22°C , Mostly cloudy with thunderstorms | Kigali-Rwanda

Umuhanda Kigali-Gatuna wangijwe n’ibiza watangiye gusanwa

Yanditswe na MUGISHA BENIGNE

Ku ya 16-05-2018 saa 08:10:52

Minisitiri w’Ibikorwa Remezo, Amb. Claver Gatete, aratangaza ko umuhanda Kigali- Gatuna wangiritse, kuri ubu ariko watangiye gusanwa ku buryo bitarenze ku wa Mbere w’Icyumweru gitaha uyu muhanda uzaba wabaye nyabagendwa.

Aha ni aho uyu muhanda wangiritse ku gice cy’Umurenge wa Cyumba, ariko kuwusana byaratangiye, uzaba wose ari nyabagendwa ku wa Mbere

Nk’uko bitangazwa na Amb. Gatete, ngo umuhanda wa Kigali-Gatuna wangiritse ku gice cy’Umurenge wa Cyumba kuva ku munsi wo ku Cyumweru, bikomeza ku wa Mbere kugeza ku wa Kabiri w’iki cyumweru, ariko ubu byahagaze, hakaba hatangiye gahunda zo kuwusana kugira ngo wongere kuba nyabagendwa.

Amb. Gatete Claver Minisitiri w’Ibikorwa Remezo ibumoso na Eng Uwihanganye Jean de Dieu Umunyamabanga wa Leta ushinzwe ubwikorezi muri MININFRA

Yagize ati “Iyangirika ry’umuhanda Kigali-Gatuna ryatewe n’imvura idasanwe yaguye mu mezi 5 ashize, bituma amazi yuzura imisozi ndetse anamanuka mu misingi y’umuhanda, bityo urariduka”.

Minisitiri w’Ibikorwa Remezo yagaragaje ko ikibazo cyahagurukiwe, bajya kureba uko ibyangiritse bingana mu rwego rwo gutangira gusana kugira ngo ukomeze ube nyabagendwa ku binyabiziga byose.

Yagize ati “Kugeza ubu uyu muhanda urakoreshwa mu gice kimwe cyawo, kandi uragendwamo n’imidoka nto zitwara abagenzi ariko amakamyo yo arimo guca ku yindi mihanda ihuza u Rwanda na Uganda nka Cyanika na Kagitumba.”

Gusa Amb. Gatete avuga ko ubuhahirane n’igihugu cya Uganda bukomeje kuko hafashwe ingamba zo kuba hakoreshwa indi mihanda igana muri iki gihugu.

Ati “Ubuhahirane n’igihugu cy’abaturanyi cya Uganda ntibwigeze buhagarara, ahubwo twafashe ingamba z’uko imodoka nini zinyura mu mihanda ihuza igihugu cyacu n’icya Uganda ari yo Cyanika na Kagitumba”.

Umunyamabanga wa Leta ushinzwe ubwikorezi, Eng. Uwihanganye Jean de Dieu wigereye ahabereye iki kiza cyashenye umuhanda, avuga ko ibikorwa by’ibanze byatangiye gukorwa kugira ngo uyu muhanda ubashe kuba nyabagendwa ku binyabiziga byose, byaba ibito n’ibinini.

Ati “Twahigereye twasanze ikibazo kitoroshye, ariko nka Minisiteri twabishakiye ingamba zihuse zo kubikemura nk’imirimo y’ibanze yo kuwusana ku buryo ku wa Mbere w’icyumweru gitaha umuhanda uzaba wabaye nyabagendwa.”

Eng. Uwihanganye avuga ko kwangirika k’uyu muhanda Kigali- Gatuna byatewe n’amazi y’imvura yinjiye mu musozi kugeza ubwo yinjiye no mu musingi w’umuhanda, bityo urariduka.

Uwihanganye avuga kandi ko umuhanda wegereye igice k’igishanga kongeraho imisozi ihanamye ikikije uyu muhanda, akaba ari byo byateje amazi menshi yinjiye mu musingi wawo.

Ku bijyanye n’abantu baturiye igice cyangiritse, Umunyamabanga wa Leta avuga ko nabo bagomba kwimurwa kugira ngo bidashyira mu kaga ubuzima bwabo. Ati “Imiryango igomba kwimurwa aho uwo muhanda wangiritse ni  igera ku  8 ikazatuzwa kimwe n’indi nk’uko Leta ibikorera abandi  batuye mu manegeka”.

Ibiza byangije umuhanda Kigali-Gatuna ni kimwe n’ibyangije amazu n’imyaka y’abaturage, byose bikomoka ku mvura idasanzwe yaguye mu mezi atanu ashize.

TANGA IGITEKEREZO

Leave a Reply

Be the First to Comment!

avatar