2017-07-21 15:11:36 clouds 27o High | Kigali Rwanda

Dukurikire:
 
 

Rutsiro: Bagenda ibirometero 60 bajya ku bitaro

Yanditswe na IMVAHO NSHYA

Kuya 2017-01-05 09:01:28

 
Share on:
 
Yasuwe:35
 
Yavuzweho:200
 
10
 
10

Abaturage bo mu murenge wa Mukura mu karere ka Rutsiro, baravuga ko babangamiwe no gukora ingendo ndende bagiye kwivuza.

Umurenge wa Mukura ufite ubuso bungana na kilomeretokare 98,7, ufite abaturage 33,500, nyamara ufite ikigo nderabuzima kimwe, kitagira imbangukiragutabara bigatuma hari abarembera mu ngo, cyangwa bamwe mu bagore batwite bakabyarira mu ngo.

Nyirandegeya Agnes, umwe muri abo baturage avuga ko bakoresha amasaha abiri kugira ngo bagere ku kigo nderabuzima cya Mukura, bakagenda ibilometero 60 kugira ngo bagere ku bitaro bya Murunda.

Yagize ati “Turavunika, umubyeyi uri kunda bamutwara mu ngobyi ya gakondo, ibintu bishobora gutuma apfana n’uwo utwite, iyo abaganga bakohereje kujya kwivuriza ku bitaro bya Murunda ngo bigufashe ni ikibazo kirekire kuko ukora urugendo rw’ibilometero 60, ni kure pe!”

JPEG - 385.1 kb
Bemeza ko bagikora ingendo ndende bajya kwivuza (Foto Vestine D).

Ufite umurwayi ku bitaro bya Murundi uvuye aha mu murenge wa Mukura ntabwo kumugeraho biba byoroshye, kuko ni ahantu kure cyane.

Aba baturage bakomeza basaba ko bakongererwa ibigo nderabuzima, kandi bagahabwa n’imbangukiragutabara kugira ngo urembye nawe abashe kugera ku bitaro bitamugoye.

Aba baturage kandi basaba ko bibaye ngombwa bakwemererwa no kujya bivuriza ku bitaro bya Kibuye, kuko ari byo biri hafi yabo ugereranyije n’aho ibyo bemerewe kwivurizaho biri.

Umuyobozi w’akarere ka Rutsiro Ayinkamiye Emerance, avuga ko kugeza ubu imirenge myinshi ifite ikigo nderabuzima kimwe kimwe, akaba avuga ko icyakora bazashaka uko babaha Poste de Sante yinganira ikigo nderabuzima.

Yagize ati “Mu mihigo cy’umwaka muri Mukura dufite poste de santé yitwa Murambi turi kubaka ku buryo nayo izaborohereza, ku bijyanye n’ibitaro bimwe mu karere byo ni ikibazo dufite ku baturage basaga ibihumbi 300 kwivuriza ku bitaro bimwe ni ikibazo dusangiye twese abaturage ba Rutsiro.”

Yakomeje avuga ko abaturage ba Mukura bivuriza ku bitaro bya Kibuye kuko ari byo bibegereye, n’ubwo aba baturage bo bemeza ko batemerewe kubyivurizaho kuko bitari mu karere kabo.

Umwe mu baganga bo ku kigo nderabuzima cya Mukura, nawe yabwiye Imvaho Nshya ko abaturage b’uyu murenge batoroherwa no kwivuza, ndetse anasobanura iby’abavuga ko batemerewe kwivuriza mu bitaro bya Kibuye.

Yagize ati “Umuturage watanze mituweli tumwohereza kwivuriza ku bitaro bya Kibuye ariko utarayitanze yoherezwa Murunda, abajya ku Kibuye nabwo bisaba ko umurwayi bamuheka mu ngobyi ya gakondo bakagenda ibirometero nka bine bamuhetse, bakamugeza kuri kaburimbo kuko imbangukira gutabara ntiyagera ku kigo nderabuzima kuko haranyerera.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE