23°C , Intermittent clouds | Kigali-Rwanda

Udashoye nta cyo wageraho – Kagame

Yanditswe na Twagira Wilson

Ku ya 08-12-2019 saa 15:36:15
Perezida Kagame yasabye urubyiruko gukora bashishikaye kugira ngo biteze imbere n'igihugu muri rusange

Perezida Paul Kagame yabwiye urubyiruko ko nta cyo rwageraho rudashoye kuko ibintu bidashobora kwizana ubwabyo, abibutsa ko  kugira ngo bagire icyo bageraho  ibyo ari byo byose bagomba gukora ishoramari haba  umwanya, amafaranga, ndetse rimwe na rimwe bakarara amajoro badasinziriye.

Ibyo bikubiye mu butumwa Umukuru w’Igihugu yatangiye i Kigali, kuwa Gatandatu tariki ya 7 Ukuboza 2019, ubwo yari kumwe na Madamu Jeannette Kagame, n’umushoramari ukomeye akaba n’inshuti y’u Rwanda Strive Mayisiwa watangije sosiyete y’itumanaho, ‘Econet Wireless’.

Mu butumwa Perezida Kagame yagejeje ku rubyiruko rusaga magana atanu rurimo ba rwiyemezamirimo bakiri bato, abanyeshuri muri za kaminuza, na bamwe mu bakozi  mu nzego za Leta, ibiganiro byibanze kuri gahunda zo kwihangira akazi ‘Youth Entrepreneurship Town Hall’.

Ati “Nta na kimwe gishobora kwizana nta cyo mushoye,  ntimuzatekereze ko ibyiza bishobora kwizana ubwabyo mugomba gushora umwanya, amafaranga, ndetse rimwe na rimwe mukarara n’amajoro mutagohetse.’’

Ku birebana n’amahirwe urubyiruko rushobora kubyaza umusaruro, Perezida Kagame yakomeje abwira urubyiruko ko bafite amahirwe bashobora kubyaza umusaruro, ko muri ibi bihe ari ugushishikarira kurushaho kuyabyaza umusaruro, rukihangira imirimo kuko ari bwo bashobora kugira uruhare no gutanga umusanzu wo guteza imbere aho batuye.

Agaruka ku byakozwe n’u Rwanda mu guteza imbere urwego rw’ishoramari Perezida Kagame yabwiye urubyiruko ko u Rwanda rwafashe ikemezo cyo gushyiraho ikigega k’ishoramari  mu birebana n’udushya  (Innovation fund).

Ati “Icyo twifuza ni ugukora ishoramai mu gushyiraho udushya no gushora mu bikorwa byo kwihangira imirimo.”

Asobanura ibyakozwe n’u Rwanda mu kongerera ubushobozi inzego z’abagore, Umukuru w’Igihugu avuga ko u Rwanda rutashoye imari mu bagore gusa ahubwo ko rwakoze ibishoboka rushora imari mu baturage barwo barimo urubyiruko rw’abagore n’abagabo bakiri bato.

Ati: Twafashije guteza imbere abagore kuko tutifuzaga ko basigara inyuma, ahubwo twaravuze ngo oya nta bwo bagomba gusigara inyuma, ahubwo ko bagomba kuba ku rwego rumwe na basaza babo muri sosiyete kandi byarashobotse.’’

Strive Masiyiwa yashimye u Rwanda kubera  intambwe rwateye mu guha urubuga  no korohereza ba rwiyemezamirimo biganjemo urubyiruko gukora no gushora imari mu Rwanda, ashima  ba rwiyezamirimo bakiri bato barimo uwitwa Kwizera Christela watangije umushinga w’ikoranabuhanga wafashije kwegereza amazi meza abaturage, icyakora asaba ko abakora imishinga bakabaye batekereza no kuzirikana kujyana imishinga yabo mu cyaro batibanze mu migi gusa.

Kwizera watangije umushinga   witwa  ‘Water Access Rwanda’ ndetse na Kagirimpundu Kevine watangije sosiyete Uzuri mu buhamya bwabo babwiye Umukuru w’Igihugu n’abandi bagenzi babo  urugendo rutoroshye banyuzemo bihangira akazi kandi batangije igishoro kitari kinini, none ubu bakaba bari muri ba rwiyemezamirimo banini, aho Kwizera yahaye akazi abantu 65.

Umuyobozi Mukuru wa “Econet Wireless’, mu butumwa bwe, Strive yakomeje abwira urubyiruko ko kugira ngo kwihangira imirimo bigerweho ari ngombwa ko bagana amashuri ubwo bumenyi babukoreshe kandi bibe umuco bateze imbere aho bakomoka.

Ati: “Iyaba byari ibishoboka urubyiruko rwose rw’Afurika rwaba ba rwiyemezamirimo.”

Yongeyeho ati “Nta bwo ari  ngombwa  ko buri wese yabona akazi muri Leta, hari ubundi buryo watangamo uruhare rwawe mu guteza imbere aho ukomoka. Ikindi kwihangira imirimo nta bwo ari ugukorera amafaranga gusa ni umuco uganisha kwikorera no kuba rwiyemezamirimo kandi bigashoboka buri wese akagira iyo myumvire.’’

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.