23°C , Mostly cloudy with thundershowers | Kigali-Rwanda

Ubumenyi muvanye mu Itorero bubafashe kurwanya abifuza gusenya ibyagezweho – Kagame

Yanditswe na Twagira Wilson

Ku ya 08-08-2019 saa 16:05:56
Umukuru w'Igihugu Paul Kagame, ubwo yahaga impanuro Indangamirwa, yabasabye kwirinda ibiyobyabwenge, icuruzwa ry'abantu, ahubwo bagashyira imbere inyungu z'Igihugu.

Perezida wa Repubulika y’u Rwanda Paul Kagame akaba n’Umutoza w’Ikirenga, yasabye urubyiruko gukoresha ubumenyi bungutse mu Itorero bakiyubakamo ubushobozi bwabafasha kwima amatwi abashobora kwifuza gusenya ibyo igihugu kimaze kubaka.

Umukuru w’Igihugu yabisabye urubyiruko rugize ikiciro cya 12 cy’abagize Itorero Indangamirwa bakabakaba 700 bamaze ukwezi n’igice batozwa mu kigo cya gisirikare cya Gabiro mu Karere ka Gatsibo, aho bigishijwe amasomo atandukanye arimo ubwirinzi, amateka y’u Rwanda, n’amasomo ngiro mu bya gisirikare.

Itorero Indangamirwa ryasojwe kuri uyu wa 8 Kanama 2019 ryari rigizwe n’abanyeshuri 698 barimo abiga mu Rwanda no mu mahanga barimo abakobwa 214, abagabo 484, batangiye amasomo ku wa 24 Kamena 2019.

Ubutumwa Umukuru w’Igihugu yahaye urwo rubyiruko yibanze kubasaba gusigasira umuco nyarwanda bigishijwe, kumenya aho igihugu kiva n’aho kifuza kugana, gusesengura ibyo babwirwa hirya no hino mu bihugu babamo, kwirinda ibiyobyabwenge n’inzoga kuko ari bimwe mubishobora kubasenya no kumunga ubuzima bwabo.

Yagize ati:“Amasomo mwahawe mu itorero arimo kurasa, n’iby’intambara ni inyongeragaciro, ubumenyi muvanye mu itorero bubafashe kwiyubakamo ubushobozi bwatuma murwanya abashobora kwifuza gusenya ibyo igihugu kimaze kubaka”.

Ku byerekeranye n’uburere bahabwa mu itorero, Perezida Kagame yibukije urubyiruko Indangamirwa ko uburezi bushingiye ku muco, ndetse n’amasomo bahawe bagomba kubikoresha mu guharanira gutanga umusanzu wabo mubyubaka igihugu cyabo nk’Abanyarwanda bakunda igihugu cyabo.

Asaba abashinzwe itorero ry’igihugu, gutoza no kwigisha abakiri bato ururimi rw’ikinyarwanda atari kubigisha amateka gusa, kuko bituma abavuga ikinyarwanda badakomeza kukigoreka.

Minisitiri w’Ingabo Maj Gen Murasira Albert, avuga ko mu masomo abanyeshuri bize, 65% ari amasomo ngiro yo mu rwego rwa gisirikare, kumenya u Rwanda, n’andi masomo arebana no gukunda igihugu cyabo.

Mu ngendo shuri bakoze bakaba barasuye umupaka wa Kagitumba nk’amarembo y’urugamba rwo kubohora igihugu.

Bizimana Emmanuel mu izina ry’abatojwe mu mihigo y’intore bahigiye imbere y’Umukuru w’Igihugu yibanze kugufatanya n’abandi gushyira mu bikorwa ibyo bize birimo indangagaciro z’umuco aho baba mu mahanga, kwirinda ibiyobyabwenge n’icuruzwa ry’abantu, guteza imbere ibikorwa by’ubwitange bizamura umusaruro, kwigisha Abanyarwanda baba mu Rwanda no muri diaspora umuco w’ubutore, umusanzu mu kurwanya abasebya u Rwanda, abahakana n’abapfobya Jenoside, babarwanya bakoresheje imbuga nkoranyambaga n’ibindi.

Yasipi Kazimiri Uwihirwe mubagize isibo ryeretse Perezida Kagame, amasomo yo mu rwego rwa gisirikare bigishijwe, yasobanuye uburyo bwo gutegura urugamba kuva mu ntangiriro, guhera ku mabwiriza yibanze ku bayobozi, no kugeza ku basirikare bashinzwe gutegura urugamba, no kugeza ingabo zifatanyije nta gusobanya, kugeza batsinze umwanzi.

Muri rusange itorero Indangamirwa ryatangiye 2008 rigizwe n’urubyiruko ruba muri diaspora gusa, muri 2016, hiyongereyemo urubyiruko rw’indashyikirwa rwarangije amashuri yisumbuye, mu mwaka wa 2018 Itorero Indangamirwa hongewemo abakozi b’indashyikirwa baturutse muri Minisiteri n’ibigo bya Leta, harimo n’abarezi mu bigo by’amashuri, kugeza ubu abamaze gutozwa mu rwego rw’Itorero Indangamirwa bangana na 3, 169.

Iki kiciro cya 12 cyasoje kigizwe n’abanyeshuri bo muri diaspora biga mu bihugu birimo Amerika, Uganda, Canada, u Buhinde, Kenya Bubiligi, u Bwongereza, Australia, Saudi Arabia, Cameroun, China, Cyprus, Djibouti, Misiri, Ethiopia, u Bufaransa.

Umukuru w’Igihugu Paul Kagame, ubwo yahaga impanuro Indangamirwa, yabasabye kwirinda ibiyobyabwenge, icuruzwa ry’abantu, ahubwo bagashyira imbere inyungu z’Igihugu

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.