22°C , Mostly cloudy | Kigali-Rwanda

Uko RSB yafunguriye isoko mpuzamahanga abacuruzi b’ibiribwa mu Rwanda

Yanditswe na NTAWITONDA JEAN CLAUDE

Ku ya May 16, 2018 saa 4:30

Ese kuba Ikigo k’Igihugu Gitsura Ubuziranenge (RSB) cyarahawe ibyemezo  mpuzamahanga bihamya ubushobozi n’imikorere myiza bya serivisi bituma gitanga ibirango by’ubuziranenge bw’ibiribwa, kandi zifite agaciro ku rwego mpuzamahanga bivuze iki ku nganda zikomeje kwiyongera mu Rwanda no ku bacuruzi bohereza ibiribwa mu mahanga?

Ubwo Umuyobozi wa RSB Murenzi Raymond, yashyikirizwaga Ikemezo k’ibirango mpuzamahanga by’ubuziranenge bw’ibiribwa mu mwaka ushize

Ibyemezo by’ubuziranenge byatanzwe n’Ikigo mpuzamahanga cyo mu Buholandi (RvA) tariki 26 Ukwakira 2017, ni icy’imikorere myiza no guhamya ubushobozi mu gutanga ibirango by’ubuziranenge ku bafite serivisi zo gutunganya ibiribwa zirimo kugenzura no kurwanya ibyakwangiza ibiribwa (Hazard Analysis and Critical Control Points/HACCP) n’izo kubungabunga umutekano w’ibiribwa (Food Safety Management Systems/ FSMS).

Mu kiganiro Imvaho Nshya yagiranye n’Umuyobozi Mukuru wa RSB Bwana Murenzi Raymond, yasobanuye uburyo Abanyarwanda batangiye kwitabira kubyaza aya mahirwe umusaruro, n’ingamba Leta y’u Rwanda ifite mu gufasha inganda ziganjemo into n’iziciriritse kugera ku rwego mpuzamahanga zujuje ibisabwa.

Yagize ati :“Ibi byemezo byatwongereye ikizere kuri serivisi dutanga.  Niba twari dusanzwe duha ikigo serivisi runaka cyagera i Burayi bakakibwira bati ‘zinga utwawe udusubize i Kigali ntabwo tubyemera’, uyu munsi kuva twarabonye iki cyangombwa turakubwira tuti ‘iyi serivisi tuguhaye uretse gukora mu Rwanda no mu karere, uzagera no ku Isi yose.”

Mu gihe u Rwanda rwashyize imbaraga mu kwakira inama, RSB ishyize imbaraga mu buziranenge bwa serivisi n’ibigaburwa mu mahoteli

Bwana Murenzi akomeza avuga ko batangiye kubona Abanyarwanda babagana baretse kujya gushaka ibirango by’ubuziranenge mu mahanga byabahendaga cyane mu gutumiza no kwakira impuguke zimara igihe kirekire zikora ubushakshatsi mbere yo guhabwa ibirango.

Akomeza agira ati “Hari ibigo bikomeye mu Rwanda byari bifite umutwaro wo kwishyura ibyo biciro kubera ko byari bisanzwe bihendwa. Uyu munsi byaje guhabwa serivisi muri RSB; ikompanyi nibuka ni eshatu ariko hari  n’izindi tukiganira na zo.”

Ibi ngo biratanga ikizere ko akayabo Abanyarwanda batangaga bashaka ibirango by’ibigo by’abanyamahanga bazajya bayakoresha mu kwagura ishoramari mu gihugu ndetse no hanze yacyo.

Ibyemezo by’ubuziranenge ku biribwa bifite impamvu

Bwana Murenzi avuga ko ubushakashatsi bwa RSB bwagaragaje ko hakenewe ingufu nyinshi z’ubuziranenge mu gutunganya ibiribwa  no kubicuruza kubera impamvu z’umutekano w’ibiribwa ku Banyarwanda n’abagenderera igihugu bakakirwa mu mahoteli cyane ko n’inganda zitunganya ibiribwa zigenda ziyongera umunsi ku munsi mu gihugu.

Ati : “Mu bijyanye n’ibiribwa ni ho twabonye ko inganda nto n’iziciriritse zibarirwa ku kigero cya 80%. Ikindi ubu turimo turinjira muri serivisi aho igihugu gifite icyerekezo cyo guteza imbere ubukerarugendo bushingiye ku nama (MICE) hakirwa inama mpuzamahanga; abanyamahanga bakirwa mu mahoteli bakwiye guhabwa amafunguro na serivisi byemewe ku rwego mpuzamahanga kandi bitabagiraho ingaruka.”

RSB, mu cyerekezo cyo gutanga serivisi zemewe ku rwego mpuzamahanga, yamaze guhabwa icyemezo mpuzamahanga ku mikorere na serivisi nziza ndetse ikaba ishishikajwe no gufasha mu kuzamura urwego rwa serivisi mu gihugu itanga ibirango byemewe ku rwego mpuzamahanga ku  bigo biri mu rwego rwa serivisi cyane cyane iz’icungamutungo, ibigo bya Leta n’iby’abikorera hagamijwe gufasha Guverinoma y’u Rwanda kugera ku ntego yo kuba intangarugero mu kubaka ubukungu burambye.

Inganda zikomeye zanyuzwe na serivisi nshya za RSB

Ubuhamya bwa bamwe mu bacuruzi nyarwanda bohereza ibicuruzwa by’ibiribwa mu mahanga barishimira icyizere u Rwanda rukomeje kugirirwa mu ruhando mpuzamahanga.

Claudine S. Ngutete, Umuyobozi ushinzwe ubuziranenge mu ruganda Inyange Industries, yagize ati :“Kumenya ko RSB yahawe ibyemezo byo ku rwego mpuzamahanga bihamya ubushobozi n’imikorere myiza  y’inganda n’ibigo bitunganya ibiribwa  yari amakuru meza kuri twe. Twajyaga duhabwa ibirango ku bicuruzwa na RSB ariko iby’imikorere tukabihabwa n’Ikigo cy’abanyamahanga, ariko nyuma yo kumenya aya makuru twasabye guhabwa iyo serivisi na RSB.”

Inganda zikora ibiribwa n’ibinyobwa zungutse amahirwe yo kubona ikemeze kiziha ikizere mpuzamahanga_1

Angélique Karekezi Umuyobozi wa RWASHOSCCO Ltd nawe ati: “Kubona ikirango mpuzamahanga cy’ubuziranenge bw’ikawa yacu ni ingenzi cyane kuko biyongerera icyizere ku bakiriya bacu mu Rwanda no mu mahanga. Ibirango by’ubuziranenge bw’ibiribwa bitangwa na RSB biraduhamiriza ko twujuje ibisabwa ku rwego mpuzamahanga kuko ni urwego rwamaze kwemezwa n’ikigo gikomeye.”

Emile Nsanzabaganwa Umuyobozi Mukuru wa Kinazi Cassava Plant na we ati “Inshuro nyinshi abakiriya bajyaga batubaza ku kigo gishinzwe ubuziranenge mu gihugu cyacu, niba serivisi zacyo zaramaze kwemezwa ku rwego mpuzamahanga, tukabasobanurira ko ikigo gihari kandi cyiyemeje kwibanda ku bwiza bw’ibicuruzwa ariko ntibanyurwe bakavuga ko hakwiye kwiyongeraho ko servisi za cyo ziba zemewe ku rwego mpuzamahanga. Ubu noneho biboneye gihamya ko ubushobozi bwa RSB bwo gutanga ibirango ku batunganya ibiribwa bwamaze kwemezwa ku rwego mpuzamahanga…”

RSB irasaba Abanyarwanda guhindura imyumvire ku buryo ubucuruzi bwose burimo n’ubuciriritse bwubahiriza amabwiriza mpuzamahanga, ari na yo mpamvu yatangije gahunda ya “Zamukana Ubuziranenge” igamije gushyigikira iterambere ry’inganda nto n’iziciriritse (SMEs) by’umwihariko iz’abagore, urubyiruko n’abafite ubumuga.

Inganda nto n’iziciriritse zatangiye kongererwa ubushobozi muri iyi gahunda ya Zamukana Ubuziranenge, zihugurwa kandi zigaherekezwa mu rugendo rw’iterambere mu buziranenge; ndetse zinahabwa abanyeshuri barangije kwiga ibijyanye n’ubumenyi mu gutunganya ibiribwa (Food Science) bahuguwe ku mabwiriza y’ubuziranenge kugira ngo bazifashe kugendana n’iterambere mpuzamahanga.