Ubushinjacyaha bwashyikirijwe dosiye ya Rusesabagina

Yanditswe na KAYITARE JEAN PAUL

Ku ya 09-09-2020 saa 12:44:41

Kuri uyu wa Gatatu tariki ya 09 Nzeri 2020, Paul Rusesabagina ukekwaho ibyaha by’iterabwoba yagaragaye ku kicaro gikuru cy’Ubushinjacyaha Bukuru bw’u Rwanda  giherereye ku Kimihurura.

Rusesabagina yageze ku kicaro cy’ubushinjacyaha ari kumwe n’abamwunganira mu mategeko, barimo Me Nyembo Emeline na Me Rugaza David.

Rusesabagina akurikiranweho ibyaha birimo iterabwoba, gutwika, ubushimusi n’ubwicanyi, byakorewe abanyarwanda b’inzirakarengane mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018, no mu bice byegereye Nyungwe mu Karere ka Nyamagabe, mu Ukuboza 2018.

Mbere ya Jenoside yakorewe Abatutsi mu 1994, Paul Rusesabagina yari umuntu usanzwe, uko iminsi yagendaga ishira aza kubonwa nk’umugabo wazamukanye inyota y’ubutegetsi, agera aho ashaka kurisha ubuhamya bufifitse, anavugwa mu ishingwa ry’umutwe ugamije guhungabanya umudendezo w’u Rwanda.

Rusesabagina yavukiye i Murama ya Gitarama ku wa 15 Kamena 1954, ariko nyuma yagiye gutura i Bruxelles mu Bubiligi na Leta Zunze Ubumwe za Amerika.

Uburyo abantu bamuzi bwahinduwe cyane na filimi Hotel Rwanda yamukinweho nk’uwarokoye abantu 1,268 muri Hôtel des Mille Collines, abayobejwe nayo batangira kumuhundagazaho ibihembo kugeza kuri ‘Presidential Medal Award of Freedom’, yahawe na Perezida George W. Bush wa Amerika mu Ugushyingo 2005.

Umwanditsi:

KAYITARE JEAN PAUL

One Comment on “Ubushinjacyaha bwashyikirijwe dosiye ya Rusesabagina”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.