2017-08-20 07:43:55 clouds 27o High | Kigali Rwanda

Dukurikire:
 
 

Abarwaye malariya mu Rwanda bagabanyutseho 50% mu mezi 6

Yanditswe na IMVAHO NSHYA

Kuya 2017-04-26 08:08:09

 
Share on:
 
Yasuwe:131
 
Yavuzweho:200
 
10
 
10

U Rwanda rwiyunze ku bindi bihugu, rwizihiza Umunsi mpuzamahanga wahariwe kurwanya Malariya rwishimira ko abarwayi b’iyi ndwara bagabanutse ku kigero cya 50% kuva mu Gushyingo 2016 kugeza muri Werurwe 2017.

Minisiteri y’Ubuzima itangaza ko kwizihiza uyu munsi ari amahirwe ku Rwanda yo guhuza imbaraga mu guhangana na malariya binyuze mu kongera ubukangurambaga n’ubufatanye bw’inzego zose.

Biteganyijwe ko uyu munsi usanzwe wizihizwa buri wa 25 Mata, uzizihizwa mu Rwanda kuri uyu wa 26 mata 2017 mu Karere ka Huye ahazatangitwa ubutumwa bwo kwirinda no kwivuza.

Minisiteriy’Ubuzima yashyize imbaraga ku ngamba zo kurwanya malariya hakoreshejwe uburyo bukomatanyije harimo gutanga inzitiramubu, gutera umuti mu ngo, gupima no kuvura malariya ku buntu mu mavuriro no mu mudugudu.

Hatangijwe gahunda yo guhashya malariya (Malaria Contingency Plan/MCP) yatangiye gushyirwa mu bikorwa muri Mutarama 2016 igamije kongera ishyirwa mu bikorwa ry’ubufasha bushoboka mu kugabanya umutwaro wa malariya mu banyarwanda no kwirinda imfu za hato na hato, nyuma y’aho bigaragariye ko abarwayi n’imfu ziterwa na malariya byiyongereye mu myaka itanu ishize.

Muri iyi gahunda ni bwo hagabanyutse 50% by’abarwayi ba malariya ndetse hanatangwa miliyoni enye z’inzitiramubu zikoranywe umuti. Hanatewe umuti wica imibu mu ngo zo mu turere twa Kirehe, Nyagatare, Gatsibo, Bugesera na
Gisagara.

Iyi gahunda ikomatanyije ikubiyemo ubufasha butatu Leta yageneye Abanyarwanda ari bwo gutanga inzitiramubu, gutera umuti wica imibu ikwirakwiza malariya mu ngo, gupima no kuvura malariya kurwego rw’umudugudu mu gihugu hose, kandi bigakorwa kuri benshi mu gihe gito.

Yatangiriye ku babyeyi batwite n’abana bakiri munsi y’imyaka itanu mu gihugu hose, ariko mu mwaka w’ubukungu wa 2015/2016 yageze no ku bantu bakuru. Guhera mu kwezi k’Ugushyingo 2016, uturere 30 twose turashyira mu bikorwa gahunda yo kurwanya malariya mu ngo, ku bana bato no ku bantu bakuru.

Ubu buryo burashyirwa mu bikorwa bugendana no gupima no kuvura abarwayi ba malariya guhera mu nzego z’ibanze, cyane cyane mu mirenge yibasiwe cyane kandi abaturage baragaragaza icyizere bafitiye iyi gahunda.

Hatangijwe gahunda yo guhashya malariya mu bakuze binyuze mu bajyanama b’ubuzima; guhera mu kwezi k’Ukwakira 2016, uturere twose dukomeje kubyubahiriza mu gutabara ubuzima bw’abaturage batararemba cyangwa ngo hagire ababura ubuzima.

Abatishoboye barapimwa bakanavurirwa ubuntu

Kuva mu kwezi k’Ukwakira 2016, ubuvuzi bwa Malariya bukorerwa mu midugudu bukozwe n’abajyanama b’ubuzima hagamijwe kwegereza abaturage bose serivisi kugira ngo bavurwe hakiri kare banirinde malariya y’igikatu n’impfu za hato na hato.

Guhera muKwakira 2016 hakozwe ibikorwa byo gupima no kuvura malariya hakaba harapimwe abantu 38,527. Guhera tariki ya 11 Ugushyingo 2016, abaturage bose bari mu cyiciro cya 1 n’icya 2 by’ubudehe, bavurwa malariya ku buntu ku bajyanama b’ubuzima no ku bigo nderabuzima.

Minisiteri y’Ubuzima isanga gahunda ikomantanyije mu guhashya malariya (MCP) isaba ko ubufasha bukorerwa abaturage butagomba gusigana nubwo hakigaragara ubushobozi buke mu kubishyirira mu bikorwa icyarimwe, bityo hakenewe ubuvugizi bwafasha kuzamura amafaranga atangwa mu kugura imiti, gupima, gutera imiti, kunganira gahunda yo gusuzuma no gutanga ubuvuzi mu maguru mashya.

Na none kandi hakenewe ubuvugizi bufasha gukuraho ikiguzi ku barwayi ba malariya ku mavuriro y’ingoboka, ahavurirwa malariya itaraba igikatu, mu rwego rwo gufasha abaturage kubona ubuvuzi bwihuse.

Ubwirinzi bwa malariya bwakurikije amabwiriza mpuzamahanga

Mu rwego rwo kwirinda malariya, u Rwanda rwiyemeje gukurikiza amabwiriza y’Ishami ry’Umuryango w’Abibumbye ryita ku buzima (OMS) na gahunda ya Leta ishingiye ku gukora ugamije umusaruro (RBM) mu gukwirakwiza inzitiramibu ziteye umuti ku bagore batwite n’ahari abana bari munsi y’imyaka itanu y’amavuko. Buri kwezi imikoresherezwe y’inzitiramibu itangwaho amakuru binyuze mu buryo bw’ikoranabuhanga, ndetse umusaruro wazo wagaragaye mu buryo bukurikira:

Imibare y’Ubushakashatsi ku buzima bw’abaturage mu Rwanda (DHS) yatangajwe muri Gicurasi 2015, yerekana ko 81% by’ingo zo mu Rwanda zifite byibura inzitiramibu ikoranywe umuti imwe na ho 43% zifite inzitiramibu zihagije kuri buri muntu ugize umuryango (byibuze babiri basangira inzitiramibu imwe). Iyi ntambwe yatewe mu gihe mu mwaka wa 2005 15% by’ingo ari byo byagiraga inzitiramibu zikoranywe umuti.

DHS yerekana ko abana barenga 2/3 bari munsi y’imyaka itanu ndetse na 73% by’abagore batwite baryamye mu nzitiramibu mu ijoro ryabanjirije ubushakashatsi, mu gihe iri tsinda ari ryo ryibasirwa na malariya cyane.

Byaje kugaragara ko gutunga inzitiramibu bitavuze kuyikoresha kuko 80% by’abana bari munsi y’imyaka itanu na 88% by’abagore batwite baba mu ngo zifite inzitiramibu ari bo bazirayemo mu ijoro ryabanjirije ubushakashatsi. Gusa Abajyanama b’Ubuzima bakomeje kwifashishwa mu bukangurambaga no kugenzura imikoreshereze y’izi nzitiramibu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE