26°C , Partly sunny | Kigali-Rwanda
Umuhanzi Jembe Kali

 Uko Jembe Kali akomora ubuhanzi mu muryango we

Yanditswe na NDAMYIROKOYE FRANÇOIS

Ku ya 11-07-2018 saa 06:58:07

 Audace Niyokwizera ukoresha mu buhanzi izina rya Jembe Kali akaba ari umuhanzi ukomoka mu Burundi ariko uba mu Rwanda uvuga ko yatangiye ubuhanzi mu 2013 ubwo yasohoraga indirimbo ye ya mbere avuga ko kwinjira mu buhanzi kwe byaturutse ku kuba n’ababyeyi be barahoze ari abaririmbyi muri korali zitandukanye.

Umuhanzi Jembe Kali

Avuga kandi ko na we yakuriye muri korali amaze kumenya ubwenge yiyemeza guhimba ibihangano bye. Nubwo kandi mu muryango we baririmbaga avuga ko nta wundi muntu mu muryango we wari waragize igitekerezo cyo kujya mu nzu itunganyisha umuziki gukoresha indirimbo.

Yagize ati “Mu bwana bwange  naririmbaga muri korali maze gukura niyemeza kuzajya mpimba ibihangano nkaba umuhanzi ku giti cyange”.

Kuva yatangira ubuhanzi Jembe Kali avuga ko amaze kugira indirimbo enye ngo ariko imwe muri zo  ni  yo  arimo gutegurira gukora amashusho.

Kuba yaraje kuba mu Rwanda kubera ibibazo by’umutekano muke biri iwabo  mu Burundi avuga ko byamusubije inyuma ngo ariko kuva aho yagereye mu  Rwanda yatangiye kwisuganya  akaba ari yo mpamvu akomeje gukorana ingufu ubuhanzi bwe.

Nubwo akorera ubuhanzi bwe mu Rwanda avuga yifuza ko umuziki  we n’i Burundi wazajya ugerayo.

Indirimbo ze avuga ko ziba zikubiyemo ubutumwa butandukanye ngo ariko akunda by’umwihariko  kwibanda ku kuririmba ku rukundo.

Kugira ngo azabashe gutera imbere avuga ko azajya akurikiza inama nziza abantu batandukanye bazajya bamuha.

Ku rundi ruhande kandi avuga ko ateganya kuzakorana indirimbo n’abandi bahanzi by’umwihariko abo mu Rwanda dore ko avuga ko  yabonye bafite ubuhanga mu kuririmba.

Indirimbo nshya ye avuga ko iririmbye mu ndimi zitandukanye zirimo n’Igiswayile

Asaba abantu kandi kumushyigikira kugira ngo umuziki we utere imbere ugere ku rwego rushimishije.

 

TANGA IGITEKEREZO

Leave a Reply

Your email address will not be published. Required fields are marked *