2017-06-27 12:16:32 clouds 27o High | Kigali Rwanda

Dukurikire:
 
 

‘Nk’uwikorera’, gahunda y’imiyoborere itsura iterambere

Yanditswe na IMVAHO NSHYA

Kuya 2017-06-07 08:38:37

 
Share on:
 
Yasuwe:58
 
Yavuzweho:200
 
10
 
10

Ku wa 30 Werurwe uyu mwaka, Nyakubahwa Minisitiri w’Intebe, Makuza Bernard, yatangije ku rwego rw’igihugu gahunda ya Nk’uwikorera, igamije gukangurira abantu kurushaho kwita no kunoza serivisi Abanyarwanda batanga mu nzego zose, Leta y’u Rwanda yahisemo guha umuturage agaciro, akaba ishingiro ry’imiyoborere n’iterambere u Rwanda rushaka kugeraho.

Gutanga serivisi nziza ni intego Leta y’u Rwanda yihaye mu rwego rwo kubaka ubukungu bushingiye kuri serivisi kuko urwego rwa serivisi rugira uruhare mu iterambere ry’ubukungu bw’u Rwanda ku gipimo cya 48%. Mu cyiciro cya kabiri cya gahunda y’imbaturabukungu (EDPRS II), u Rwanda rwihaye intego ko imitangire ya serivisi izaba igeze ku kigero cya 85% mu mwaka wa 2018.

Uburemere Leta y’u Rwanda iha serivisi inoze na none kandi bugaragarira mu myanzuro yagiye igarukwaho haba mu mwiherero w’Abayobozi bakuru b’igihugu no mu Nama y’Igihugu y’Umushyikirano; isaba ko hashyirwa ingufu mu kunoza imitangire ya serivisi.

JPEG - 243 kb
Prof. Shyaka Anastase, Umuyobozi w’Urwego rw’Igihugu rw’Imiyoborere

Itegeko N°56/2016 ryo ku wa 16/12/2016 rishyiraho Urwego rw’Igihugu rw’Imiyoborere (RGB) rikanagena inshingano, imitunganyirize n’imikorere byarwo, ryahaye RGB inshingano yo kugenzura mu buryo buhoraho imitangire ya serivisi n’iyubahirizwa ry’amahame y’imiyoborere myiza mu nzego za Leta, iz’abikorera n’imiryango itari iya Leta.

Hashingiwe ku mpamvu zavuzwe haruguru zose, Urwego rw’Igihugu rw’Imiyoborere rwashyizeho gahunda ya “Nk’uwikorera” kugira ngo Abanyarwanda bakomeze guha ireme serivisi batanga, buri wese yishyira mu mwanya w’umusaba serivisi n’uko yakwifuza kuyihabwa ari we uyisaba.

Mu kiganiro Imvaho Nshya yagiranye n’Umukuru w’Urwego RGB, Prof. Shyaka Anastase, yayitangarije ko gahunda yiswe “Nk’uwikorera” ibera mu gihugu cyose, ikaba imaze ibyumweru 10 mu byumweru 12 izamara. Asobanura ko hari serivisi zitandukanye zigikemangwa n’abazigenerwa ari na yo mpamvu y’iyi gahunda mu kugabanya ahakigaragara icyuho.

JPEG - 527 kb
Gutanga serivisi inoze ni inshingano zongerera agaciro imiyoborere myiza y’igihugu

Si ubwa mbere hatangijwe ubukangurambaga ku gutanga serivisi nziza kuko hari na gahunda yiswe “Na yombi” ariko umwihariko w’iyi gahunda “Nk’Uwikorera” ni uko izibanda kuri gahunda zigenerwa abaturage cyane cyane izagenewe abatishoboye ntizibagereho nk’uko bikwiye.

Prof. Shyaka agira ati “Iyi gahunda ije kugereka ibuye ku rindi kuri gahunda zabanje, ariko umwihariko wayo twe turareba umuturage cyane, ari ukeneye serivisi z’ubuhinzi n’ubworozi, ari wa muturage w’umukene Leta y’u Rwanda yifuza kuzamura, akagenerwa porogaramu nk’iz’isuku n’isukura, imikorere y’amakoperative, abikorera n’amahoteli ariko ntizimugereho neza. Urugero niba ari Girinka, turifuza ko imugeraho kandi ari we uyigenewe, niba ari ugenewe inguzanyo ya VUP nabe ari we uyigenerwa.”

Prof. Shyaka avuga kandi ku kamaro k’itegeko No 51 ryo ku wa 19 Ukuboza 2016 ryasohotse mu Igazeti ya Leta ryavuzwe hejuru, agira ati “Twahawe ububasha ku bigo bya Leta ndetse n’ibyigenga ku buryo aho tuzajya tubona hari amakosa tuzajya dusaba ibisobanuro byaba ngombwa tugasabira ibihano inzego cyangwa abakozi babigizemo uruhare.”

Prof. Shyaka avuga ko ikigamijwe atari uko habaho ibihano ahubwo ari uko abantu bakora neza, abahabwa serivisi bakayihabwa neza. Ashimangira ko abatanga serivisi bagomba kugira imyumvire yo gutanga serivisi nk’uwikorera kandi ntibibe intero gusa ahubwo bigashyirwa mu bikorwa.

Ishusho y’uko abaturage babona ibibakorerwa mu nzego zibegereye

Mu rwego rwo kugaragaza uko abaturage banyurwa n’imitangire ya serivisi mu nzego zinyuranye, Urwego rw’Igihugu rw’Imiyoborere (RGB) buri mwaka rukora ubushakashatsi bugaragaza ishusho y’uko abaturage babona ibibakorerwa mu nzego zibegereye, ari bwo Citizen Report Card (CRC) mu rurimi rw’Icyongereza.

Impuzandengo y’umwaka wa 2015 yari 71.1% mu gihe iy’umwaka wa 2016 ari 67.7%. Mu nzego z’ibanze, abaturage bishimiye serivisi bahawe ku gipimo cya 57.4% mu mwaka wa 2015 na 66.5% mu mwaka wa 2016.

Ubuhinzi n’Ubworozi

Umugabane munini w’Abanyarwanda batunzwe n’ibikomoka ku buhinzi n’ubworozi ariko igipimo abaturage bishimiraho serivisi z’ubuhinzi n’ubworozi kiri hasi ya 50%, ukuyemo kubonekera igihe kw’imbuto n’ifumbire bishimwa ku rugero rwa 62.9%.

Kubonera amasoko umusaruro biri mu byo abaturage binubira cyane. Ibi bitagenda neza mu rwego rw’ubuhinzi n’ubworozi byagiye bituruka ahanini ku kibazo cy’izuba ryacanye henshi mu gihugu, n’indwara zibasiye ibihingwa n’amatungo.

Gahunda zigamije kuzamura abaturage

Nk’uko ubushakashatsi bwa CRC 2016 bubigaragaza, hari ibibazo byinshi abaturage banenga muri gahunda zo kuzamura abaturage nka VUP na Girinka. Ubushakashatsi bugaragaza ko impuzandengo y’uko abaturage bishimira serivivisi zitangwa muri izi gahunda ku rwego rw’igihugu ari 59.1% kuri VUP na 65.3% kuri Girinka, mu gihe abazinenga babarirwa kuri 32.9% na 28.1%.

Mu karere ka Rutsiro ni ho izi gahunda zinengwa n’abaturage cyane ugereranije n’ahandi mu gihugu, aho banengwa serivisi bahabwa muri gahunda ya Girinka ku gipimo cya 73.3%. Ruswa, itonesha, akarengane biri mu biza ku isonga bitungwa agatoki kuba nyirabayazana yo kunenga izi gahunda.

Na none ubushakashatsi bwa CRC 2016 bugaragaza ko umugabane munini w’abaturage batishimiye ibyiciro by’Ubudehe bashyizwemo. Urugero, abishimiye cyangwa se abemeranya no kuba barashyizwe mu cyiciro cya mbere bangana na 66.5%, mu gihe abangana na 41.7% bonyine ari bo banyuzwe no kuba barashyizwe mu cyiciro cya kane.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE