2017-08-20 07:43:55 clouds 27o High | Kigali Rwanda

Dukurikire:
 
 

Ni iki Agace Kihariye k’Inganda ka Kigali kamaze kungura u Rwanda?

Yanditswe na IMVAHO NSHYA

Kuya 2017-03-31 07:34:57

 
Share on:
 
Yasuwe:1210
 
Yavuzweho:200
 
10
 
10

Nyuma y’imyaka itanu imishinga ibiri Rwanda Free Zone ndetse na Kigali Industrial Park bihurijwe hamwe bigahindurwa Kigali Special Economic Zone , aka gace kamaze kuba igisubizo ku bicuruzwa byavanwaga hanze byinjira mu gihugu.

Gahunda yo gushyiraho ahantu hihariye hagenewe inganda haba mu mujyi wa Kigali ndetse no mu bindi bice by’igihugu byashyizweho hagendewe kuri gahunda ya Leta y’u Rwanda y’imyaka irindwi yo guteza imbere urwego rw’inganda no kugabanya ibyinshi mu bicuruzwa byavaga hanze y’u Rwanda ndetse no kuzamura ireme ry’ibikorerwa mu Rwanda.

Ahantu hihariye hagenewe inganda mu mujyi wa Kigali Kigali Special Economic Zone yubatswe mu byiciro bibiri. Icyiciro cya mbere gifite ubuso bungana nahegitari 98; cyamaze kugezwamo ibikorwaremezo. Ubu hababa harimo inganda 32 ndetse n’ububiko 15 (warehouses) zatangiye gukora. Inganda 19 na warehouses 7 zisigaye zirimo gusoza imirimo y’ubwubatsi.

JPEG - 163.7 kb
Igice cyahariwe inganda mu mujyi wa Kigali

Icyiciro cya kabiri kigizwe nahegitari 178 cyatangiye gutunganwa muri 2014. Ubu kimaze kugezwamo amazi n’amashanyarazi. Imihanda ijyayo imaze gutunganwa kukigereranyo cya 97%. Ubu hari inganda 4 zatangiye gukoreramo.

Abatangiye gukorera mu gice cyahariwe inganda mu mujyi wa Kigali barishimira iterambere bamaze kugeraho.

Bamwe mu bakorera mu gice cyahariwe inganda mu mujyi wa Kigali, Prime Economic Zone bavuga ko nyuma yaho gitangiriye gukora urubyiruko rwinshi rwabashije kubona imirimo ndetse n’abacuruzi baza gushaka ibikorerwa mu Rwanda barushaho kwiyongera.

Umuyobozi wungirije mu ruganda rukora imyenda C&H Made in Rwanda, Hitimana Saidi avuga ko nyuma yaho ahantu hihariye hagenewe inganda mu mujyi wa Kigali hatangiriye gukorerwamo abashoramari bakomje kuza gukorera mu Rwanda ari benshi. Hitimana yagize ati “ Umushoramari washinze uru ruganda C&H yaje gukorera mu Rwanda kubera ubuyobozi bwiza yari amaze kubona mu Rwanda ndetse n’isuku.

Hitimana yagize ati “ Ukurikije imyenda uruhanda C&H Made in Rwanda rukora imyinshi ijya hanze y’u Rwanda ku mugabane w’u Burayi ndetse no muri Amerika ntabwo ari ikintu cyoroshye kuza gushinga uruganda mu Rwanda nyamara u Rwanda ari igihugu kidakora ku nyanja uburyo bwo kugeza ibicuruzwa aho bigomba kujya buragoye ariko bemeye kuza gukorera mu Rwanda kubera ubuyobozi bwiza bw’u Rwanda. Iki n’ikimenyetso kigaragaza ko ubuyobozi bwiza ari isoko y’iterambere.”

Hitimana yakomeje avuga ko kuva aho u Rwanda ndetse n’ibindi bihugu byo mu muryango w’Afurka y’Iburasirazuba batangiriye gahunda yo guca caguwa, uruganda rwa C&H Made in Rwanda rwagabanyijemo ibice bibiri uruganda aho bamwe bakora imyenda igomba kugurishwa mu gihugu abandi bagakora imyenda yo kugurisha hanze y’igihugu. Ibi ngo byakozwe muri gahunda yo gufasha Leta guca imyanda ya Caguwa hakorwa indi yo ku yisimbura.

Hitimana yakomeje avuga ko nyuma yaho uru ruganda rutangiye gukorera byafashije urubyiruko rwinshi rwari mu bushomeri kubona akazi.

Yagize ati “ Uruganda ku ikubitiro rwatangiranye abakozi 200 abenshi ari urubyiruko ariko ubu uruganda rufite abakozi bose hamwe 850 bose bakora akazi neza kandi bibeshejeho n’imiryango yabo. Ubu uruganda rukomeje kugenda rwaguka bakomeje kubaka ndetse bafite intego ko mu mwaka wa 2019 uruganda ruzaba rumaze guha akazi abantu basaga 4000.”

Kwikiriza James n’umwe mu bakozi b’uruganda C&H Made in Rwanda avuga ko yatangiranye n’uruganda mu mwaka wa 2015, atangira yiga kudoda ari ubu akaba afite itsinda ry’abadozi b’imyenda ayobora mu ruganda C&H Made in Rwanda.

Kwikiriza yagize ati “ Natangiye gukora mu ruganda mu mwaka 2015 ubwo rwatangiraga ntangira aribwo bwa mbere nize kudoda ariko kuko nari mfite ubushake bwinshi nakomeje kuzamura ubumenyi ndetse bampa imashini yo gukoresha ndabishobora nabona akanya nkiga n’izindi mashini bakomeza kunzamura ubu ngeze ku rwego rwaho nyobora itsinda ry’abadoda. Kuba nkora mu ruganda rwa C&H Made in Rwanda hari aho bimaze kungeza. Ubu ndabasha gufasha umubyeyi wanjye mu bikorwa byinshi bisaba amafaranga ndetse mfasha na murumuna wanjye kwiga kaminuza. Nanjye niga mu cyahoze ari KIE aho niga Igishinwa, icyarabu ndetse n’icyongereza.”

Ntabwo ari muri Kigali gusa no muzindi ntara inganda zakomeje kubakwa ari nyinshi
Gahunda yo guteza imbere inganda ntabwo yibanze mu mujyi wa Kigari gusa kuko no munzindi ntara hakomeje kubakwa inganda zigiye zitandukanye. Mu karere ka Rwamagana mu ntara y’Iburasirazuba ni kamwe mu turere kamaze kugeramo inganda nyinshi.

Imvaho Nshya twasuye uruganda rwa Steelrwa Industries Ltd rukora ibyuma bya fer à béton aho abakozi bakora muri uru ruganda bavuga ko bamaze kwiteza imbere babikesha akazi bakora muri uru ruganda.

Nk’uko ubuyobozi bw’uru ruganda rwabitangarije Imvaho Nshya uruganda rwa Steelrwa Industries Ltd rufite abakozi 255 bahoraho rufite inzobere z’abakozi bakomoka mu gihugu cy’Ubuhinde 30 ndetse n’abakozi ba nyakabyizi bari hagati ya 50 na 60.

Uruganda rwatangiye kubakwa mu mwaka 2009 rutangira gukora Steelrwa mu mwaka wa 2011 ubu rukaba rumaze kgira ubushobozi bwo gukora Toni 1000 za fer à béton.

Mwesigwa Emmanu3l yatangiye gukorera mu ruganda rwa Steelrwa Industries Ltd mu mwaka wa 2010 akaba yarabashije kwiyubakira inzu ava mu bukode, abasha kwigurira isambu kandi ubuzima burakomeje.

Mwesigwa yagize ati “ Kuva ntangiye gukorera muri Steelrwa Industries Ltd nabashije kwiteza imbere mu buryo bugiye bunyuranye. Nabashije kwigurira inzu ndetse n’isambu akazi nkora gatuma umuryango wanjye ubasha kubaho neza nkabasha kubashakira ubwisungane mu kwivuza n’ibindi.”

Sebazungu Samuel ukomoka mu karere ka Nyaruguru avuga ko yatangiye gukorera mu ruganda rwa Steelrwa Industries Ltd mu mwaka wa 2011 ariko yamaze kugura ikibanza hafi y’uruganda abana be abasha kubarihira amafaranga yishuri n’ibindi.

Yagize ati “ Akazi nkora karantunze kandi gatunze n’umuryango wanjye nabashije kwigurira ikibanza cyo kubakamo, abana banjye bariga neza kandi nzakomeza gukorera Steelrwa Industries Ltd mu rwego rwo gukomeza kwiteza imbere.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE