Advertisement
 
 
 
 
 
 
 
 

Ubukungu

Abaturage b’i Rusizi batewe inkeke n’igiciro cy’ibiribwa cyazamutse bikabije   

  Yanditswe na BAHUWIYONGERA SYLVESTRE
 1 month ago

 
 

Abatuye mu mirenge hafi ya yose igize ikibaya cya Bugarama bakomeje kuvuga ko izamuka ry’ibiciro by’ibiribwa rikabije, ndetse ubu rikaba rituma bamwe batabasha guhaha.

Abaganiriye n’Imvaho Nshya bemeza ko byatewe n’uko izuba ryacanye muri iyi mirenge ntibeza, n’abahingaga i Kamanyola muri Kongo byicwa n’izuba, abacuruzi bakaba bajya kubirangurira ahandi bakabizana bihenze cyane bikarenga ubushobozi bwabo.

Bibaye mu gihe kino kibaya cyafatwaga nk’ikigega cy’akarere kose ndetse n’uduce twa Bukavu na Kamanyola muri Kongo, kubera ko cyibasiwe n’izuba ryinshi ryahacanye ntibabone imvura, n’akaguye kakagwa nabi kandi nyuma, ibyo bahinze hafi ya byose bikibasirwa n’izuba.
Abajyaga guhahayo bakaba ari bo basigaye bajyana yo duke bafite, cyane cyane ibijumba bike biva mu karere ka Nyamasheke, bakavuga ko bigoye kubaho no kuzabona ikijyana abana ku mashuri.

JPEG - 305.5 kb
Uyu musore ugura ifu aravuga ko ikilo cyaguraga amafaranga 200, ubu akiguze amafaranga 400

Ubwo Imvaho Nshya yahageraga yaganiriye n’abari baje guhaha, bavuga ko bimwe mu biribwa byikubye inshuro 2 ibindi byikuba inshuro 3 mu giciro, ibi ngo bikaba ari ubwa mbere bibaye mu mirenge yabo, akaba ari n’ubwa mbere mu isoko rya Bugarama ibiribwa biburamo, bakabona hari izindi ngamba ubuyobozi bukwiye kubafasha gufata kugira ngo bahangane n’iri gabanuka ry’ibiribwa.

Nyiransabimana Odette yagize ati “ Ihanika ry’ibiciro rirakabije muri iki kibaya, cyane cyane muri iri soko kandi ibi ntibyigeze bibaho mbere.Twabaga twejeje ariko turimo turagura ibivuye ahandi na byo bike kandi ari twe twabaga tubyoherezayo.

Yakomeje agira ati “Ibintu byose byarikubye kuko nk’ubu ibiciro byo mu mezi 2 yonyine ashize byarikubye. Nk’ibigori byaguraga amafaranga 150 ikilo ubu biragura 450, ibishyimbo byaguraga amafaranga 350 biragura 600, ifu y’imyumbati yaguraga 200 iragura 400, umufungo w’ibijumba waguraga amafaranga 200 uragura 500 kandi ni ibijumba bitarenze 5.

Iri zamuka rikaba ryaranageze ku muceri kuko natwe turawugura ku kilo amafaranga 900 kandi twabaga tuwiyejereje.”

Yakomeje agira ati “Ibitoki byo n’uwashaka icy’umuti ntiyakibona, n’uduseri tubonetse usanga baturwanira, ibigori bike byeze mu gishanga kiri hafi aha, umufungo waguraga amafaranga 100 mbere ubu ni amafaranga 500, tukibaza amaherezo y’ibi bintu akatuyobera, ku buryo no kwizihiza iyi minsi mikuru dusa n’abatabitekereza.”

Umunyamabanga nshingwabikorwa w’umurenge wa Bugarama, Rukazambuga Gilbert, avuga ko ikibazo cy’izamuka rihanitse ry’ibiciro gikomeye kandi kigoye kubonera umuti mu gihe izuba ryaba rikomeje kwaka, ariko ngo haramutse haguye akavura nibura hari icyo baramura.

Ati “Byo ni ikibazo gikomeye cyane kandi kigaragara hose muri iki kibaya, gusa byatewe n’imvura yabuze muri kano gace kose n’ahandi bahingaga na ho irabura, ku buryo n’abazeza bazeza duke, ariko ntibacika igikuba ngo hari inzara ihari, gusa ikibazo cyo kirahari.”

 

Comments

 
 
Kicukiro: Hatangiye kubakwa  umudugudu ufite agaciro kagera kuri Miliyari 5
Kicukiro: Hatangiye kubakwa umudugudu ufite agaciro kagera kuri Miliyari 5

Akarere ka Kicukiro katangije ku mugaragaro igikorwa cyo kubaka umudugudu w’icyitegererezo (IDP Model Village) uzatuzwamo abakuwe mu manegeka ufite agaciro kagera kuri miliyari eshanu z’amafaranga (...)

Yatangiriye ku cyarahani none agiye gushinga uruganda rw’imyenda
Yatangiriye ku cyarahani none agiye gushinga uruganda rw’imyenda

Mukantwari Alvéra wo mu murenge wa Kagano mu karere ka Nyamasheke, ukorera imirimo y’ubudozi n’ububoshyi bw’imyenda n’imitako kuri site ya Rwesero ho mu karere ka Nyarugenge mu mujyi wa Kigali (...)

Rubavu:Barifuza isoko ryagutse ry’umusaruro w’ibirayi wabaye mwinshi
Rubavu:Barifuza isoko ryagutse ry’umusaruro w’ibirayi wabaye mwinshi

Bamwe mu bahinzi b’ibirayi mu murenge wa Bugeshi mu karere ka Rubavu, bavuga ko bahangayikishijwe n’ikibazo cy’isoko ry’umusaruro w’ibirayi ridahagije, kandi bejeje byinshi cyane. Aba bahinzi bavuga (...)

Ibiciro bya lisansi na mazutu byazamutse
Ibiciro bya lisansi na mazutu byazamutse

Ikigo cy’Igihugu gishinzwe kugenzura imikorere y’inzego zimwe z’imirimo ifitiye igihugu akamaro, RURA cyatangaje ibiciro bishya by’ibikomoka kuri peteroli biratangira kubahirizwa kuri uyu wa 4 (...)

Abaturage b’i Rusizi batewe inkeke n’igiciro cy’ibiribwa cyazamutse bikabije
Abaturage b’i Rusizi batewe inkeke n’igiciro cy’ibiribwa cyazamutse bikabije

Abatuye mu mirenge hafi ya yose igize ikibaya cya Bugarama bakomeje kuvuga ko izamuka ry’ibiciro by’ibiribwa rikabije, ndetse ubu rikaba rituma bamwe batabasha guhaha. Abaganiriye n’Imvaho Nshya (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.