Ubutabera bushingira ku kizere cy’ubucamanza – Kagame

Yanditswe na Twagira Wilson

Ku ya 06-12-2019 saa 14:06:53
Perezida Kagame yasabye ko inzego z'ubutabera zongera ubunyamwuga

Perezida Paul Kagame avuga ko ubutabera bugomba gushingira ku kizere abaturage bagirira inzego z’ubucamanza.

Ibyo Umukuru w’Igihugu yabivugiye mu Nteko Ishinga Amategeko ku wa Gatanu tariki 6 Ukuboza 2019, ubwo yari amaze kwakira indahiro z’abayobozi batandukanye bo mu nzego nkuru z’ubutabera barimo Perezida w’Urukiko rw’Ikirenga n’umwungirije, n’Umushinjacyaha mukuru wa Repuburika.. .

Mu mpanuro yahaye abo bayobozi nyuma yo kwakira indahiro zabo, yabasabye kugira imyifatire myiza ikwiye kuko asanga ari bwo bazagirirwa ikizere n’ababagana bakeneye ubutabera.

Aboneraho gushima Perezida w’Urukiko rw’Ikirenga n’umwungirije bacyuye igihe avuga ko bitwaye neza mu gihe bari mu buyobozi kuko bakoze neza inshingano zabo mu nyungu z’abaturage hamwe n’igihugu.

Perezida Kagame yagize ati: “Ababasimbuye mufite umusingi ukomeye wo kubakiraho ngo mukomeza kugeza ubutabera bumeze neza ku banyarwanda, ubutabera bushingira ku mategeko no kuyubahiriza neza uko bikwiye, kandi bikaba  umuco mu buzima bwacu bitabaye umugenzo cyangwa ibyo dusabwa gusa.

Hakwiriye kubaho amategeko meza afitiye akamaro abaturage, ikindi ubutabera bushingira ku kizere abantu bagirira abacamanza nacyo kigashingira ku budakemwa, ubushishozi no kutabogama, maze abanyarwanda bahabwe ubutabera bakwiye kandi ubutabera bushyigikira iterambere ry’ibihugu,   byose bigaragarira mu buryo imanza zicibwa.”

Avuga ko nubwo hari intambwe imaze kugerwaho mu rwego rw’ubutabera hakiri ibikenewe gukemurwa nk’ibibazo bya ruswa,  ntizabe umuco mu nzego z’ubucamanza kuko iyo yabaye umuco mu bucamanza, iba yabaye umuco no mu gihugu cyose,  ababigaragaramo baba bakwiye kubibazwa no kubihanirwa.

Yabijeje ko Leta yiteguye kubashyigikira kugira ngo buzuze neza inshingano zabo zijyanye n’ibyo basabwa.

Perezida mushya w’urukiko rw’ikirenga ni muntu ki?

Dr. Nteziryayo Faustin yavutse ku itariki 20 Kanama 1962, avukira mu cyahoze ari Perefegitura ya Gitarama kuri ubu habaye mu karere ka Kamonyi.

Ikiciro cy’amashuri ya kaminuza yakigiye  mu cyahoze ari Kaminuza Nkuru y’u Rwanda, aho yakuye impamyabumenyi y’ikiciro cya kabiri cya kaminuza, mu ishami ry’amategeko mu 1986.

Nyuma akomereza mu mahanga aho yakuye imyamyabumenyi y’ikiciro cya gatatu cya kaminuza (Masters) mu bijyanye n’amategeko agenga imisoro, yakuye muri Université Libre de Bruxelles (ULB), n’impamyabumenyi y’ikiciro cya gatatu cya kaminuza mu bijyanye na Politiki z’Ubucuruzi Mpuzamahanga, yakuye muri Carleton University yo muri Canada mu 2009.

Afite iyindi  mpamyabumenyi y’ikirenga mu mategeko mu rwego rwa  PHD yakuye muri Kaminuza ya Antwerp mu Bubiligi mu 1994.

Amaze imyaka 31 akora mu birebana n’amategeko, yakoze akazi gatandukanye muri Guverinoma y’u Rwanda, harimo kuba yarabaye Minisitiri w’Ubutabera guhera mu 1996 kugeza mu 1999; Guverineri wungirije wa Banki Nkuru y’u Rwanda; Umuyobozi Mukuru w’Urwego Ngenzuramikorere,  Umujyanama mukuru mu by’amategeko muri Minisiteri y’Ubucuruzi n’Inganda.

Abayobozi mu nzego z’ubutabera barahiye ni   Perezida w’Urukiko rw’Ikirenga Dr Nteziryayo Faustin, Visi Perezida w’Urukiko rw’Ikirenga, Mukamulisa M.Therese, Umushinjacyaha Mukuru, Havugiyaremye Aimable, Umushinjacyaha Mukuru wungirije Habyarimana Angelique na Visi Perezida w’Urukiko rukuru rw’ubucuruzi, Nkurunziza Valens.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.