2017-06-27 12:16:32 clouds 27o High | Kigali Rwanda

Dukurikire:
 
 

RITCO ivuye mu misoro y’abaturage, ntizahombe nka ONATRACOM - Dr Nzahabwanimana

Yanditswe na IMVAHO NSHYA

Kuya 2017-02-08 00:00:00

 
Share on:
 
Yasuwe:1183
 
Yavuzweho:200
 
10
 
10

Umunyamabanga wa Leta muri Minisiteri y’Ibikorwaremezo ushinzwe gutwara Abantu n’Ibintu, Dr Nzahabwanimana Alexis, yagiriye inama ubuyobozi bwa RITCO (Rwanda Inter-linking Transport Company) kuzacunga neza iyi sosiyete yo gutwara abantu ihuriweho na Leta n’abikorera, kugira ngo ntizahombe nka ONATRACOM.

Ibi yabivuze ubwo yafunguraga ku mugaragaro iyi sosiyete ku wa Mbere ku ya 6 Gashyantare 2017, ahereye ku gihombo gikomeye cyatumye ONATRACOM iseswa burundu.

Yagize ati “ONATRACOM yakoze igihe kirekire ihomba birangira isheshwe isimburwa na RITCO, ntibikwiye ko iyi sosiyete nayo ihomba kuko ivuye mu misoro y’abaturage no mu mbaraga z’abikorera. Igomba gucungwa neza ikazakomeza kwaguka.”

JPEG - 113 kb
Umunyamabanga wa Leta muri Minisiteri y’Ibikorwa Remezo, Dr. Nzahabwanimana, ubwo yafunguraga ku muguaragaro ’RITCO’

Uyu muyobozi yavuze ko ONATRACOM yazize kuba yari iya Leta, kuko ititaweho mu buryo buhagije n’abakoreshaga imodoka zayo bazita iza Leta, aho icyuma cyapfaga muri bisi imwe, kigakurwa mu yashaje mbere aho kugura igishya ngo ndetse n’iyashaje ikoreshwe isubire mu muhanda.

Dr Nzahabwanimana akomeza agira inama abayobozi ba RITCO n’abashoferi bazo kuzitwararika gukoresha neza izi bisi zikungukira Abanyarwanda, zigasaza zisiga izindi, aho kuba nka ONATRACOM yahombye ntihagire igisigara.

Ati “RITCO ije gukosora ibibazo byagaragaye muri ONATRACOM, imodoka zayo zarasazaga ntizigire izizisimbura, ariko turifuza ko iza RITCO zizajya zisaza zisiga izindi.”

Yagarutse ku itandukaniro riri hagati ya RITCO na ONATRACOM, aho avuga ko bisi za ONATRACOM zaturukaga mu mfashanyo mu gihe iza RITCO zivuye mu misoro y’Abanyarwanda n’imbaraga z’abikorera.

Ati “ Iyo ubonye ibintu utavunitse ubifata uko wishakiye, ariko iyo wabibonye wiyushye icyuya, ubifata neza ndetse ukabibyaza umusaruro.”

JPEG - 67.1 kb
Imodoka za ONATRACOM ngo zazize kwitwa ko ari iza Leta

Uzashaka gushora imari mu gutwara abantu azakiranwa yombi

Dr. Nzahabwanimana yasabye abikorera muri rusange gukomeza ubufatanye mu gutwara abantu n’ibintu, avuga ko uwaza yifuza kuba umufatanyabikorwa wa Leta muri iyi gahunda wese yakwakiranwa yombi kuko Leta yifuza gukura abaturage bayo mu bwigunge.

Ati “Umushoramari wese yaza asaba kuba umufatanyabikorwa wa Leta mu gutwara abantu n’ibintu tuzamwakirana yombi. Na RFTC ivuze ko ikeneye indi migabane iruta iyo ifite yayibona, icyo dushaka nka Leta n’uko abaturage babona uko bakora ingendo zabo, bagahahirana, bagatembera igihugu nta mbogamizi y’ibinyabiziga.”

Umunyamabanga wa Leta muri Minisiteri y’Ibikorwaremezo yashimye cyane bisi zaguzwe na RITCO, ayagereranya n’indege n’ubwo zo zigendera mu kirere.

Ati “Iyi modoka ni nk’indege, irisanzuye, itanga umutuzo ku bagenzi, uwashaka yaryama, akicara, agasoma ibitabo. Ifite aho abagenzi bicara, ifite ahashyirwa imizigo, ni nk’indege neza neza.”

Dr Nzahabwanimana yashimiye cyane abikorera bagira uruhare muri gahunda yo gutwara abantu n’ibintu, avuga ko atari inyungu y’amafaranga gusa baba bagendereye, ko harimo no gufasha sosiyete ndetse no kwitanga.

Yongeyeho ko gutwara abantu n’ibintu ari kimwe mu biranga iterambere ry’igihugu, asaba kubikora neza, bita ku baturage bakora ingendo za kure, bakabaha serivisi nziza, bakishimira gutemberera u Rwanda.

RITCO Ltd yashinzwe mu Nama y’abaminisitiri yo kuwa 16 Ukuboza 2015 yakuyeho ONATRACOM. Ni ikigo Leta ifatanya n’Abikorera. Leta ifitemo 52%, naho 48% ikaba iy’ikigo RFTC gisanzwe gitwara ibintu n’abantu mu Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE