18°C , Showers | Kigali-Rwanda
Ingurube za Shirimpumu zahinduye ubuzima bwe nyuma yo kuzibyazamo umusaruro

Uko Shirimpumu yaretse akazi ka Leta akorora ingurube abifashijwemo na BDF

Yanditswe na SEZIBERA ANSELME

Ku ya 17-10-2018 saa 10:01:57

Shirimpumu Jean Claude wo mu Karere ka Gicumbi mu Murenge wa Kageyo, ni urugero rwiza rw’umuntu witeje imbere kubera guhinga no korora, ku buryo yaje no kuva ku kazi ka Leta kuko byamwinjirizaga agatubutse.

Yakoraga mu Kigo cy’Igihugu cy’Ubuzima (RBC) muri serivisi yo kwamamaza ibijyanye n’ubuzima, asezera ku mirimo ye mu mwaka wa 2013.

Mu buhamya bw’iterambere amaze kugeraho, ashima cyane Ikigega cya Leta gitera inkunga imishinga iciriritse (BDF) kuko cyamufashije ubwo yashakaga kwagura ibikorwa bye.

Amwe mu matungo yorora ni ingurube, aho afite ingurube zisaga 600.

Kugira ngo zigire ubuzima bwiza azitaho mu bijyanye n’ubuvuzi

Shirimpumu ahamya ko ubuhinzi n’ubworozi ari ibintu by’ingirakamaro cyane kuko bituma ibyari indoto bijya mu ngiro, akagereranya BDF n’ikiraro gifasha buri wese kubigeraho.

Uyu mugabo w’imyaka 45 y’amavuko akorera ibikorwa bye kuri hegitari zirenga 12, mu Kagari ka Gihembe, Umurenge wa Kageyo mu Karere ka Gicumbi. Imvaho Nshya yasuye ibikorwa bye.

Nk’uko yabidutangarije, mu mashuri yisumbuye yize ubuvuzi, muri kaminuza arahindura yiga ibijyanye n’amajyambere y’icyaro, mu kiciro cya gatatu cya kaminuza yiga gukora imishinga.

Ati: “Mu ishuri, twigeze kwiga ibijyanye n’ubworozi tuza kugera igihe dukora imyitozo tureba uburyo ubworozi buteza imbere umuntu, ni ho nafatiye ikemezo cyo gukora uwo mushinga.”

Umushinga w’ubworozi yawutangiye mu mwaka wa 2008. Ati “Natangiriye umushinga iwange buhoro buhoro mpereye ku nkoko z’imishwi 2000 zitanga amagi ndetse nza gushyiramo n’inkoko z’inyama ariko ndebye inyungu bimpa mbona birakomeye, bityo nza kugenda mbireka nza gushyiramo ingurube aba ari zo nitaho cyane”.

Akomeza asobanura ko ubutaka akoreraho ubuhinzi n’ubworozi bwe bwa hegitari 12 atari ubwo yahawe cyangwa yarazwe, ahubwo ngo ni we ubwe wagiye abugura n’abandi bantu.

Ati: “Ntangira natangiriye ku nguzanyo ku mushahara (Avance sur Salaire), mpera kuri miliyoni 5 na 500 ndazikoresha ndazishyura. Bongeye kumpa miliyoni 7 ndazishyura, noneho biba ngombwa ko njya kwaka umwenda muri Banki ya Kigali (BK)ari na ho ikigega BDF cyamfashije kuko byasabaga ko ingwate yiyongera”.

Yasabye miliyoni 30 barazimuha arishyura ariko ageze hagati biba ngombwa ko yagura ajyana umushinga we muri Banki y’Igihugu itsura Amajyambere (BRD) bamuha miliyoni 78.

Mu bworozi bwe yibanze ku ngurube za kijyambere, ariko akagira n’andi matungo kubera ko akenshi akunze kugira ibigo by’amashuri afitanye umubano na byo abana bakaza kwihugura.

Ati: “Mfite ihene nziza zo mu bwoko bwa Boa, intama za kijyambere n’inka zikamwa”.

AGIRA INAMA ABIFUZA KORORA BY’UMWUGA

Agira ati: “Ibanga mu bworozi ni ibintu bitatu. Niba ugiye kubyinjiramo bigemo ubikunze kandi ubishaka, ubihe umwanya kuko aho ujishe igisabo ntuhatera ibuye.

Bitandukanye na bwa bworozi bwa kera umuntu yavugaga ngo mvuka ibunaka mfiteyo amashyo y’inka, ugasanga ashobora kujya kuyasura rimwe mu mwaka cyangwa mu mezi atandatu, ntabwo ubworozi bwa kijyambere dukora ari ko bumeze”.

Ubworozi bw’inka na bwo bumufasha kubona ifumbire akoresha mu buhinzi

Inama ya kabiri atanga ni ukugira icyororo umuntu yizeye. Ati: “Niba ugiye korora inkoko kandi ushaka amagi ugomba gushaka inkoko itanga amagi, niba ari inyama ushaka ugashaka inkoko itanga inyama. Niba ari ingurube na bwo ushaka korora ingurube izatanga inyama uzashaka bwa bwoko butanga inyama”.

Mu ngurube ze usangamo igera ku mezi atandatu ifite ibiro ijana (100) agasobanura ko zitangana gutyo kubera gukoresha uburyo bwo kuzitubura ahubwo ko ari ubwoko bwazo bwororoka neza.

Avuga ko iyo umuntu ari gukora ubworozi bw’umwuga yirinda kwishyiraho ibintu byinshi. Yabaye agabanyije inkoko kubera ko yaje gusanga atari yabiteguye uko yabyifuzaga bityo aboneraho kuzamura ingurube.

Afite ingurube ziri hagati ya 600 na 700 ariko zigenda zihinduka kuko hari abantu baza kumugurira bafitanye amasezerano batwara utwana tw’ingurube turi hagati ya 100 na 150.

UMUSARURO W’UBWOROZI BWE

Mu kiganiro yagiranye n’Imvaho Nshya, Shirimpumu yagize ati “Ingurube igura amafaranga bitewe n’ibiro ifite cyangwa icyo igenewe, nge ntegurira abantu icyororo kuko sinorora ingurube zisanzwe, nzivana i Burayi. Iyo ingurube uyijyanye kuyorora, ikiro tukigurisha 3000 niba ifite ibiro 100 ni ukuvuga ko ari ibihumbi 300. Ariko niba ari ingurube yo kujya kurya, ikiro tukigurisha hagati ya 1200 na 1500. Ni ukuvuga ngo niba ifite ibiro 100 ari nk’inkone, ari isekurume cyangwa se irangije kubyara uzasanga iri hejuru ya 150 na 200.”

SHIRIMPUMU MU BUHINZI

Usibye ubworozi, Shirimpumu ni n’umuhinzi wabigize umwuga. Ati, “Mpinga ibihingwa 3, ibigori by’umuhondo ntubura kugira ngo bigere ku bantu benshi, ngahinga ibishyimbo bishingirirwa; nkorana n’umushinga bita Harvest Plus mu gutubura ibyo bishyimbo bikungahaye ku butare, ngahinga kandi n’ibirayi”.

Shirimpumu Jean Claude mu murima w’ibigori ahamya ko byamuteje imbere

Kugira ngo ubuhinzi butange umusaruro wifuzwa, avuga ko bisaba imbuto nziza, guhingira igihe, gukoresha ifumbire ku buryo bwateganyijwe yaba iy’imborera cyangwa imvaruganda.

Agira ati: “Ibintu byose bigomba gukorerwa ku gihe, niba igihe k’ibagara kigeze ntibikererwe kuko iyo ibyatsi bibaye byinshi bicura umwuka ibihingwa byawe, kandi no gusarura bigakorwa neza”.

Ntiyemeranya n’abavuga ko ubuhinzi butakigira amafaranga, cyane ko yemeye guhara akazi ka Leta kuko yabonaga ubuhinzi n’ubworozi ari bwo bwamugirira akamaro.

ASHIMIRA BYIMAZEYO BDF

Shirimpumu yatangiye yifuza ko imishinga ikomera igatera imbere ariko asanga ingwate banki zamubazaga zitamworoheye kuzibona, yiyambaza BDF.

Avuga ko yatewe ibyishimo no kwishingirwa na BDF ubwo yajyanaga umushinga we muri BK, akabasha kwishyura neza ubundi agatangira gukorana na BRD.

Shirimpumu avuga ko muri BRD yagezeyo asanga ikorana na BDF ku buryo inguzanyo ye yayishyuye neza kandi ibikorwa bye byateye imbere.

Ati: “Nahereye ku kiraro kimwe, icyo gihe nari mfite ibiraro birenga hafi ikenda. Ubu mfite ibyumba birenga 150 by’inkoko, ni cyo gituma mfite ingurube zirenga 600. Iyo umuturage aje ashaka kugira ngo mworoze ahasanga icyororo, ushaka izo kurya na bwo arazibona. Umushinga wange ubu ufite agaciro kari hagati ya miliyoni 150 na 200 z’amafaranga y’u Rwanda”.

Ubumenyi Shirimpumu yavanye mu ngendoshuri mu mahanga butuma ingurube ze zororoka cyane

Shirimpumu avuga ko aticuza kuba yarasezeye akazi ka Leta, kuko yaretse gukorera abandi none ubu ni umukoresha w’abakozi 12 bahoraho na 60 badahoraho.

Abajijwe amafaranga yinjiza ku kwezi, yavuze ko yinjiza nka miliyoni eshatu, agahemba abakozi asagaho gato miliyoni, na we agasigarana abarirwa hagati ya miliyoni imwe n’igice n’ebyiri.

Korora yatangiye bimugora nta n’ubumenyi buhagije abifiteho, ariko ubu yabereye benshi umwarimu w’ibijyanye n’ubworozi bw’ingurube.

Ati: “Natangiye bingora ariko abantu baza batugana tubasha kubaha amakuru afatika arimo ubumenyi. Twashyizemo ikiciro cyo kwigisha abashumba. Umuntu uza atugana tumuha ubumenyi bw’uko umushinga waramba akazana n’umuntu tumuhugurira yarangiza tukamuha impamyabushobozi. Ikindi twatangiye gukora ibitabo byigisha ibijyanye n’ubworozi bw’ingurube. Dufite igitabo twasohoye, ari uwabikoraga akanoza umwuga cyangwa ugiye gutangira akagira icyo akora.”

SHIRIMPUMU ARASHAKA GUTERA IMBERE BIRUSEHO

Shirimpumu arashaka kwagura cyane umushinga we yifashishije ubumenyi yavanye mu ngendoshuri z’abahinzi-borozi yakoreye mu bihugu byateye imbere ku mugabane w’u Burayi.

Ati: “Nabashije gusura aborozi bo mu Bubiligi, mu Bufaransa no mu Buholandi ndeba aho bageze, nange numva mu kerekezo mfite ari uko nagira umushinga wagutse ku rwego rw’Akarere ku buryo ibihugu by’abaturanyi byajya biza mu gihugu cyacu bije gushaka icyororo”.

INAMA ATANGA KURI BAGENZI BE

Asaba bagenzi be gukora cyane bakagira ingurube nyinshi kandi zujuje ubuziranenge kuko isoko ry’imbere mu gihugu, mu karere u Rwanda rurimo rikeneye inyama nyinshi.

Ati: “Buriya ku isi, mu bakungu ba mbere harimo abahinzi, usibye twebwe wenda twabyitiriwe abandi bakavuga ngo ni amahirwe, aho nasuye nasanze abahinzi batarenga 10%. Umuhinzi aba ari umwe agahingira abantu benshi abandi bakaba bari mu bindi mu gihe twebwe tuba tuvuga ngo abahinzi bagera kuri 80% ariko ntacyo bakora”.

Shirimpumu asanga uko abari mu buhinzi n’ubworozi bazagenda babikora by’umwuga hari abazagenda bagabanyuka hanyuma umwe agire urwuri runini.

Ati:“Nk’ubu mba mvuga nti uwampa byibuze nkagira nk’ingurube hafi 5000, nibura buri cyumweru nkajya nshyira ingurube hafi 500 ku isoko, noneho hakaba hari n’undi mu burengerazuba, mu burasirazuba, amajyaruguru n’amajyepfo umeze utyo. Icyo gihe wa wundi wa kamwe kamwe azabona ko nta cyo ari gukora, wenda ahinge ibyo twakenera ngo ingurube zacu zirye na we abone amafaranga”.

Yifuza ko aborozi bagenzi be baharanira kuba abanyamwuga mu rwego rwo gufasha uzaba yifuza ingurube y’icyororo kumenya aho ayishakira, ushaka iy’inyama na we amenye umworozi ayibarizaho.

Ati: “Mu buhinzi na ho uko gahunda ya Leta yo guhuza ubutaka igenda ishyirwa mu bikorwa ni ko izafasha aborozi kubonera amatungo ibyo kurya natwe tubagurire”.

Ibyo kandi yumva bitanga ikizere ko bizanafasha abafite ibyumba bisya ibiryo na bo bakagurirwa n’abo borozi b’amatungo.

Igihe habayeho kororoka agemurira amasoko

TANGA IGITEKEREZO

3 Comments on “Uko Shirimpumu yaretse akazi ka Leta akorora ingurube abifashijwemo na BDF”

  1. Nta email yiwe twabona cyangwa WhatsApp number kuko nkatwe tutari mu rwanda bya tugora kumuhamagara!!kuko nanyuzwe

Leave a Reply

Your email address will not be published. Required fields are marked *