2017-06-27 12:16:32 clouds 27o High | Kigali Rwanda

Dukurikire:
 
 

Rusizi:Arishimira iterambere amaze kugeraho nyuma yo kureka ubucuruzi bw’akajagari

Yanditswe na IMVAHO NSHYA

Kuya 2017-06-07 13:18:30

 
Share on:
 
Yasuwe:96
 
Yavuzweho:200
 
10
 
10

Mukamusoni Marie Gertrude, umugore w’imyaka 28, utuye mu kagari ka Cyangugu, mu murenge wa Kamembe, mu karere ka Rusizi, arishimira ko umwuga w’ubudozi yagiyemo nyuma yo kureka gucuruza nk’umuzunguzayi, umaze kumuteza imbere ku buryo bufatika.

Uyu mugore aganira n’Imvaho Nshya yagaragaje ko ubuzunguzayi yabumazemo igihe kirekire mu mujyi wa Rusizi, ariko nyuma aza kurambirwa guhora akwepakwepana n’abashinzwe umutekano bababuzaga gucuruza mu kajagari, yiga umwuga wo kudoda,none niwo umutunze.

JPEG - 203.4 kb
Mukamusoni Gertrude yishimira aho agejejwe n’umwuga w’ubudozi

Mukamusoni yatangaje ko ntakiruta kwiga umwuga ukawumenya neza, kuko umwuga w’ubudozi yize mu gihe cy’umwaka wamugejeje kuri byinshi byiza, aho yemeza ko atunze umuryango we neza kuko hari igihe umugabo aba adafite kazi we agatunga urugo, kuruta uko yari ameze akiri muri marato, aho yashoboraga gutaha ntacyo atahanye, cyangwa ibyo yacuruzaga babimwambuye, ariko ubu ngo ayo adodeye yose arayacyura.

Yagize ati “Nabayeho umugabo adafite akazi mbura uko mbigenza njya muri marato, gusa ni akazi utagira undi inama yo kugakora kuko nta mutuzo gatanga, mu gihe ubuyobozi buba buvuga ko kabangamye hari abagore bakizirikaho ariko icyiza ni ukwiga umwaga kuko aho nafatiye icyemezo cyo kujya ku itorero Inkuru Nziza hano mu mujyi wa Rusizi nkiga ubudozi, aho nabonye impamyabushobozi umwaka ushize ngatangira kudoda, mbasha kubaho neza, nkaba nzi ayo ngomba gucyura.”

Avuga gusa ko abize imyuga nk’iyi y’ubudozi hari igihe bahura n’ikibazo cy’ibikoresho bidahagije, ariko we ngo agenda abigura gahoro gahoro mu nyungu abona ufite ibikorwa byagutse.

Asaba abandi bagore n’abakobwa bakiri muri marato mu mujyi wa Rusizi kuyivamo bakiga umwuga wabateza imbere mu gihe kirambye aho guhora bateza ibibazo ubuyobozi, kuko na we atashoboraga kubona amafaranga y’igitanda ngo yicare hamwe ariko ubu aradoda bikamuha n’umwanya wo kumenya imibereho y’abana be kumanywa na nijoro.

Ku rundi ruhande ariko asaba akarere n’abafatanyabikorwa bako kuba hafi abagore n’abakobwa biyemeje kuva muri marato bakiga umwuga, bababumbira hamwe mu makoperative, bakabaguriza imashini n’ibindi bikoresho bakenera, bakajya babyishyura buhoro buhoro, kuko ngo abona byatuma benshi muri bo basezerera ubuzunguzayi.

Yagize ati “Kuva aho mviriyeyo ngatangira kudoda hari bagenzi banjye 10 babonye uko mbayeho na bo baza kwiyandikisha aho nize ngo batangire bige, gusa usanga bibaza uko bazabigenza nibarangiza kwiga, ngahera hano nsaba akarere kutuba hafi kugira ngo n’iyi marato icike mu buryo bworoshye, batuvuganire ku baterankunga tubumbirwe mu makoperative, tugire aho dukorera hazwi.

Batugurize ibikoresho birimo n’amamashini, twishyure buhoro buhoro kandi ndahamya ko bizatuma n’abandi benshi bareka marato bakadukurikira.”

Umuyobozi w’akarere ka Rusizi, Harelimana Frédéric, asaba abagore bacuruza mu kajagari kwigana abagore nk’aba babivamo bagashaka umwuga urambye bakora, akavuga ko bazakomeza gushishikariza n’abandi bagore n’abakobwa bakiri muri ubu bucuruzi butemewe kandi usanga bubangamira abacururiza mu mazu kubireka bagakora ibitabangamiye abandi.

Ati “Turasaba ko abakiri mu bucuruzi nk’ubwo bwa marato babireka bagakora mu buryo butagize abandi bubanganiye cyane cyne biga imyuga ishobora kubateza imbere byoroshye nk’iyo y’ubudozi n’indi, natwe akarere tuzakomeza kubashyigikira no kubaba hafi mu byo badashoboye dushobora kubona.”

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE