21°C , Mostly cloudy | Kigali-Rwanda
Minisitiri w'Imari n'Igenamigambi Amb. Claver Gatete (hagati), Minisitiri w'Ubuzima Dr Diane Gashumba (ibumoso), Umuyobozi mukuru wa SDGC Dr Belay Begashaw ubanza iburyo ( Foto James)

Ubuzima bugenerwa ingengo y’imari igaragara kuko buhenze-Amb. Gatete

Yanditswe na MUGISHA BENIGNE

Ku ya 09-03-2018 saa 09:57:24

Minisitiri w’Imari n’Igenamigambi, Amb. Gatete Claver, atangaza ko urwego rw’ubuzima mu Rwanda rugenerwa ingengo y’imari igaragara kuko buhenze kandi ari ubwo kwitabwaho.

Minisitiri w’Imari n’Igenamigambi Amb. Claver Gatete (hagati), Minisitiri w’Ubuzima Dr Diane Gashumba (ibumoso), Umuyobozi mukuru wa SDGC Dr Belay Begashaw ubanza iburyo ( Foto James)

Ibi yabivugiye mu muhango wo gufungura inama nyafurika ku ntego z’iterambere rirambye (SDGC/A), inama yitabiriwe n’abantu 500 baturutse mu bihugu binyuranye by’Afurika.

Amb. Gatete yagize ati “Ubuzima bugenerwa ingengo y’imari itubutse kuko buhenze, bugomba kwitabwaho, bukenera ibikoresho, ubwishingizi, ubwirinzi n’ibindi.”

Amb. Gatete kandi avuga ko ubuzima bw’Abanyarwanda bubungabungwa mu buryo bukomeye, kuko ikizere cyo kubaho cyavuye ku myaka 50 kikaba kigeze kuri 67, bivuze ko ikizere cyo kubaho cy’Abanyarwanda cyazamutse.

Minisitiri w’Imari n’Igenamigambi yavuze ko gahunda y’abajyanama b’ubuzima na yo ishyigikirwa kuko ari bo bafasha abaturage kubona ubuvuzi bw’ibanze mu midugudu, ngo bakora akazi gakomeye, ari na yo mpamvu Leta ibagenera uburyo bw’imikorere, bityo urwego rw’ubuzima rugahabwa ingengo y’imari igaragara.

Minisitiri w’Ubuzima, Dr Diane Gashumba, yavuze ko  ingengo y’imari isaga 15%  ikoreshwa mu gihugu ishyirwa mu rwego rw’ubuzima ku mpamvu z’uko ubuzima bw’abaturage buba bugomba kwitabwaho kurusha ibindi byose.

Yagize ati “Mu rwego rw’ubuzima duhabwa imbaraga n’ubuyobozi bw’igihugu kuko   rushyirwamo ubushobozi bwisumbuyeho kugira ngo tubungabunge ubuzima bw’Abanyarwanda.”

Dr Gashumba kandi yongeraho ko ibikorwaremezo by’ubuzima bigenda byiyongera mu Rwanda ndetse hakaba hari na gahunda yo kurushaho kubyongera kugira ngo byegerezwe abaturage.

Ati “Dufite amavuriro, dufite abajyanama b’ubuzima, dufite amavuriro y’ingoboka n’ibigo nderabuzima, byose kugira ngo Abanyarwanda babone aho bivuriza kandi hafi.”

Belay Begashaw, Umuyobozi mukuru wa SDGC/A yagarutse ku ngengo y’imari ihabwa urwego rw’ubuzima muri Afurika, avuga ko akenshi iba ari nini ugereranyije n’izindi nzego cyangwa Minisiteri, ariko ngo abashinzwe kubwitaho umunsi ku wundi bo ngo ntibabyitaho nk’uko byakagombye.

Ati “Urebye ingengo y’imari ishyirwa mu buzima ntijyanye n’ibikorwa, abakora muri uru rwego ntibabyitaho nk’uko bikwiye, ndasanga bakwiye guhindura imyumvire bakamenya ko ubuzima bw’abantu buhenze kandi bushyirwamo ubushobozi bwinshi na za Leta.”

Aba bayobozi bose bashimangira ko iyi nama iganirwamo uburyo urwego rw’ubuzima  rwatezwa imbere mu bihugu byose, za Leta zigashyiramo ingengo y’imari  ihagije kandi igamije kubungabunga ubuzima bw’abaturage.

TANGA IGITEKEREZO

Leave a Reply

Be the First to Comment!

avatar