Umugore wa Pasiteri wubakishije Dove Hotel aguye mu mpanuka

Yanditswe na KAYITARE JEAN PAUL  

Ku ya 15-01-2021 saa 13:32:25

Kaneza Christine, umugore wa Pasiteri Sindayigaya Théophile, yitabye Imana aguye mu mpanuka yabereye mu murenge wa Ndera mu Karere ka Gasabo ahazwi nko ku Bashinwa.

Abasenganaga na nyakwigendera babwiye Imvaho Nshya ko amakuru y’urupfu rwa Kaneza bayamenye ahagana mu masaha yo ku gicamunsi cyo kuri uyu wa Gatanu tariki 15 Mutarama 2021.

Abageze aho impanuka yabereye, bavuga ko ikamyo ya Fuso yamanukaga yabuze feri ikagenda ikagonga Kaneza wari utwaye imodoka yo mu bwoko bwa Toyota Helix, agahita yitaba Imana.

Pasiteri Musabyeyezu Jean de Dieu kuri Paruwasi ya Nyarugunga, avuga ko nyakwigendera yari afite ubuhamya bwiza aho yasengeraga kuko ni bwo bwatumye agirwa mwarimu ku mudugudu wa ADEPR Nyarugunga.

Yagize ati: “Kugira ngo ugere ku rwego rwo kuba mwarimu ni uko uba ufite ubuhamya bwiza. Kaneza yakoraga nk’abagabo. Yakoreraga ahantu hose umwohereje kandi agakoresha igihe ke neza. Yifuzaga gukora ikintu mu buryo bwiza”.

Murekatete Jeanne, umwe mu basenganaga na nyakwigendera, yabwiye Imvaho Nshya ko urupfu rwa Kaneza rubasizemo igikuba kandi bakaba babuze umuntu witangiraga umurimo w’Imana.

Yagize ati: “Yari umwana mwiza aduciyemo igikuba, yitondaga, yakundaga umurimo w’Imana. Muri make tubuze intwari mu itorero ariko nyine Imana iramwisubije”.

Nyakwigendera wikoreraga mu bijyanye n’ubwubatsi, asize abana bane n’umugabo.

Polisi y’igihugu ikunze gusaba abaturarwanda gukoresha isuzuma ry’ibinyabiziga no gukurikiza amategeko y’umuhanda, hagamijwe kugabanya impanuka zo mu muhanda.

Nyakwigendera Kaneza Christine, umugore wa Pasiteri Sindayigaya Théophile

Umwanditsi:

KAYITARE JEAN PAUL  

3 Comments on “Umugore wa Pasiteri wubakishije Dove Hotel aguye mu mpanuka”

  1. Muri kino gihe Imana iri gucyura abakozi bayo cyane, uretse ko ahantu bajya tutaragerayo ariko turabyumva mu kwizera ko ari heza pe, buriya rero n’abasigaye Imana iba yumva yabajyana ariko yakwibuka ko hari umurimo bakiyikorera igahita yisubira ikaba ibaretse. Dushimiye umuremyi ko yisubije uwo yari yaradutije ka ndi Imana ikomeze kwihanganisha abasigaye.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.