19°C , Mostly cloudy | Kigali-Rwanda
Umuyobozi ucyuye igihe wa PSF, Gasamagera Wellars iburyo, ahererekanya ububasha na Bapfakulera Robert, umuyobozi mushya wa PSF

Ubwitange no gukorera hamwe ni yo ntego y’ubuyobozi bushya bwa PSF

Yanditswe na RUTAYISIRE EMILE

Ku ya 13-03-2018 saa 06:53:02

Ubwitange no gukorera hamwe bagamije inyungu, biri mu ntego ubuyobozi bushya bw’Urugaga rw’abikorera, PSF, bushyize imbere kubera ko ari bwo buryo buzatuma abikorera batera imbere bagateza imbere igihugu.

Umuyobozi ucyuye igihe wa PSF, Gasamagera Wellars iburyo, ahererekanya ububasha na Bapfakulera Robert, umuyobozi mushya wa PSF

Kuri uyu wa Mbere tariki ya 12/3/2018 ni bwo habaye umuhango w’ihererekanyabubasha hagati y’uwayoboraga PSF (Chairman), Gasamagera Wellars, urangije manda y’imyaka 3 na Bafakulera Robert watorewe kuyobora PSF muri uyu mwaka wa 2018 muri manda nshya y’imyaka 3. Umuhango ukaba warabereye muri Hotel La Palisse-Nyamata mu Karere ka Bugesera.

Nyuma yo guhererekanya ububasha, Gasamagera wari umaze gushyikiriza Bafakulera amadosiye y’ibyo bakoraga naho bari babigejeje, yasabye ubuyobozi bushya gukorana ubwitange nk’uko komite icyuye igihe yabikoraga, abizeza ko komite icyuye igihe izakomeza kubaba hafi kugira ngo inshingano bafite zigerweho.

Mu ijambo rya Bafakulera yavuze, akaba yarasabye abacuruzi gukora ubucuruzi bwunguka, kandi ko kugira ngo ibyo bigerweho bisaba gukorera hamwe, bakarebera hamwe ibibazo bibabangamiye bakabikemura kandi ibibananiye bakegera inzego za Leta zikabafasha.

Bafakulera yagize ati “Hari gahunda usanga Leta yarashyizeho zigamije guteza ubukungu imbere. Niba dushaka kunguka koko, dushyire hamwe, twumve ibintu kimwe, aho tugize ikibazo kidukomereye twegere izo nzego zidufashe gukemura ibyo bibazo bitubuza kunguka”.

Umunyamabanga Uhoraho muri Minisiteri y’Ubucuruzi n’Inganda, Michel Sebera wari uhagarariye Minisitiri, yasabye abacuruzi kwita cyane ku bikorerwa mu Rwanda (Made in Rwanda), bakabinoza, bakitabira imurikagurisha mu bindi bihugu, bagaragaza ibyo bakora ku buryo bagura amasoko, bajyana ibicuruzwa bikorerwa mu Rwanda mu bihugu by’Afurika ndetse n’ahandi.

TANGA IGITEKEREZO

Leave a Reply

Your email address will not be published. Required fields are marked *