17°C , Mostly cloudy | Kigali-Rwanda
Musabyimana Jean Claude, Umunyamabanga Uhoraho muri MINILAF (ibumoso) na Mukamana Esperance, Umuyobozi Mukuru w'Ikigo cy'ubutaka (Foto James R.)

Ubutaka bugiye kujya busoreshwa hakurikijwe ubushobozi bwa nyirabwo

Yanditswe na MUGISHA BENIGNE

Ku ya 06-09-2018 saa 07:39:25

Minisiteri y’Ubutaka, Amazi n’Amashyamba (MINILAF) yatangiye kuvugurura politiki y’ubutaka mu rwego rwo kugira ngo bubere igisubizo ababufite aho kubabera umutwaro. Mu byo iyi politiki igiye gukemura hakaba harimo ko ubutaka buzajya busoreshwa hakurikije ubushobozi bwa nyirabwo aho gushingira ku cyo bukoreshwa.

Musabyimana Jean Claude, Umunyamabanga Uhoraho muri MINILAF (ibumoso) na Mukamana Esperance, Umuyobozi Mukuru w’Ikigo cy’ubutaka (Foto James R.)

Nk’uko bisobanurwa na Nteziryayo Florien, Umuyobozi Mukuru ushinzwe ubutaka muri MINILAF, ngo politiki y’ubutaka yo mu mwaka wa 2004 yari ishingiye ku gusoresha ubutaka  bw’umuturage hakurikijwe icyo bukoreshwa n’aho buherereye, ngo ariko iyi Politiki nshya y’ubutaka iteganya gusoresha ubutaka hakurikijwe ubushobozi bw’umuturage.

Ati “Politiki y’ubutaka yo mu mwaka wa 2004 ntiyari ikijyanye n’iterambere igihugu kimirije imbere, kuri ubu hari gahunda y’igihugu y’iterambere ivuguruye  izageza mu mwaka wa 2024, hari n’izindi gahunda z’iterambere rirambye igihugu kihaye nk’ikerekezo cy’umwaka wa  2050, kandi abaturage igihugu cyakoreraga igenamigambi muri icyo gihe batandukanye n’abo igihugu kirimo gukorera igenamigambi muri iki gihe n’abo giteganya kurikorera  mu myaka iri imbere.”

Yagarutse ku bwiyongere bw’abaturage bwagaragajwe n’ibarura rusange ry’umwaka wa 2012 buri kuri 2.6 %, bivuze ko muri 2050 bazaba ari benshi cyane ugereranyije n’ibarura rusange ry’ubushize rigaragaza ko abaturage bageze kuri miliyoni 12, bivuze ko bizatuma hakenerwa ubutaka bwinshi kurusha ubutaka buhari kandi ntibwiyongera.

Ati “Ni ngombwa ko tujyana n’umuvuduko abaturage bariho, ariko n’abahari tubapangira ubutaka dukurikije ubuhari.”

Umunyamabanga Uhoraho muri Minisiteri y’Ubutaka, Amazi n’Amashyamba Musabyimana Jean Claude, agaruka ku mpamvu politiki y’ubutaka irimo kuvugururwa, aho ngo biterwa n’uburyo bw’imibereho y’abaturage, ikaba yarahereye ku iyandikwa ry’ubutaka  no kububarura mu rwego rwo kureba niba busubiza ibibazo biriho.

Ati “Ikerekezo k’igihugu kidusaba kuvugurura politiki y’ubutaka, turasatira ikerekezo 2020, tuzanakomeza kugeza ku kerekezo 2050, kuvugurura Politiki y’ubutaka ni mu rwego rwo guhindura imibereho y’abaturage n’andi masezerano igihugu kiba cyariyemeje, tubihuza na politiki y’ubutaka no gutanga inzira yo kubigeraho.”

Musabyimana avuga ko hari ibintu bizibandwaho, nko guhuza ibishushanyombonera by’ubutaka bikorwa mu rwego rw’uturere n’ibiri ku rwego rw’igihugu, akaba ari mu rwego rwo kubiha umurongo umwe kugira ngo bisubize ibibazo biriho.

Ati “Uko Abanyarwanda biyongera ni ko n’iterambere ryiyongera, turifuza gushyira ibyo bikorwa byose ku murongo kugira ngo bisubize ibibazo bihari, ibikorwaremezo bikeneye ubutaka, abatura n’abahinga bakeneye ubutaka, ibikorwaremezo bikeneye kubungabungwa na byo bikeneye ubutaka, ni ngombwa rero ko hajyaho politiki ibihuza kugira ngo hatagira ikibangamira ikindi kugira ngo bikorwe neza.”

Iyi politiki ije kandi  gukemura  uburyo ibishushanyombonera bikorwa n’uburyo byubahirizwa, kandi ubutaka bugomba kubyazwa imari.

Mukamana Esperance, Umuyobozi Mukuru w’Ikigo cy’Ubutaka, yavuze ko politiki nshya ije gukemura ibibazo byinshi biri mu rwego rw’ubutaka nk’imisoro y’ubutaka n’imikoreshereze yabwo, no kwegereza abaturage serivisi z’ubutaka.

Ati “Uko iterambere ry’igihugu rigenda rikura ni ko n’abaturage bagenda bagira byinshi bakenera gukoresha ubutaka bwabo, iyi Politiki rero izakemura ibibazo bihari, bityo ubutaka bube koko umutungo uteza imbere nyirawo.”

Kuvugurura Politiki y’ubutaka biragenda bigana ku musozo, bikaba bitegenyijwe ko umwaka utaha izatangira gushyirwa mu bikorwa.

 

 

 

TANGA IGITEKEREZO

Leave a Reply

Your email address will not be published. Required fields are marked *