22°C , Mostly cloudy | Kigali-Rwanda
Isuku y’amata igomba kwitabwaho kugeza igihe anywerewe

Ubuziranenge bw’amata buhera ku mworozi kugera ku ikusanyirizo

Yanditswe na MUKAGAHIZI ROSE

Ku ya 13-06-2018 saa 05:28:15

Amata ni ikinyobwa kiza, kiryoha gikungahaye ku ntungamubiri. Kuri ubu, bitewe n’iterambere ry’Isi, u Rwanda rushyize imbere kuvugurura ubworozi   kugira ngo abaturarwanda bagere ku musaruro mwiza ushimishije wo gutunga abantu ariko bakanabonamo amafaranga nkuko bisobanurwa na Dr Nyirazikwiye Euphrasie, ushinzwe ishami ry’ubugenzuzi n’ubuziranenge ku bikomoka ku buhinzi n’ubworozi muri Minisiteri y’Ubuhinzi n’Ubworozi. Avuga ko kugira ngo amata abe afite isuku aba yujuje ibyangombwa, icuruzwa ryayo na ryo hari icyo risaba.

Isuku y’amata igomba kwitabwaho kugeza igihe anywerewe

Dr Nyirazikwiye Euphrasie, ushinzwe ishami ry’ubugenzuzi n’ubuziranenge ku bikomoka ku buhinzi n’ubworozi muri Minisiteri y’Ubuhinzi n’Ubworozi agaruka  ku buziranenge bw’amata ahereye ku  mukamyi, agaruka no ku bugenzuzi bukorwa n’isuzuma riba rihari kugira ngo umukamyi cyangwa se umworozi  amenye ko amata ye agiye kugemurwa ku ikusanyirizo yizeye ko ari bwakirwe.

Yagize ati “Mu ruhererekane rwose rw’amata hari ibisabwa kuva ku mworozi, umukamyi agomba kuba afite isuku, agakamira mu cyansi cyogeje neza, kandi cyumukije, inka bakama nayo igomba kuba ifite isuku, ikabanza kozwa icebe neza n’amazi y’akazuyazi kandi bakumutsa iryo cebe n’agatambaro gafite isuku, umworozi agomba kuyatereka ahantu heza hafite isuku, mu gihe atarayagemura, kandi agomba gukama inka itarwaye, amata meza ni ay’inka yakamwe nyuma y’iminsi 7 ibyaye kubera ko mbere y’iyo minsi amata aba yitwa umuhondo ayo ni ay’inyana”.

Byongeye kandi, ngo ukama agomba kuba atarwaye indwara zirimo impiswi, tifoyide cyangwa hepatite kandi agakamira mu cyansi gifite isuku kuko nyuma y’ibi, iyo ayajyanye ku ikusanyirizo ari bwo aba yizeye neza ko bari buyakire.

Ku ikusanyirizo ngo abakira amata baba bagomba kuyasuzuma ubuziranenge,  bayareba ibara bakayihumuriza, bagapima antibiotic, udukoko tw’ifumbi, nyuma bayashyira mu cyansi gikonjesha kigomba kuba gifite isuku. Abantu bakira amata ku ikusanyirizo na bo ngo bagomba kuba bafite isuku kandi badafite uburwayi bw’impiswi, tifoyide, hepatite n’izindi ndwara zishobora kwanduza amata kandi bambaye imyambaro yabugenewe kandi baba bagomba kwitwararika ku buryo ayo mata agomba kuguma ku gipimo cy’ubushyuhe buri hasi ya kane 4  kugeza igihe bategereje ko uyatwara ayajyanye ku ruganda cyangwa bagiye kuyacuruza  babungabunze ubwo buziranenge.

Kuri ubu,  ngo hari imodoka zabugenewe zikonjesha amata  hagati ya 0 na 4 kuko ari byo byiza  kandi  utwara iyo modoka aba afite ibyangombwa bimwemerera gutwara ayo mata, abayagemura kuri kiyosike no muri mazu agurishirizwamo ibyo kurya (alimentation)  na bo bagomba kuba bafite ibyangombwa bibemerera gutwara ayo mata  kandi bakayatwara vuba byihuse bitarenze amasaha abiri. Uyagura aba agomba kuyapima ubuziranenge kubera ko ngo rimwe na rimwe umuntu utari inyangamugayo yongeramo amazi cyangwa amafu.

Muri rusange, buri wese ngo aba agomba kumva ko agomba gusigasira ubuziranenge bw’amata kubera ko mikorobi zikunda amata cyane. Umuntu wese ucuruza amata kandi ngo agomba kuba yarayakuye ku ikusanyirizo kandi afite icyangombwa kigaragaza ikusanyirizo yayakuyeho n’ibipimo bapimye n’ingano y’ayo mata bityo  bigafasha kugenzura niba mu nzira nta kintu bongeyemo.

Dr Ngarambe Michel, umukozi muri ‘Rwanda Dairy Development’, yagarutse ku mategeko agenga ibijyanye n’ubuzima bw’amatungo. Yagize ati “Dufite amategeko mu gihugu cyacu agenga ibijyanye n’ubuzima bw’amatungo ariko by’umwihariko amata. Hari iteka rya Minisitiri ryasohotse mu igazeti ya Leta tariki 10 Gashyantare 2016 rigena uburyo bwo gukusanya amata, kuyatwara no kuyacuruza, dufite iryo teka rya Minisitiri w’Ubuhinzi n’Ubworozi rigena uburyo bwo gukusanya amata, kuyatwara no kuyacuruza, ni ryo tugenderaho uyu munsi,  ibijyanye byose n’amata yemerewe gucuruzwa bikubiye muri iryo teka”.

Uko amata ajyanwa ku isoko agomba kuba ameze

Dr Ngarambe Michel akomeza yungamo ati “Amata yemewe kujya ku isoko gucuruzwa ni amata ameze ate? Amata meza ni ibiki aba yujuje kugira ngo amata tuvuge ko ari meza?  Hari ibintu by’ingenzi bisuzumwa ni ukuvuga ko iyo amata ari meza ibintu bisuzumwa by’ingenzi ni bine ku makusanyirizo y’amata. Muri byo, icya mbere ni ukwitegereza no kwihumuriza: iyo amata ageze ku ikusanyirizo aba ari mu bicuba bipfundikiye, ikintu cya mbere umukozi wo ku ikusanyirizo akora, arapfundura, akihumuriza, yamara kwihumuriza akareba n’ishusho”.

Yakomeje atangaza ko burya amata agira impumuro yihariye yayo, iyo impumuro y’amata yashyizwe mu kintu kitameze neza ushobora gusanga afite impumuro ya peterori cyangwa se y’amavuta cyangwa indi mpumuro idasanzwe. Iyo mpumuro iyo uyumvise ayo mata nta bwo aba ari meza kuko amata afata impumuro y’ikintu wayashyizemo, noneho ukareba n’ibara ryayo, uko asa, amata agira ibara burya ryiza ryayo, iyo umaze kwihumuriza no kwitegereza, ikindi ureba ni ugupima ko hatongewemo ireme bwite ry’amata, ibyo na byo barapima hari agakoresho kabugenewe bashyira mu mata hari ibipimo bizwi, wasanga amata yujuje ibyo bipimo akaba ari meza. Iyo wongeyemo amazi urafatwa cyangwa se waba washyizemo ikindi kintu nabwo urafatwa.

Ikindi bapima cya gatatu ni umubanji, bapima ko amata adasharira, icyo nacyo ngo  hari alukoro bakoresha mu gupima ko amata ari meza atarimo umubanji, icya kane bareba ko amata atarimo ‘antibiotic’.

Yagize ati “Inka yatewe umuti burya nta bwo igomba gukamwa, utegereza iminsi nibura itanu uhereye ku munsi wa nyuma yatereweho urushinge rwa Antibiotic, gukama ukabona ayo mata, ibyo ni byo bintu by’ingenzi amata agomba kuba yujuje kugira ngo yemererwe kujya ku isoko, age kugurishwa”.

Ibintu byangiza amata ni byinshi

Dr Ngarambe agaruka ku bintu byangiza amata, agira ati “Nk’ubu inka yatewe ‘antibiotic’ ibyo byangiza amata, inka irwaye ugomba kuyivura, iyo uyivuye umuti witwa antibiotic ujya no mu mata kandi aya mata iyo ushatse kuyatunganyamo ibintu bitandukanye nk’ikivuguto ntavura, ya antibiotic ibangamira udukoko dutuma amata avura. Ikindi ibyo kurya ugaburira inka kuko kuri ubu inka zisigaye zirisha ariko zikanagaburirwa amafu atuma umukamo wiyongera, iyo ayo mafu yabikitse nabi na byo byangiza amata.

Ikindi buriya amata kubera amavuta arimo atuma afata impumuro y’ikintu wayashyizemo. Ni yo mpamvu nk’amajerikani agurirwamo peterori kugira ngo uzashyiremo amata biba bisaba ko waba uyogeje cyane. Ikindi ukamira ahantu hitaruye cyane ahantu hari ingarani cyangwa ahantu hari umunuko kubera ko  umunuko ujya mu mata bikayangiza”.

 

TANGA IGITEKEREZO

Leave a Reply

Be the First to Comment!

avatar