25°C , Mostly cloudy with thundershowers | Kigali-Rwanda

Uburezi bufite ireme ni umuhamagaro wa buri wese- Munyakazi

Yanditswe na MUGISHA BENIGNE

Ku ya 08-02-2018 saa 07:49:28

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye Munyakazi Isaac, aratangaza ko uburezi bufite ireme ari umuhamagaro wa buri wese.

Ibi Munyakazi Isaac yabigarutseho mu nama yamuhuje n’abayobozi b’ibigo by’amashuri, abayobozi ba komite z’ababyeyi mu mashuri n’abayobozi b’Akarere ka Rubavu mu rwego rw’ubukangurambaga ku burezi bufite ireme.

Munyakazi Isaac, umunyamabanga wa Leta muri MINEDUC ushinzwe amashuri abanza n’ayisumbuye (uhagaze hagati), Uwampayizina Marie Grace iburyo Visi meya ASOC na Lt Col Ndayizeye Egide (Foto Mugisha B)

Munyakazi yibukije ijambo Perezida wa Repubulika yavuze nyuma y’amatora, aho yibanze ku burezi bw’abana b’u Rwanda, asaba ko bwashyirwamo imbaraga bukagira ireme.

Yagize ati “Muribuka ubwo Perezida wa Repubulika yashimiraga Abanyarwanda nyuma y’amatora aherutse, yavuze ko abashinzwe uburezi bakwiye kubushyiramo imbaraga kandi yaduhaye ikizere cy’uko azi neza ko dushoboye, maze rero ntituzamutenguhe.”

Yabajije aba barezi niba koko babona bakora ibikwiriye ngo bubahirize umuhamagaro wa Perezida wa Repubulika n’Abanyarwanda bose.

Yagize ati “Mu ntangiriro z’amashuri abana baza ari benshi ndetse bikagera ku rwego rw’uko amashuri abamo ubucucike, byagera hagati bakaducika, dukwiye kureba impamvu zabyo.”

Yavuze ko kuba abana baza ari benshi mu mashuri atari ikibazo kuko hashakwa n’ingamba zo gukemura ikibazo cy’ubucucike, byaba byiza rero barigumyemo aho kuricika ngo bajye mu mihanda.

Yakomeje kubabaza impamvu bafite kugira ngo icyo bahamagarirwa nk’abarezi bakigereho.

Ati “Urebye umubare w’abana bakoze ibizamini ejobundi ukareba n’igihe binjiriye uko banganaga bitera impungenge. Kubera iki aba bana bata ishuri? Ni iyihe mpamvu? Bikwiye guhagarara.”

Munyakazi yagarutse ku babyeyi batita ku burezi bw’abana babo, aho umwana aba mu rugo mu gihe abandi barimo kwiga, kandi umubyeyi ugasanga nta cyo bimubwiye.

Ati “Mubyeyi nudakora icyo ugomba gukora umenye ko utazaba wujuje inshingano zawe. Ababyeyi si ababyaye gusa, ni buri wese wumva ko uburezi bw’abana bumureba, ni wa wundi wabyaye akarera.”

Yashimangiye imiyoborere ya komite z’ababyeyi mu mashuri, aho avuga ko ari ingenzi mu burezi kuko zifasha ubuyobozi bw’amashuri kurera.

Yanenze abarezi bashyira imbere kwaka amafaranga cyangwa kuvuga ku mafaranga y’ishuri, aho ababyeyi bahagamagarwa bakagira ubwoba bavuga bati ni amafaranga nta kindi.

Avuga ko ubukangurambaga bwatangijwe na Minisiteri y’Uburezi buba igisubizo k’iki kibazo k’ireme ry’uburezi. Ati “Buri wese agize icyo akora, iki kibazo cyabona igisubiza.”

Gahigi Sixbert ni umwe mu babyeyi wari witabiriye inama, avuga ko ari byiza ko Minisiteri y’Uburezi ifashe umwanya wo gukora ubukangurambaga ku ireme ry’uburezi ikanahwitura abarezi ngo bite ku byo bakora, asanga bizongera umuvuduko n’ireme mu myigishirize kandi bigakemura ibibazo bigaragara mu burezi.

Umuyobozi wa TTC Gacuba II, Bahizi Gerard, na we wari witabiriye iyi nama, yashimangiye ko ibyo umunyamabanga wa Leta muri Minisiteri y’Uburezi ushinzwe amashuri abanza n’ayisumbuye yavuze ari byo, ko abarezi bafite uruhare ku ireme ry’uburezi n’ubwo bagomba gufatanya n’abandi ndetse hakanaba n’ibindi bikenerwa kugira ngo ireme ry’uburezi rigerweho.

Avuga ko nk’abarezi bagiye kongera imbaraga mu byo bakora, bagashyira mu bikorwa ibisabwa gahunda ya Leta y’imyaka 7 mu burezi, nk’uko babisabwe n’Umukuru w’Igihugu.

TANGA IGITEKEREZO

Leave a Reply

Be the First to Comment!

avatar