Kigali-Rwanda

Partly cloudy
17°C
 

Uburyo abashaka gufasha abagizweho ingaruka na “Guma mu rugo” bakoresha

Yanditswe na TUMUKUNDE GEORGINE

Ku ya 27-07-2021 saa 16:20:44

Muri iki gihe Umujyi wa Kigali n’Uturere 8 biri muri gahunda ya Guma mu rugo ndetse hakaba hari n’imirenge 50 igiye kuyitangira, Minisitiri w’Ubutegetsi bw’Igihugu Gatabazi Jean Marie Vianney yasobanuye inzira zakwifashishwa n’abantu ku giti cyabo bashaka gushyigikira gahunda ya Leta yo guha ibiribwa abagizweho ingaruka na Guma mu Rugo, hirindwa ko bikorwa mu kajagari.

Binyuze kuri Twitter ya Minisiteri y’Ubutegetsi bw’Igihugu ( MINALOC), Minisitiri Gatabazi yasobanuye ko hatekerejwe ko umuntu ku giti cye, abacuruzi, inganda, imiryango isanzwe ifatanya na Leta n’abandi bafite ubushobozi bashaka gufasha abagizweho ingaruka na Guma mu Rugo, bajya bashyira amafaranga kuri konti yagenwe ya Minisiteri y’Imari n’Igenamigambi (MINECOFIN).

Avuga ko igihe haba hari ushaka gutanga ibindi bintu bitari amafaranga; nk’ibivuye mu nganda cyangwa ibikoresho bishobora guhita bitangwa ako kanya yabishyikiriza urwego rw’Akarere kugira ngo rurebe ababikeneye babishyikirizwe.

Yakomeje agira ati: “Ariko nanone ibyo ntibikuraho ko ufite ubushobozi, umuturage muturanye na we wamufasha ukamuha ibyo kurya arwaye cyangwa se atishoboye, ushobora no kumuha amafaranga kuri Mobile Money, umuvandimwe cyangwa se undi wakwitabaje ufite ubushobozi wabikora, icyo twanga ni akajagari cyangwa se kubona abantu bagenda banyuranamo bajya kujyana ibiryo, kandi twashyize abantu muri Guma mu Rugo bagomba kuguma mu ngo zabo”.

Muri uru rugamba rwo kurwanya ikwirakwira rya COVID-19, abaturage bagiye bagira umuhate wo kwishakamo ibisubizo bagafasha bagenzi babo batishoboye bari muri Guma mu Rugo cyangwa bagiye bashyirwa mu kato kubera ko banduye kiriya cyorezo batabasha kujya mu mirimo yabo ya buri munsi bakabaha ibiribwa, ntibaterere agati mu ryinyo ngo bumve ko ari gahunda bagomba guharira Leta.

Hari ingero zigenda zigaragara hirya no hino mu Gihugu; nko mu Karere ka Musanze batangije gahunda ya “Ntuburare mpari”, aho abaturage bakusanyijwe ibiribwa bunganira ibyatanzwe na Leta.

Mu Karere ka Rubavu, abaturage bo mu Murenge wa Gisenyi na bo bakusanyije ubushobozi bagurira abarwayi 68 ba COVID-19 bari gukurikiranirwa mu ngo litiro 600 z’amata ndetse n’imbuto zirimo marakuja, imineke, ibinyomoro ndetse n’inanasi. Abo mu Murenge wa Cyanzarwe bakusanyije ibiribwa birimo ibirayi, ibitoki, amashu, ibishyimbo n’ibindi basanzwe beza babishyikiriza imiryango 123.

Hari n’abandi bagiye baha imibyizi abari mu kato bakabahingira.

Abahawe ubu bufasha bashimira bagenzi babo bitanze bakababa hafi. Semuhungu Emmanuel na mushiki we Bankundiye bo mu Karere ka Rubavu, ni bamwe muri bo, bamaze icyumweru barwaye COVID-19 bashimiye abaturage bakusanyije ubushobozi bakabagurira amata n’imbuto kuko biba bikenewe cyane mu gihe umuntu arwaye iki cyorezo.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.