19°C , Partly cloudy | Kigali-Rwanda
Amafumbire yahawe abahinzi bo mu turere tugize intara y'Amajyaruguru yongera umusaruro w'ibigori yatanzwe n' umushinga YARA (Foto Uwayisaba)

Uburasirazuba: Hatanzwe ifumbire nshya yo kongera umusaruro w’ibigori

Yanditswe na UWAYISABA FRANCINE

Ku ya 11-10-2018 saa 11:32:33

Abahinzi b’ibigori bo mu turere two mu ntara y’Uburasirazuba bahawe ifumbire nshya bongere  umusaruro uzabikwa mu buhuniko bushya buri mu Karere ka Kayonza.

Iyo fumbire yatanzwe n’Umushinga w’Abanyamerika ‘Hinga Weze’ ufatanya na Leta y’u Rwanda n’umushinga ukora ifumbire  yongera umusaruro YARA.

Gatari Egide ushinzwe gahunda ya Nkunganire mu kigo k’Igihugu cy’Ubuhinzi n’Ubworozi, (RAB), avuga ko hari hasanzweho ubundi bwoko bw’ifumbire yongera umusaruro butatu ariko bitewe n’impinduka z’ubutaka hanzurwa gushaka n’ubundi buhangana n’izo mpinduka.

Ati “Ubundi mu Rwanda hari hasanzwe ifumbire za NPK 17-17-17, DAP na IRE ariko kubera ko ubutaka bugenda buhinduka, intungagihingwa zikabamo nke, Minisiteri y’Ubuhinzi n’Ubworozi ifatanyije n’Umushinga ukora ifumbire yongera umusaruro YARA twatangiye kureba uburyo twakongera amafumbire ku buryo ikibura mu butaka cyose cyakongerwa muri ayo mafumbire.

Ni muri urwo rwego rero twakoze amafumbire avangavanze ibyiciro bitatu, amanini (macro), amato  (micro), n’uruvange rw’amafumbire manini n’amato (blends), za ntungagihingwa zikenewe ku buryo buto ukazivanga n’inini.

Ni bwo buryo rero YARA ifite kuko bafata intete imwe y’ifumbire ukayibonamo za ntungagihingwa zose zikenewe.”

Umuyobozi wa YARA, Peter Ngugi, avuga ko banezezwa no kubona umuhinzi yagize umusaruro ufatika ari na cyo gituma bakora iyi fumbire bakanayigeza ku baturage.

Ati “Turishima iyo tubonye umuhinzi yabonye umusaruro utubutse. YARA rero dukora ifumbire, tukayishyikiriza abaturage, tukanabasobanurira imikorere yayo kuko tuba twabikoreye ubushakashatsi, mu gihe abandi bayabashyira ariko atari bo bayakoze ugasanga ntibabasobanurira imikoreshereze yayo neza. Twe rero dukorana n’abahinzi imbonankubone na nyuma tukareba uko umusaruro wagenze kuko dushaka ko umuhinzi atera imbere, abantu bakareka kuvuga ko umuhinzi ari umukene.”

Amafumbire yahawe abahinzi bo mu turere tugize intara y’Amajyaruguru yongera umusaruro w’ibigori yatanzwe n’ umushinga YARA (Foto Uwayisaba)

Havugimana Emmanuel, umuhinzi w’ibigori mu Karere ka Kayonza, avuga ko bishimiye ifumbire nshya kandi biteguye kuyikoresha neza ngo umusaruro wiyongere.

Ati “Ubu tugiye guhingira ku gihe twongere umusaruro rwose, ariko impungenge dufite ni uko umusaruro wacu uzabura abawugura kuko n’igihembwe gishize ari ko byagenze umusaruro wabuze isoko.”

Havugimana avuga ko bifuza ko mu gihe hatanzwe ifumbire yongera umusaruro hakongerwa n’abashoramari bawugura kuko beza byinshi bikabura abaguzi n’ababonetse bagahenda cyane.

Ati ”Nk’ubu ikiro k’imbuto y’ibigori tukigura amafaranga y’u Rwanda 540, twasarura tukakigurisha 100, ariko nibura bibaye nka 250 twakwishima cyane kuko n’umuhinzi aba yavunitse.

Gatari avuga ko kugira ngo haboneke isoko ry’umusaruro, abahinzi na bo bagomba kubigiramo uruhare cyane.

Ati “Abaguzi b’umusaruro w’ibigori barahari kuko dufite ibigo by’amashuri, amagereza, na MINAGRI iragura ndetse n’abandi. Icyo dusaba abahinzi rero ni ugukorera mu makoperative, bagahuza ubutaka, bakanika hamwe abaguzi bazabasanga, kuko biragorana kubona umuguzi muri ahantu hatandukanye. Ikindi abahinzi birinde abamamyi kuko ni bo babahenda, ariko ubundi umusaruro ntugomba kugurishwa munsi y’amafaranga 160 ku kiro.”

Ubu umushinga YARA watanze ubwoko bw’amafumbire butanu bushya ari bwo SEREAL, AMIDAS, WINA, NITRABLE na TRACEL, akaba ari amafumbire mashya yemewe na Leta yo gukoreshwa mu kongera umusaruro w’ibigori ariko atazakuraho andi mafumbire asanzwe akoreshwa mu Rwanda.

TANGA IGITEKEREZO

Leave a Reply

Your email address will not be published. Required fields are marked *