18°C , Mostly cloudy | Kigali-Rwanda

Umugambi w’Imana kuri Padiri Ubald, inkuru mbi ku Rwanda

Yanditswe na KAYITARE JEAN PAUL

Ku ya 08-01-2021 saa 19:55:50
Padiri Ubald yagizwe Umurinzi w'Igihango mu mwaka wa 2015

“Padiri Ubald, muruhukire mu mahoro…” ayo ni amagambo magufi Madamu Jeannette Kagame yavuze asezera ku Umurinzi w’Igihango Padiri Ubald Rugirangoga watabarutse mu rukerera rwo kuri uyu wa Gatanu tariki ya 08 Mutarama 2021.

Inkuru y’urupfu rwa Padiri Ubald yamenyekanye mu gitondo, bivugwa ko yaguye mu Bitaro bya Kaminuza ya Utah Hospital mu Mujyi wa Salt Lake wo muri Leta Zunze Ubumwe z’Amerika (USA).

Madamu Jeannette Kagame ari na we Muyobozi Mukuru wa Unity Club Intwararumuri, yahaye ishimwe Padiri Ubald  kubera gahunda yatangije y’Isanamitima n’Ubwiyunge muri Paruwasi ya Mushaka muri Diyoezi ya Cyangugu.

Iyo gahunda yeze imbuto mu gihugu hose, ifasha abatari bake gukira ibikomere batewe n’amateka mabi yaranze u Rwanda, yimakazwamo urukundo, amahoro no kubabarira.

Uretse Madamu Jeannette Kagame, Abakirisitu Gatolika n’Abanyarwanda muri rusange bashenguwe no kubura umugabo wagaragaje ubutwari mu bihe byose yanyuzemo.

Karidinali Antoine Kambanda ni umwe mu bayobozi bashimangiye uburyo Kiliziya Gatolika mu Rwanda ibuze intwari n’ubwo hari mugambi Imana yari ifitiye Padiri Ubald Rugirangoga witabye Imana ku myaka 68 y’amavuko.

Karidinari Kambanda asobanura ko kuba Padiri Ubald Imana yaramurokoye muri Jenoside yakorewe Abatutsi, ko hari umugambi yari imufiteho nko gufasha abantu kwiyunga n’Imana.

Yagize ati: “Padiri Ubald Rugirangoga, Imana yamuduhaye yamwisubije none imwakire, aruhukire mu mahoro. Imana yamurokoye Jenoside yakorewe Abatutsi imufitiye umugambi wo gusana imitima, gufasha abantu kwiyunga n’Imana, umuntu kwiyunga na we ubwe”.

Akomeza avuga ko Padiri Ubald yatanze umusanzu we mu kubaka umuryango nyarwanda, agasaba ko abantu bakomeza umurage we yatangije.

Ati: “Yagize uruhare runini mu kubaka umuryango nyarwanda. Reka dukomeze umurage we”.

Amateka ya Padiri Ubaldi Rugirangonga

Padiri Ubald yavukiye mu cyahoze ari Segiteri ya Rwabidege muri Paruwasi ya Mwezi, Komini ya Karengera, Perefegitura ya Cyangugu (Ubu ni mu Ntara y’Iburengerazuba). Yavutse muri Gashyantare 1955, yitabye Imana afite imyaka 66 y’amavuko.

Kuva akiri muto, ubuzima bwa Padiri Ubald bwashinze imizi muri Kiliziya Gatolika, yabatijwe ari uruhinja rw’ukwezi kumwe, ni ukuvuga muri Werurwe 1955.

Amashuri ye yayize mu bigo by’Abihayimana Gatolika. Abanza yayigiye i Rwabidege kuva mu 1962 kugeza mu 1968 atangira ayisumbuye muri Seminari ntoya i Mibirizi ndetse ayakomereza mu iseminari nto yitiriwe Mutagatifu Piyo wa 10 yo ku Nyundo, kugera mu 1973 ubwo yahungiraga i Burundi.

Ibibazo by’ivangura ry’amoko ntibyamworoheye, cyane ko mu mwaka wa1960 byamutwaye Se umubyara, byakomera bikaza gutuma ahungira i Burundi mu mwaka w’1973, akaza kuharangiriza seminari nto.

Yagarutse mu Rwanda mu mwaka wa 1978 ahita akomeza amasomo ye mu iseminari Nkuru ya Nyakibanda, ku myaka 29 ahabwa isakaramentu ry’ubusaseridoti tariki 22 Nyakanga 1984, ni umuhango wabereye iwabo muri Pasuwasi ya Mwezi.

Mu myaka yari amaze ari umupadiri, yakoze imirimo myinshi itandukanye kandi ashimwa na benshi kuba yarayikoze neza.

Padiri Ubald yarihiye amashuri abana b’abishe umuryango we muri Jenoside yakorewe Abatutsi. Yabaye umupadiri muri Paruwasi ya Nyamasheke, nubwo nyuma yaje kwimurirwa muri Paruwasi ya Mushaka ndetse nyuma anahabera Padiri mukuru kuva mu 1999.

Se yishwe mbere ya Jenoside azizwa ubwoko bwe ndetse icyo gihe ni bwo Padiri Ubald na we yaje guhunga nyuma yo gutotezwa azira ubwoko, ariko akaza kugaruka mu Rwanda nyuma yo kumva ijwi ry’Imana rimusaba kuza kwigisha Abanyarwanda urukundo.

Ubwo Jenoside yakorerwaga Abatutsi mu 1994, benshi mu muryango we, abavandimwe be ndetse na nyina umubyara yarabahitanye.

Ku rundi ruhande, abamwiciye yarababariye ndetse arihira amashuri abana babiri; umuhungu n’umukobwa b’abamwiciye umuryango muri Jenoside.

Padiri Ubald yakunze kuvuga ko gutanga imbabazi ari kimwe mu bintu bikomeye yakoze mu buzima bwe kuko byamufashije kubona amahoro yo mu mutima, kandi ko icyaha ari gatozi ku buryo ntawukwiye guhora undi icyaha umubyeyi cyangwa umuvandimwe we yakoze cyangwa ngo abe yamurebera muri iyo shusho.

Yashinze ‘Sinodi ya Gacaca’ nyuma yo gutanga urugero agatera intambwe yo kubabarira abamwiciye umuryango muri Jenoside.

Padiri Ubald yabaye umukangurambaga w’ubumwe n’ubwiyunge muri Diyosezi ya Cyangugu, yigisha abantu kubabarirana no kongera kubana n’ubwo bitari byoroshye. Ni umwe mu bantu bagize uruhare rugaragara mu gucengeza mu Banyarwanda ubumwe n’ubwiyunge.

Uretse kwigisha abakirisitu muri Kiliziya, Padiri Ubald yanajyaga muri za gereza, akajya kwigisha abakoze ibyaha kwihana bagasaba imbabazi, hanyuma agahindukira akajya gusaba abiciwe kubabarira ababahemukiye.

Impano ye yo gukirisha isengesho abafite ubumuga n’uburwayi budakira, yari imaze kwamamara mu mahanga.

Padiri Ubald yari afite ingabire yo gusengera abarwayi bagakira by’umwihariko abari barwaye indwara z’ibyorezo nka Kanseri, SIDA, Diyabete n’izindi. Hari benshi bagiye batanga ubuhamya ko bene izi ndwara bazikiriye mu masengesho ya Padiri Ubald.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.