19°C , Showers | Kigali-Rwanda
Minisitiri w'Umuco na Siporo, Nyirasafari Esperance asobanurira IntekoIshinga Amategeko uko umuco n'indangagaciro bigiye kwigishwa cyane

Umuco wacu si ibintu bya kera bibi – Min Nyirasafari

Yanditswe na Mutungirehe Samuel

Ku ya 15-05-2019 saa 17:45:01

Minisiteri y’Umuco na Siporo (MINISPOC), mu mwaka wa 2019/2020 izakomeza ubukangurambaga ku muco nyarwanda, urubyiruko rukigishwa ibyiza by’umuco ndetse rugatozwa kuwusigasira.

Minisitiri Nyirasafari Esperance yabitangarije mu Nteko Ishinga Amategeko kuwa Kabiri tariki ya 14 Gicurasi 2019 mu kiganiro yagiranye n’Abadepite bagize Komisiyo y’Ingengo y’Imari n’Umutungo by’Igihugu, asobanura imbanzirizamushinga w’ingengo y’imari ya Minisiteri y’Umuco na Siporo, 2019/2020.

Minisitiri Nyirasafari yavuze ko umuco w’Abanyarwanda wifitemo byinshi byiza byashingirwamo mu bihe biri imbere, bityo ukwiye kwigishwa abakiri bato kugira ngo uzarusheho guteza imbere igihugu.

Ati “Turifuza kuzakomeza ubukangurambaga ku bijyanye n’umuco wacu ndetse n’indangagaciro z’umuco wacu, tugasobanura neza ibyiza birimo. Akenshi iyo abantu bavuze umuco hari igihe bumva ari ibintu bya kera bibi; umuco wacu urakize, urakomeye kandi turanabibona. Abanyarwanda, abakurambere bacu bari abanyabwenge cyane, twagiye tubona ko hari n’ibyo dusubira inyuma tukajya kuvoma mu muco wacu.

Ni ngombwa rero ko tubisobanura, tukabisobanurira urubyiruko mu rwego rwo kugira ngo umuco wacu tuwuheshe agaciro, tuwuteze imbere, ibyiza birimo tubikomeze kuko imbaraga nyinshi tuzishingiye mu muco hari byinshi twageraho.”

Yakomeje avuga ko kugira ngo ibyo bikorwe hazifashishwa inzira zitandukanye zo kugeza izo nyigisho ku bantu, zirimo radio, televiziyo, imbuga nkoranyambaga, n’ubundi buryo bwakoreshwa kugira ngo abantu bamenye umuco nyarwanda, bawukunde, ari nako bakomera ku ndangagaciro zirimo.

Ati “Kandi twifuza ko tutabikora mu gihugu gusa, ndetse no mu mahanga aho dufite za ambasade, aho dufite Abanyarwanda.”

Indi nzira izafasha Minisiteri kumenyekanisha umuco nyarwanda n’indangagaciro zawo ni itorero ry’Urukerereza, aho ruzifashishwa mu maserukiramuco atandukanye u Rwanda rwitabira, rukazerekana ibigize umuco bityo abantu bakagira amatsiko ku kumenya umuco nyarwanda.

Hari kandi no kugaragaza umuco nyarwanda mu minsi imwe n’imwe ijya iba ngarukamwaka yo mu muco nyarwanda, nk’Umuganura, aho Abanyarwanda bazajya bamenyeramo umuco wabo cyane abakiri bato, no mu iserukiramuco ry’imbyino (FESPAD).

Mu bindi birimo guteza imbere ururimi rw’Ikinyarwanda cyane ku ndimi shami, bigatuma zidacika, cyangwa zikifashishwa mu gukungahaza ururimi rw’ikinyarwanda aho kugira ngo mu gukura k’ururimi hakomeze kwifashishwa gusa indimi zo hanze zidahura n’umuco nyarwanda n’indangagaciro.

Bamwe mu badepite bagize Komisiyo y’imari n’umutungo by’igihugu basabye ko mu isomer ry’igihugu hakongerwamo ibitabo bivuga ku muco, kuko hari igihe basanga ari bike ugereranyije n’ibindi birimo.

Minisitiri w’Umuco na Siporo, Nyirasafari Esperance asobanurira IntekoIshinga Amategeko uko umuco n’indangagaciro bigiye kwigishwa cyane

TANGA IGITEKEREZO

Leave a Reply

Your email address will not be published. Required fields are marked *