2017-08-20 07:43:55 clouds 27o High | Kigali Rwanda

Dukurikire:
 
 

Iyo uvuze serivisi nziza ku bitaro bya Kacyiru, abahabyarira babyumva kabiri

Yanditswe na IMVAHO NSHYA

Kuya 2017-05-04 07:14:20

 
Share on:
 
Yasuwe:382
 
Yavuzweho:200
 
10
 
10

N’ubwo Abagana ibitaro bya Kacyiru bishimira seririvisi zinoze kandi zihuse, ubuyobozi bw’ibitaro bya Kacyiru bwo bwemeza ko ibyiza abagana ibitaro bubikesha Perezida Paul Kagame wahaye Abanyarwanda umutekano, wo nkingi ubuzima bwiza n’iterambere ry’igihugu bishingiyeho.

Ubwo Imvaho Nshya yasuraga ibitaro bya Kacyiru yaganiriye na bamwe mu babyeyi bari bagiye kwisuzumisha, bayitangariza ko bashimira byimazeyo Madamu Jeannette Kagame, bitirira ibi bitaro witaye cyane ku bibazo by’ababyeyi bahura nabyo kwa muganga.

Ibi bitaro byahoze ari ibya Polisi y’Igihugu kuri ubu bikaba bigenzurwa n’Akarere ka Gasabo byiyemeje guharanira ko ababigana babona serivisi nziza kandi yihuse ku buryo uhageze agenda anyuzwe.

Umuyobozi w’ibitaro bya Kacyiru, Dogiteri Rutagengwa William uvuga ko kuba ibitaro byarashyizwe mu maboko y’Akarere ka Gasabo byatumye hashyirwa ingufu nyinshi mu gukomeza gufata neza ababigana. Ubuyobozi bwemeza ko bufatanije n’Akarere ndetse na Ministeri y’ubuzima ibyo bageraho babikesha umutekano bahawe n’umukuru w’igihugu Perezida Paul Kagame.

Ababyarira ku bitaro bya Kacyiru bavuga imyato serivisi inoze bahabwa

Ibi bitaro byamenyekanye cyane mu Rwanda kubera uburyo byita cyane ku babyeyi, gukora amasaha 24 kuri 24 n’imikorere myiza ituma biganwa n’abarwayi benshi.

Ikindi cyatumye ibi bitaro bimenyekana ni uburyo byita ku babyeyi bahabyarira baba babana n’ubwandu bwa Virusi itera SIDA, kugira ngo babyare neza abana badafite ubwandu.

Ibi bitaro byakomeje kwamamara cyane mu Rwanda ndetse no ku isi yose ubwo hashyirwaga “Isange One Stop Center” nk’ikigo cyashinzwe ku bufasha bwa Madamu Jeannette Kagame mu mwaka wa 2009, gitangira gikorera muri Polisi y’u Rwanda mu gufasha, kwita, kuvura, kumva no gukurikiranira hafi abakorewe ihohoterwa rishingiye ku gitsina akenshi baba biganjemo ab’igitsina gore.

Ibitaro bya Kacyiru bikomeje gutera imbere

Ikoranabuhanga riri mu bintu bituma ubuvuzi bukorwa neza mu bitaro bya Kacyiru kubera ko amakuru yose y’abarwayi aba abitse mu buryo bw’ikoranabuhanga( muri Mudasobwa ). Ibi bituma ubuvuzi muri ibi bitaro bwizerwa bikavura abantu bavuye mu gihugu hose.

Hari serivisi usanga mu bitaro bya Kacyiru udasanga mu bindi bitaro by’Uturere nk’ubuvuzi bakora bakabaga bakoresheje imashini zifotora( Cameras ) ku buryo kubera guha agaciro abafite ubwishingizi, ibiciro by’ubwo buvuzi usanga byagabanutseho 1/2 ugereranyije no mu bindi bitaro bikomeye bivura muri ubwo buryo.

Abaganga bazobereyemu kazi kandi bafite uburambe mu gukoresha imashini zikoreshwa mu buvuzi

Mu bitaro bya Kacyiru kandi uhasanga n’ubuvuzi bundi bunyuranye nk’ubw’amenyo, gusuzuma indwara zinyuranye kubera ko hari Laboratwari yo mu rwego rwo hejuru, kandi imiti hafi ya yose umurwayi yandikiwe ayisanga muri Farumasi y’ibitaro.

Ibitaro bya Kacyiru bikora amasaha 24/24 ku buryo igihe cyose uhasanga umuganga ugusuzuma. Kuba ibitaro biri mu Mujyi wa Kigali usanga bifite abaganga b’abahanga bahagije kandi b’inzobere ku buryo usanga nk’abaganga 7 barimo kuvura ababyeyi (muri Maternité ) icyarimwe, ibintu udasanga mu bindi bitaro by’Uturere.

Ingamba ibitaro bya Kacyiru bifite

Dr Rutagengwa avuga ko usibye isuku igaragarira buri wese ugeze mu bitaro bya Kacyiru bifite ingamba zo kugabanya umwanya abaturage bamara kwa muganga hatangwa serivisi z’icyitegerezo. Urugero nk’umurwayi utanze ibizamini ashobora kwigendera bakaza kumwoherereza ubutumwa bugufi kuri telefoni imubwira ibisubizo ko byabonetse.

Usibye serivisi zitangirwa mu bitaro bya Kacyiru biteganyijwe ko hazazanwamo n’izindi ku buryo uzajya usanga ari ibitaro bivura indwara zose kandi ku rwego rwo hejuru ku giciro cyo hasi ugereranyije n’ahandi.

Muganga arimo kwigisha ababyeyi uko utwite yitwara, ubwo bari baje kwisuzumisha no kwivuza bisanzwe

Ubuyobozi burishimira poitiki y’ubuzima mu Rwanda

Dr Rutagengwa ashima uburyo Leta y’u Rwanda iharanira ko ubuvuzi mu Rwanda buba bwiza kandi bukuzuza ibisabwa ku rwego mpuzamahanga. Arashimira Abafatanyabikorwa nk’ubuyobozi bw’Akarere ka Gasabo kagize ibibazo by’ibitaro ibyabwo kandi bukabikurikirana.

Ubuyobozi bw’ibitaro kandi bya Kacyiru burashimira Madamu Jeanette Kagame kuba yaritaye cyane ku bibazo by’ihohoterwa, atangiza serivisi za Isange One Stop Center mu Rwanda.

N’ubwo hari gahunda iriho yo kwagura ibitaro, kugeza ubu ibikorwaremezo biracyari bicye bigatuma badakora uko babishaka. Ni muri urwo rwego ubuyobozi bw’ibitaro bya Kacyiru busaba ko umushinga wo kwagura ibitaro wakwihutishwa.

Dr Rutagengwa arasaba abaturage bishoboye batuye mu Karere ka Gasabo kwitabira kwivuriza mu bitaro byabo kubera ko amafaranga bazajya bishyura atuma ibitaro bikomeza gukora neza kandi bikarushaho gutera imbere.

Umuyobozi w'Ibitaro bya Kacyiru, Dogiteri Rutagengwa William

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE