2017-08-18 19:28:21 clouds 27o High | Kigali Rwanda

Dukurikire:
 
 

Rusizi: Igitoki ‘kirarya umugabo kigasiba undi’

Yanditswe na IMVAHO NSHYA

Kuya 2016-12-27 05:41:54

 
Share on:
 
Yasuwe:148
 
Yavuzweho:200
 
10
 
10

Nubwo muri rusange abaturage b’uturere twa Rusizi na Nyamasheke bavuga ko ibiribwa byarushijeho kubura no kuzamura ibiciro cyane muri aya mezi ashyira iminsi mikuru ya Noheli n’ubunani, ariko ibiciro by’ibitoki byo byarushijeho kuzamuka, biranabura cyane.

Abaturage baganiriye n’Imvaho Nshya bagaragaje ko magingo aya ibiciro by’igitoki byikubye inshuro zirenga eshatu, iki akaba ari ikibazo bemeza ko gikomeye.

Ubwo Imvaho Nshya yageraga mu isoko rya Gishoma mu karere ka Rusizi, mu gace kari gasanzwe kazwiho kuba ikigega cy’aka karere ku buhinzi bw’urutoki, iri soko na ryo rikaba ryari rizwiho kutabibura, abasanzwe babicuruza bayitangarije ko ibitoki bisigaye birya umugabo bigasiba undi.

JPEG - 101.6 kb
Gufungura igitoki byabaye ingorabahizi ku baturage b’i Rusizi na Nyamasheke

Bagaragaje ko ibiciro byabyo byahanitse kurushaho, bamwe bakavuga ko byaba biterwa n’indwara ya kirabiranya n’urubura byabyibasiye mu bihe bishize, abandi bakavuga ko n’abanyekongo badukanye umuco wa kurya ibitoki batagiraga kera, bakaba baza bakabimaraho, abandi bakabura ibyo batwara.

Umwe mu bagore babicuruza muri iri soko yagize ati “Kurya igitoki muri iki gihe ni ukukibarira imibare nk’uko umuntu atekereza kugura umwenda cyangwa ibikoresho by’ishuri by’abana, kuko nk’igitoki washoboraga kubona ku mafaranga 1500 mu bihe bishize ubu ntiwakibona munsi y’amafaranga 4,500. Kubona hari n’igitoki gishobora kurenza amafaranga 10.000 kandi nko mu mwaka ushize bitarashobokaga ni ikibazo gikomeye cyane natwe ubwacu cyaturenze.”

Undi mugore wari waje kubihaha we na we yagize ati “Aho birushaho kutuyoberera ni uko n’abanyekongo binemfaguzaga ibitoki mu minsi ishize ubu batabirebera izuba, baraza n’uduhari bagakumunzura kandi bo ikibazo cy’amafaranga ntibaba bagifite, ugasanga twe tubuze ibyo tugura, kuko nk’ubu kuvuga ngo ngure agatoki kangana urwara ku mafaranga 5000 binkomereye, tugasanga iki ari ikibazo kidukomereye.”

Umuyobozi w’aka karere wungirije ushinzwe iterambere ry’ubukungu, Kankindi Léoncie, avuga ko koko ibitoki bihenze cyane, bigaterwa n’uko imirenge ya Gashonga, Rwimbogo na Nzahaha izwi ho kubyeza cyane yagiye ihura n’urubura rukabyangiza cyane, bigakubitiraho n’indwara ya kirabiranya yibasiye utu turere twombi, urutoki rukahazaharira.

Ati “Turakora ibishoboka byose ngo dukangurire abaturage guhinga urutoki rwa kijyambere no kurushaho gukorera uruhari ngo turebe ko igiciro cyabyo cyasubira hasi, ariko ntawahakana ko bihenze cyane.”

Arabihurizaho n’uyobozi w’ishami ry’ubuhinzi, ubworozi n’umutungo kamere mu karere ka Nyamasheke, Sengambi Albert, uvuga ko hakwiye ingamba zihamye zo kongera umusaruro w’urutoki, kuko bikomeje gutya mu minsi iri imbere igitoki cyakwibagirana mu mafunguro ya buri munsi y’abaturage.

Ubwo yageraga mu murenge wa Karengera muri aka karere muri Kanama uyu mwaka, uwari Gitifu w’intara y’Uburengerazuba Jabo Paul, yababajwe na rumwe mu rutoki yabonye rurutwa n’urutariho, asaba abaturage kuruvugurura na bo biyemeza kubikora.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE