17°C , Partly cloudy | Kigali-Rwanda
Ufite ubumuga bwo kutabona aranenga abarwanira ikiciro cya mbere cy’ubudehe

Ufite ubumuga bwo kutabona aranenga abarwanira ikiciro cya mbere cy’Ubudehe

Yanditswe na Rutayisire Emile

Ku ya 15-03-2019 saa 13:52:23

Nyankiko Pierre afite ubumuga bwo kutabona ariko ntabwo yiyumvisha kuba hari abantu bafite ingingo zose, barwanira kujya mu kiciro cya mbere cy’ubudehe.

Asobanura ko bene abo babera umuzigo Leta wo kubafasha harimo kubarihira mituweri n’ibindi.

Uyu mugabo wavutse mu 1977 akavukira mu Karere ka Gisagara, i Kansi afite umugore nawe utabona witwa Mukanziza Venancie umaze kurangiza ikiciro cya gatatu cya kaminuza( Masters).

Nyankiko na Mukanziza bafitanye abana 4.

Nyankiko n’umugore we Mukanziza n’abana babo abandi 2 bakuru bari ku ishuri

Yaje i Kigali amaze kubura ababyeyi be bombi mu 1995, aza asabiriza ariko akumva bitamushimishije.

Amaze kubona ibihumbi 5 yatangiye gucuruza ikarito areka gusabiriza.

Yaje kubona umugiraneza amufasha kwiga umwaka wa nyuma w’amashuri abanza ndetse atsindira no kujya mu mashuri yisumbuye ariko mu biruhuko agacuruza ikarito aza kurangiza mu 2003.

Hagati aho mu 1998 yegereye ubuyobozi maze MINALOC imutuza Kimironko ari naho atuye kugeza ubu.

Inyota yo kwiteza imbere yamubagamo ku buryo mu 2004 yagiye kwiga ubugororangingo (Phyisiotherapy) arangije ashinga ivuriro i Kigali ahitwa Kabeza.

Ntiyabonye abakiriya kuko abantu batumvaga ko ashobora kubavura kubera imyumvire bafite arabihagarika.

Mu 2007 yashatse akazi aza kumenyana n’umuzungukazi Nicole Pigeot uzi imibereho y’abatabona amuha akazi mu kigo Centre Cesar kiri Kimironko, akora ibyo yize byo kugorora ingingo.

Mu 2013 ni bwo yafashe ikemezo cyo kwikorera aba rwiyemezamirimo, ashinga Sosiyete PNYA Ldt ifasha urubyiruko rufite ubumuga n’abatabufite bagatwara abantu n’ibintu ku magare.

Kugeza ubu PNYA Ltd ikorera Kimironko, Bumbogo, Nyamata na Huye.

Amaze guha akazi abagera kuri 300.

Umwe mu bakora akazi ko gutwara abantu n’ibintu ku igare, Rwabukumba Aaron avuga ko amaze gutera imbere abikesha Nyankiko wamugurije amafaranga agura igare kandi gukorera muri Sosiyete ye bikaba byaratumye agira gahunda y’imikorere itari mu kajagari.

Agira ati, “Sosiyete ifite abashinzwe umutekano ku buryo imyitwarire y’abanyonzi icungirwa hafi”.

Usibye intego yo gukorera mu gihugu hose, agafasha abadafite amazu kubona aho baba bahenzwe nk’uko ashaka kubaka Masaka na Bumbogo, Nyankiko avuga ko inzozi asigaranye ari ukuzahura na Perezida Kagame.

Aragira ati, “Nzishima ninkora mu kiganza cy’umuntu udasanzwe, Perezida Kagame, uyoborana ubushishozi kandi uharanira ko hatagira usigara inyuma. Mubonye namushimira amahoro yaduhaye kuko aho tugeze niwe”.

Akomeza asaba abamugaye kwirinda gukomeza kumva ko bagomba gufashwa ahubwo bakiyakira bagakora kuko mu isi ari amarushanwa akagira ati, “Leta y’u Rwanda yaduhaye amahirwe menshi yo gukora mwiyapfusha ubusa”.

Yaboneyeho kwibutsa abagifite imyumvire mike ku bamugaye kureka kubaheza mu kazi kuko nabo bashoboye.

Ufite ubumuga bwo kutabona aranenga abarwanira ikiciro cya mbere cy’ubudehe

Nyankiko n’umugore we Mukanziza n’abana babo abandi 2 bakuru bari ku ishuri

TANGA IGITEKEREZO

Leave a Reply

Your email address will not be published. Required fields are marked *