2017-08-20 07:43:55 clouds 27o High | Kigali Rwanda

Dukurikire:
 
 

Inanasi zo mu karere ka Kirehe zigiye kubona isoko muri Amerika

Yanditswe na IMVAHO NSHYA

Kuya 2017-06-16 06:25:49

 
Share on:
 
Yasuwe:257
 
Yavuzweho:200
 
10
 
10

Ikigega cya Leta Zunze Ubumwe za Amerika gitsura iterambere muri Afurika, USADF yemereye abahinzi b’inanasi bo mu karere ka Kirehe, bibumbiye muri koperative Tuzamurane, ko umusaruro wabo uzabonerwa isoko ryagutse muri USA.

Ubwo muyobozi wa USADF, C.D. Glin, yasuraga Tuzamurane yishimiye cyane uko babyaje umusaruro inkunga iki kigega cyabateye.

Glin avuga ko yatunguwe bikomeye n’iterambere Koperative Tuzamurane igezeho mu gihe cy’imyaka 8 gusa bayitera inkunga, akemeza ko ibikorwa byayo ari indashyikirwa haba mu Rwanda ndetse no muri Afurika muri rusange.

JPEG - 99.8 kb
Ubuyobozi bwa USADF bwashimye imikorere ya Koperative Tuzamurane bunayemerera kwagura isoko ryayo

Yavuze ko bagomba kuyifasha kwagura isoko ry’inanasi basanzwe bafite i Burayi, rikagera no muri Amerika.

Aganira n’Imvaho Nshya, yagize ati “Nari mfite amatsiko yo kubona imikorere yabo, ariko ibyo nabonye n’amaso yanjye ni uko iyi koperative ari intangarugero mu zindi dufatanya mu Rwanda. Ibyo iyi koperative yagezeho ku bw’inkunga yabonye ivuye mu kigega cyacu yaba mu kwagura ubuhinzi, kongerera agaciro umusaruro, no kugura ibikoresho bibafasha mu buhinzi bwabo.

Ni iterambere ryiza twifuza ko byabera urugero abo mu bindi bihugu dukoreramo. Ikindi ni uko tuzakomeza kubafasha no kubona amasoko yagutse y’ibyo bakora, ku buryo no mu gihugu cyacu i Washington bazajya bahohereza inanasi zumishije.”

Ikigega USADF cyatangiye gukorana na Koperative Tuzamurane mu mwaka wa 2009. Mu mwaka wa 2015 iki kigega cyafashije iyi koperative kubona isoko ry’umusaruro w’inanasi ku mugabane w’u Burayi, mu gihugu cy’u Bufaransa.

Inanasi zoherezwa mu Bufaransa ni toni 12 ku mwaka, ziba zatunganyijwe zikumishirizwa mu ruganda rwa koperative Tuzamurane, kugeza ubu rufite imashini ebyiri.

Hakuzimana Jean Damascène, Umuyobozi wa Koperative Tuzamurane, ahamya ko gukorana n’ikigega cy’Amerika gitsura iterambere muri Afurika byazamuye iterambere ryabo.

Yagize ati “Nk’ubu igiciro cyarazamutse, cyavuye ku mafaranga y’u Rwanda 60 twagurishagaho inanasi yose muri za 2005, ariko ubu turagurisha ku mafaranga 130 ku kilo kimwe, kandi inanasi ishobora no kugira ibilo 3-4. N’igiciro kizakomeza kizamuke, kuko uko tugenda tubona isoko rishimishije tugenda tuzamura igiciro cy’umunyamuryango, ibyo rero bigatuma umusaruro we awubonamo amafaranga amufasha, kandi ntiwangirike.”

Yunzemo ati “Mu byo twavuganye n’umuyobozi bw’ikigega USADF harimo ko bazakomeza kutwunganira mu kwagura amasoko. No muri Amerika, yavuze ko tuzacuruzayo kandi ni amahirwe, kuko abahinzi cyangwa abanyamuryango bacu babibonamo inyungu.”

Ubuyobozi bw’Umurenge wa Gahara, butangaza ko buzakomeza gukorana bya hafi n’abahinzi b’inanasi bagize Koperative Tuzamurane mu rwego rwo kunoza imikorere no kongerera agaciro umusaruro w’ibikorerwa mu Rwanda byoherezwa hanze.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE