21°C , Intermittent clouds | Kigali-Rwanda
Aha ni ku mupaka wa Gatuna, umwe mu mipaka ihuza u Rwanda na Uganda

Umubano mubi hagati y’u Rwanda na Uganda wagize ingaruka no kuri Kenya

Yanditswe na Nshimyumukiza Janvier Popote

Ku ya 25-03-2019 saa 11:22:10

Perezida Kagame yongeye kuvuga ku bibazo biri hagati y’u Rwanda na Uganda, ashimangira ko byagize ingaruka zikomeye ku buhahirane u Rwanda rusanzwe rugirana na Kenya.

Yavuze ko usibye kuba Abanyarwanda bahohoterwa muri Uganda, ubuhahirane bw’u Rwanda na Kenya na bwo bwabigendeyemo kuko bisaba kunyura muri Uganda.

Yabivugiye mu biganiro yagiranye na bamwe mu bitabiriye Inama y’Abayobozi b’Ibigo (Africa CEOs Forum) irimo kubera i Kigali, barimo Perezida wa Ethiopia, Sahle-Work Zewde.

Yagize ati, “Hari amakontineri yavaga i Kigali ajya Mombasa. Kontineri y’amabuye y’agaciro yafungiwe ku mupaka (wa Uganda) ihamara amezi atanu.”

Yunzemo ati, “Sosiyete y’Abanyakenya yari itwaye amata iyakuye mu Rwanda. Amakontineri yayo na yo yarafashwe kugeza ibihumbi by’amatoni y’amata byangijwe.”

U Rwanda na Uganda ni abaturanyi babanye nabi kuva mu mwaka wa 2017, aho u Rwanda rushinja Uganda gufasha imitwe ya RNC na FDLR ishinjwa guhungabanya umutekano w’u Rwanda.

Perezida Kagame aherutse kuvuga ko kubana nabi atumva inyungu bifitiye Uganda, aho yasobanuye ko yasabye Perezida w’icyo gihugu gukemura ikibazo gihari akabyanga.

Iyi nama y’iminsi ibiri y’Abayobozi b’Ibigo ibereye mu Rwanda mu gihe umwuka hagati y’u Rwanda na Uganda utifashe neza, aho Uganda ishinjwa kwica urubozo Abanyarwanda.

Uganda yakomeje kuvuga ko Umunyarwanda wubahiriza amategeko nta kibazo afite, u Rwanda rukavuga ko ukoze icyaha yakurikiranwa ariko mu nzira zemewe n’amategeko.

Kuri iyi nshuro, Perezida Kagame yagarutse kuri iki kibazo, avuga ko Abanyarwanda bafatirwa muri Uganda bafungirwa ahantu hatemewe n’amategeko, ku buryo kubasura bidashoboka.

Yagize ati, “Ubutumwa Uganda iba itanga, ni ukubwira Abanyarwanda ngo ntimuze hano. Iki kibazo twakimenyesheje Leta ya Uganda, turababwira tuti niba mufite abantu bakoze ibyaha mubakurikirane ariko mubikore mu nzira ziteganywa n’amategeko kandi mu mucyo.”

Yakomeje agira ati, “Usibye kuba amategeko atarakurikijwe, na Ambasaderi (w’u Rwanda muri Uganda) ntashobora kujya kubasura kuko bafungiwe ahantu hatazwi. Twaganiriye na Uganda ariko nta muti wabonetse.”

Uku kudatahiriza umugozi umwe, ni imbogamizi ku ishyirwa mu bikorwa ry’amasezerano yagiye asinywa mu rwego rwo kunoza imikoranire n’ubuhanirane hagati y’ibihugu by’Afurika.

Muri ayo masezerano twavuga ajyanye n’isoko rusange ry’uyu mugabane azwi nka Continental Free Trade Area (CFTA), aho ibihugu byayasinye byiyemeje koroherezanya mu bucuruzi.

Perezida Kagame avuga ko nyuma yo gushyira umukono kuri aya masezerano yasinyiwe i Kigali muri Werurwe 2018, yagiranye ibiganiro na Perezida Museveni nubwo bitatanze umusaruro.

Ati, “Nagiye kureba Perezida wa Uganda, nganira n’ubuyobozi. Nababwiye ko hari ibintu bikomeye birimo kuba ariko ibihugu byombi bidindizwa n’utubazo duto umuntu atanabonera igisobanuro. Kuki tutakemura utwo tubazo ubundi twese tukungukirwa?”

Mu gihe umubano w’impande zombi urimo igitotsi, Abanyarwanda basabwe kudasubira muri Uganda, aho u Rwanda rwavuze ko biri mu rwego rwo kwirinda ko bajyayo bagahohoterwa.

Abacuruzi ba Uganda baza mu Rwanda cyangwa bashaka gukomeza mu Burundi, na bo bagiye bumvikana bavuga ko bagorwa no kwinjira mu Rwanda kuko umupaka wa Gatuna wafunzwe.

U Rwanda ariko rwasobanuye ko gufunga umupaka wa Gatuna bitagamije kubuza Abanya-Uganda kuza mu Rwanda, ahubwo ko ari ukubera ubwubatsi bukorwa kuri uwo mupaka.

U Rwanda rwasabye ko mu gihe ubwo bwubatsi butararangira, abava muri Uganda bakoresha indi mipaka ihuza u Rwanda n’icyo gihugu kuko yo ari nyabagendwa.

Perezida Kagame yagarutse ku kibazo cy’ifungwa ry’umupaka ritavugwaho rumwe, avuga ko ikibazo nyamukuru atari ukuba umupaka wafungwa, ahubwo ikibazo ngo ni icya politiki.

Ati, “Ikibazo si umuhanda cyangwa kuba umuhanda urimo kubakwa. Ikibazo ni politiki. Hari amajana y’Abanyarwanda bamaze imyaka bafungiwe muri Uganda, bataragezwa mu nkiko.”

Aha ni ku mupaka wa Gatuna, umwe mu mipaka ihuza u Rwanda na Uganda

Ibibazo by’u Rwanda na Uganda byahereye muri 1998, ubwo Uganda yafashaga Seth Sendashoga mu mugambi wo gutera u Rwanda, nk’uko Perezida Kagame abihamya.

Sendashonga wari warabaye Minisitiri w’Ubutegetsi bw’Igihugu mu Rwanda (1994-1995), yahungiye muri Kenya, aza kwicwa arashwe n’abantu batamenyekanye mu 1998, i Nairobi.

TANGA IGITEKEREZO

5 Comments on “Umubano mubi hagati y’u Rwanda na Uganda wagize ingaruka no kuri Kenya”

  1. Ese ntitwajya dukoresha indege tugemuye Kenya. U Rwanda rukagura indege z’imizigo, tugakoresha inzura yo mu kirere. Uganda twahita duca ukubiri.

  2. But i think the two presidents shd continue to have dialogues so as to fix the political antagonisms btn them!

  3. But i think the two presidents shd continue to have dialogues so as to fix the political antagonisms btn them!

Leave a Reply

Your email address will not be published. Required fields are marked *