23°C , Mostly cloudy | Kigali-Rwanda

Umugabo w’imyaka 78 yishwe na COVID-19 mu Rwanda

Yanditswe na Imvaho Nshya

Ku ya 11-07-2020 saa 21:11:34

Nyuma y’iminsi igera ku 10 hatangajwe umuntu wa gatatu wishwe n’icyorezo cya COVID-19, kuri uyu wa Gatandatu tariki ya 11 Nyakanga 2020 hatangajwe umurwayi wa 4 wahitanywe na cyo mu Rwanda, akaba ari umugabo w’imyaka 78 y’amavuko.

Umurwayi wa gatatu yari umusirikare mu Ngabo z’u Rwanda (RDF) wafatiwe mu mahanga ari mu Butumwa bwa Loni bwo kubungabunga amahoro, mu gihe uwa kabiri yari umupolisikazi Eunid Mbabazi w’imyaka 24 y’amavuko, na we wanduriye mu Butumwa bw’Umuryango w’Abibumbye bwo kubungabunga amahoro, mu gihe uwa mbere we yari umushoferi w’imyaka 65

Inkuru ibabaje y’urupfu rw’uwatangajwe kuri uyu wa gatandatu  yatangajwe hamwe n’umubare w’abarwayi bashya 47 batahuwe mu bipimo 4,060 byafashwe mu masaha 24 ashize, hakaba hanatashye 28 bakize neza.

Ibyo byatumye umubare w’abamaze gukira COVID-19 ugera kuri 663  mu bantu 1,299 bamaze gutahurwaho icyo cyorezo mu Rwanda.

Abarwayi bashya batahuwe i Kigali:43 (arimo abo mu kigo kinyurwamo by’igihe gito cya Kigali), Nyamasheke:2, Rusizi:1 na Kirehe:1, bakaba bahise bashyirwa mu kato aho bakomeje kwitabwaho n’abaganga.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Abamaze kwandura ku Isi bangana na 12,774,825 barimo abakize 7,460,150 n’abapfuye 565,583.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.