17°C , Partly cloudy | Kigali-Rwanda
Yasser Gammari uhagarariye Banki y’Isi mu Rwanda

Uhagarariye Banki y’Isi yagaragaje ko Politiki y’u Rwanda idaheza

Yanditswe na Twagira Wilson

Ku ya 23-04-2019 saa 17:26:08

Yasser Gammari uhagarariye Banki y’Isi mu Rwanda, yatangaje ko kuba mu Rwanda hateraniye inama ibihugu bisaga 15 byigira ku mahitamo y’u Rwanda y’ubudaheza ari uko rwashyize imbere politiki yo kudaheza.

Iyo nama yateguwe na Banki y’Isi ku bufatanye n’Ishami ry’Umuryango w’Abibumbye rishinzwe iterambere UNDP, yitabiriwe n’ibihugu 15.

Yasser yagize ati “Kuri ubu impamvu iyi nama ibera mu Rwanda bigaragaza kuba rwarabaye urugero mu gushyira imbere politiki yo kudaheza Abanyarwanda, kubera ko ubuyobozi bubi bwa mbere ya Jenoside bwimakaje politiki y’amacakubiri mu baturage bikaba byarabaye intandaro ya Jenoside yakorewe Abatutsi mu 1994. Ariko kuri ubu ibihugu biza kwigira ku Rwanda politiki yo kudaheza.”

Steven Rodrigues uhagarariye UNDP,  we asanga igituma u Rwanda rugenda rugera ku ntego z’iterambere ari uko rwashyize imbere politiki y’imiyoborere myiza, na gahunda yo kudaheza mu banyarwanda, aho buri wese yibona agahabwa amahirwe agenerwa buri Munyarwanda nta kiciro cyangwa nta n’umwe usigaye inyuma.

Minisitiri w’Ubutegetsi bw’Igihugu Prof. Shyaka Anastase, avuga ko Abanyarwanda bagize amahitamo ashingiye ku guteza imbere no kwimakaza politiki yo kudaheza igashyira imbere kubana mu mahoro n’umutekano, ari na byo bigejeje igihugu ku iterambere.

Prof. Shyaka ati “Nyuma y’imyaka 25 habaye Jenoside, u Rwanda rurishimira ubumwe bwagezweho, politiki yo kudaheza ubu ni yo ntego iranga Abanyarwanda. Ni amahitamo yacu ko politiki y’ubudaheza ishyirwa muri za gahunda zitandukanye nko guha umwanya n’ijambo ibyiciro bitandukanye nk’iby’abagore, urubyiruko, abafite ubumuga, n’abandi bose bagatanga umusanzu mu byubaka igihugu. Ni yo mpamvu ibihugu bisaga 15 byaje kwiga uburyo u Rwanda rwashyize mu bikorwa politiki yo kudaheza.”

Iyo nama yitabiriwe n’ibihugu bisaga 15 biturutse hirya no hino muri Afurika. Harimo kandi Komisiyo y’Igihugu y’Uburenganzira bwa muntu na Komisiyo y’Ubumwe n’Ubwiyunge.

TANGA IGITEKEREZO

Leave a Reply

Your email address will not be published. Required fields are marked *