21°C , Partly cloudy | Kigali-Rwanda
Uburyo bwo kwegereza inyongeramusaruro abahinzi mu murima buje ari igisubizo mu kongera umusaruro (Ifoto Rose M)

Uburyo bushya bwo kwegereza inyongeramusaruro abahinzi buratanga ikizere

Yanditswe na Mukagahizi Rose

Ku ya 05-11-2018 saa 07:42:27

Abahinzi bo mu karere ka Karongi baravuga ko uburyo bushya bwo kubegereza inyongeramusaruro mu murima hifashishijwe abamamazabuhinzi babwitezeho byinshi.

Ngabonziza Ange ucuruza inyongeramusaruro mu Murenge wa Gashari mu Karere ka Karongi, avuga ko mu busanzwe gutegereza ko abahinzi babasanga mu iduka byatumaga hari bamwe batabageragaho.

Avuga ko bene aho bahitagamo kudakoresha izo nyongeramusaruro ariko ubu abamamazabuhinzi bazajya bakorana neza bakabakopa inyongeramusaruro, bakazikwirakwiza mu bahinzi babasanga aho bari bityo, na bo bakabonaho inyungu.

Yabivugiye mu nama yo gutangiza ku mugaragaro ubu buryo bushya bwo kwegereza inyongeramusaruro abahinzi mu murima no kurwanya nkongwa idasanzwe.

Mukamana Claudine na we wo muri Gashari avuga ko ubu buryo bwo gusangishwa inyongeramusaruro mu mirima yabo bibaruhuye ingendo bajyaga bakora.

Rimwe rimwe na rimwe amaduka baguramo inyongeramusaruro yabaga ari kure bagacika intege zo kujya kuzigura bigatuma bahinga uko biboneye, umusaruro ugatuba.

Umwe mu bamamazabuhinzi Ahishakiye Chantal avuga ko ashimira ubu buryo bwo guhuza abacuruzi b’inyongeramusaruro hamwe n’abahinzi buzatuma banamenya n’ibindi abahinzi bakeneye babimenyeshe abacuruzi b’inyongeramusaruro.

Uburyo bwo kwegereza inyongeramusaruro abahinzi mu murima buje ari igisubizo mu kongera umusaruro (Ifoto Rose M)

Daniel Gies, Umuyobozi w’Umushinga ‘Hinga Weze’, watangijwe ku bufatanye n’Ikigo k’Igihugu gishinzwe guteza imbere Ubuhinzi n’Ubworozi (RAB) n’Umuryango w’Abanyamerika ufasha mu bikorwa by’Iterambere (USAID) ukaba wibanda ku buhinzi no kunoza imirire, yavuze ko ikigamijwe ari uko inyongeramusaruro zujuje ubuziranenge zigera ku muhinzi kandi ku giciro kiza.

Yagize ati: “Dufite intego yo kugeza inyongeramusaruro ku bahinzi n’aborozi bakiri bato tubasanga hose mu byaro no mu bice byitaruye bya kure bityo, umusaruro ukazarushaho kwiyongera. Binyuze muri ubwo buryo bwo kugezaho abahinzi ibikenewe, tuzabasha kubagezaho inyongeramusaruro nta kindi kiguzi kiyongereyeho yaba icy’urugendo cyangwa ubwikorezi kandi abamamazabuhinzi bazunguka amafaranga y’u Rwanda magana 200 kuri buri cupa ryaguzwe rikanagezwa ku bahinzi.”

Yakomeje avuga ko Hinga Weze izakora cyane kugira ngo abahinzi bashobore kugera ku bwiza no ku bwinshi mu kongera umusaruro mu myaka izaza.

Muri ubu buryo kandi Hinga Weze ishaka gukorana n’abacuruzi b’inyongeramusaruro ndetse n’abamamazabuhinzi bazahugurwa ibijyanye n’imicururize y’inyongeramusaruro aho rwiyemezamirimo munini azajya ahuzwa nabo ariko igihe bishyize hamwe bakagurira hamwe bazajya babona inyongeramusaruro ku giciro gito cyane bityo bakabyungukiramo kandi n’umuhinzi ahendukirwe.

Safari Fabien, ushinzwe ubuhinzi mu karere ka Karongi ashimira umushinga Hinga weze ku bufatanye na Leta y’u Rwanda mu ntumbero yo kongera umusaruro ndetse no kuba abahinzi bazajya babona inyongeramusaruro kandi bakazibonera igihe zihendutse.

Asanga ubufatanye hamwe n’abamamaza buhinzi bushobora gutuma Nkongwa zicika ndetse n’umusaruro ukiyongera.

Yagize ati, “Ku mpande zose rero ni ikintu kiza, abacuruzi b’inyongeramusaruro ububiko bwabo buzagenda mu buryo bwihuse bagire inyungu kandi abamamazabuhinzi nabo bazaba bakoze akazi ko guhuza umuhinzi nabo bacuruzi ndetse umuhinzi banamusanze aho ari ni ibintu bitanga igisubizo mu kongera umusaruro.”

TANGA IGITEKEREZO

Leave a Reply

Your email address will not be published. Required fields are marked *