze i Kigali”.

Guverineri w’Intara y’Iburasirazuba Mufulukye Fred yasabye abaturage kubyaza umusaruro aya mahirwe babonye binyuze mu mirimo bazahabwa ndetse n’igihe uyu muhanda uzaba wuzuye

Yagize ati  “Uyu ni umushinga munini urimo amafaranga menshi, mukwiye kwitegura kubyaza umusaruro akazi muzahabwa mu bikorwa byo kubaka uyu muhanda, kandi no mu gihe uzaba wuzuye munoze ubucuruzi n’ibindi bikorwa, mwubake amahoteri, aka gace gatere imbere kugira ngo kagendane n’iri terambere ribagezwaho.”

Eng. Uwihanganye J de Dieu n’umuybozi ‘intara y’iburasirazuba mu modoka izifashishwa mu gukora umuhanda

Umwanditsi:

Hitimana Servand

Tanga Igitekerezo

Email yanyu ntigaragazwa ku rubuga. Amazina na Email ni ngombwa.