22°C , Partly sunny | Kigali-Rwanda

Uburyo bwo kubika amakuru y’irangamimerere hakoreshejwe ikoranabuhanga bugeze kure bwubakwa – Min. Ndagijimana

Yanditswe na Kayira Etienne

Ku ya 10-10-2019 saa 12:49:19
Minisitiri wa MINECOFIN Dr. Uzziel Ndagijimana aaganira n'Abadepite ba Komisiyo ya Politiki ku wa 9 Ukwakira 2019(Foto Regis M)

Uburyo bushya bwo gukusanya no kubika amakuru y’irangamimerere hakoreshejwe ikoranabuhanga bumaze igihe bwubakwa ku bufatanye bw’inzego zitandukanye za Leta y’u Rwanda bigeze kure, nk’uko byemejwe na Minisitiri w’Imari n’Igenamigambi Dr. Uzziel Ndagijimana, kuri uyu wa Gatatu tariki 9 Ukwakira 2019.

Ibi Minisitiri Ndagijimana yabitangaje ubwo yagiranaga ikiganiro n’Abadepite bagize Komisiyo ya Poritiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, ari kumwe n’Umuyobozi w’Ikigo k’Igihugu gishinzwe ibarurishamibare (NISR) Yusuf Murangwa, mu rwego rwo kugaragaza uburyo amakuru aturuka mu irangamimerere akusanywa, uko asesengurwa n’uburyo akoreshwa mu igenamigambi ry’Igihugu rirambye, imbogamizi n’ingamba bihari.

Abadepite bagize Komisiyo ya politike barangajwe imbere ya Perezida wayo Hon. Rubagumya Emma(uwa mbere iburyo) bakurikirana ibisobanuro bya Minisitiri wa MINECOFIN ku wa 9 Ukwakira 20019(Foto Regis M)

Nyuma yo guhabwa ikaze na Depite Rubagumya Furaha Emma, Perezida wa Komisiyo ya Poritiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, Minisitiri Uzziel Ndagijimana yashimiye Abadepite ko babatumiye ngo baganire ku buryo amakuru aturuka mu irangamimerere akusanywa n’uko akoreshwa mu igenamigambi.

Ati “Mbere y’uko tujya ku bibazo byabajijwe munyemerere mbanze mbabwire muri rusange ko kugira uburyo buhamye kandi buhoraho bwo gukusanya imibare y’irangamimerere bifasha mu igenamigambi ry’igihugu, bityo bikanorohereza inzego zitandukanye za Leta gukora igenamigambi byihutisha iterambere rirambye ry’Igihugu muri rusange. Ndabamenyesha ko buriya buryo bushya bugeze kure bwubakwa ndetse n’uwavuga ko bugeze ku musozo ntiyaba akabije.”

Minisitiri Ndagijimana yakomeje asobanurira Abadepite ko ubwo buryo bw’ikoranabuhanga bukoreshwa mu irangamimerere bwatangiye gukoreshwa mu Rwanda, ngo bwakozwe ku bufatanye bw’ibigo na za Minisiteri: Minisiteri y’Ubutegetsi bw’Igihugu MINALOC,  Minisiteri y’Uburinganire n’Iterambere ry’Umuryango MIGEPROF, Minisiteri y’Ubuzima MINISANTE, Ikigo k’Igihugu k’Ibarurishamibare NIRS, Ikigo k’Igihugu gishinzwe indangamuntu NIDA n’ibindi.

Dr. Ndagijimana yakomeje agira ati “Ubu buryo bushya bufasha mu gukusanya no kubika amakuru mu buryo bunoze kuva abana bavutse n’iyo bapfuye, bityo inzego bireba zikabigiraho amakuru amwe. Igihugu icyo ari cyo cyose, gikora igenamigambi ry’iterambere rirambye gishingiye ku mubare w’abaturage bacyo.

Urugero  nko kumenya abana bavutse n’abapfa, bituma ababifite mu nshingano basubira inyuma bakamenya n’impamvu zabyo, bityo bakanoza imitangire ya serivisi no kugena ibikorwa bitandukanye bijyanye n’ubuzima. Mu rwego rw’uburezi, kumenya abana bavutse bituma mu igenamigambi MINEDUC imenya umubare w’abaziga amashuri y’ikiburamwaka mu gihe kiri imbere, abaziga amashuri abanza, bityo hagategurwa hakiri kare abarimu n’ibyumba by’amashuri bazigiramo”.

Minisitiri Ndagijimana yanagaragaje ko ubwo buryo bushya bwo kubika amakuru binyuze mu irangamimerere, ngo bufasha na Minisiteri y’Ubutegetsi bw’Igihugu kumenya uko abaturage bagenda biyongera n’aho batuye bafatanyije n’Ikigo k’Igihugu k’Ibarurishamibare.

Dr. Uzziel Ndagijimana yibukije ko iyo system nshya ngo izafasha mu kugabanya amafaranga menshi yashorwaga mu ibarura rusange ryakoreshwaga buri myaka itanu. Ubu ngo rizajya rikorwa ariko amakuru yose y’ingenzi yakenerwaga ahari, bitandukanye n’uko byakorwaga mu myaka yose ishize.

Ati “Ubu ibyo kwandika abana bavutse hakoreshejwe ubu buryo bushya ntibirakorwa neza, kubera ko dutegereje ko Itegeko rya kera risubirwamo. Ryasabaga ko umwana uvutse yandikwa mu bitaro ariko ababyeyi bakongera kujya kumwandikisha ku murenge.

Ariko nirimara gusohoka, umwana azajya yandikwa rimwe mu kigo nderabuzima cyangwa mu bitaro yavukiyemo, bityo ayo makuru ahite yemerwa nk’amakuru y’igihugu”.

Ayo makuru ngo azajya ahita ajya muri Minisiteri y’Ubuzima, ahite ajya mu Kigo  k’Igihugu gishinzwe Indangamuntu, age ku murenge ndetse no mu Kigo k’Igihugu k’Ibarurishamibare.

Umuyobozi w’Ikigo k’Igihugu gishinzwe Ibarurishamibare mu Rwanda, Yusuf Murangwa, yatangarije Abadepite ko ubu buryo bushya bw’ikoranabuhanga bukoreshwa mu irangamimerere, ngo bufite akamaro gakomeye mu kwandika neza abana bavuka cyangwa abapfuye.

Ati “Ku bana bavuka bituma Igihugu kimenya ko abageze igihe cyo gushyingirwa bakwije koko imyaka igenwa n’itegeko. Bifasha kandi mu kuzuza uburenganzira abana bafite nko gutora, bigafasha kumenya ko abana bageze igihe cyo kwiga bakaba bafashwa niba hari ikibazo bagize kibavutsa ubwo burenganzira kuko bafite aho babarizwa.”

Murangwa yatanze urugero rw’uko mu bihugu byateye imbere aho amakuru y’abaturage abikwa neza, ngo ntibashobora kugira ikibazo cyo kuyoberwa aho abakekwaho kwandura Ebola bari nk’uko bihangayikisha mu bihugu bikiri mu nzira y’amajyambere.

Ati “Kubaka iyi system dufatanyije n’inzego zitandukanye ni ikintu cyadufashe hafi imyaka icumi. Itegeko ritegerejwe nirimara kujyaho, bizorohera inzego kujya zibika amakuru y’abana bavutse bihereye mu kigo nderabuzima amakuru akiyandika mu nzego zose aho akenewe bityo amakuru y’ibizagenda bikurikiraho azajya yoroha kumenyekana niba hari abapfuye, abari hanze y’Igihugu n’ibindi byose bikenewe.”

Murangwa Yusuf, Umuyobozi w’Ikigo k’Igihugu k’Ibarurishamibare(Foto Regis Mucyo)

Muri iki gihe Itegeko ritaremezwa, ngo ayo makuru abitswe ku mirenge n’abashinzwe irangamimerere bityo akaba ari yo azabikwa mu nzego zose igihe bizaba byemewe. Abakozi babishinzwe bose bamaze guhugurwa. Imbogamizi zihari kugeza ubu, ni uko ngo hari uturere tumwe tutaritabira neza kwandikisha abana ku mirenge nk’uko bisabwa, kubera imyumvire ikiri hasi y’abaturage batwo.

Indi mbogamizi ni uko abaturage bashobora kujyana abana bagasanga ushinzwe kubandika adahari. Murangwa, Umuyobozi Mukuru wa NIRS yijeje ko akamaro k’ubwo buryo bushya buzagirira Igihugu akamaro gakomeye mu kubika amakuru y’abagituye.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.