24°C , Partly sunny | Kigali-Rwanda

Ubukungu bushingiye ku Munyarwanda ntibwagerwaho abana bakigwingiye – Dr. Asiimwe

Yanditswe na Rutayisire Emile

Ku ya 15-01-2020 saa 19:56:29
Dr. Anita Asiimwe Umuhuzabikorwa wa NECDP

Leta y’u Rwanda yahagurukiye ikibazo k’imirire mibi mu bana gituma habaho ingaruka zituruka ku mirire mibi zirimo kugwingira k’umwana, kurwara bwaki, kugira ibibazo binyuranye akiri mu nda ya nyina byatuma avuka adashyitse cyangwa inda ikaba yanavamo n’ibindi.

Igihe abana bagwingiye, ni kimwe mu byatuma ubukungu bushingiye ku Munyarwanda butagerwaho, nk’uko bitangazwa na Dr. Anitha Asiimwe, Umuhuzabikorwa wa NECDP.

Ni muri urwo rwego Leta yashyizeho Porogaramu y’Igihugu mbonezamikurire y’abana bato, NECDP. Umuhuzabikorwa wayo Dr. Anitha Asiimwe asaba ko abaturage mu nzego zose bagomba guhangana n’ikibazo k’igwingira kandi ko ibyo Leta yifuza itabigeraho hatabayeho uruhare rw’abayobozi. Avuga ko ubukungu bushingiye ku Munyarwanda butagerwaho abana bakigwingira.

Agira ati “U Rwanda rwafashe inzira yo kugira ubukungu bushingiye ku Munyarwanda. Ubwo bukungu ntibwagerwaho mu gihe abana b’u Rwanda bakigwingira. Ubufatanye bw’abagize umuryango bugomba kubaho kandi uruhare rw’ubuyobozi rukagaragara kuko bugomba kugira uruhare mu kugenzura niba abo bayobora babanye neza, nta makimbirane ari mu muryango no gukurikirana neza niba nta bana bagwingiye bahisha mu bikari”.

Dr. Asiimwe akomeza avuga ko kugwingira ari ingaruka z’imirire mibi zituma umwana adakura mu gihagararo no mu mitekerereze kandi ko kugwingira bitaba umwana avutse gusa.

Agira ati “Kugwingira ntibisaba kuba umwana yaravutse gusa kuko n’umwana uri mu nda ya nyina aragwingira. Iki ni ikibazo gishobora gukosorwa umwana akiri muto ariko yarenza imyaka ibiri bikaba nta garuriro”.

Dr. Asiimwe avuga ko kugira ngo umwana yitwe ko yagwingiye ari uko aba yaratinze mu bibazo by’imirire mibi, indwara zikamwikubitaho, bigatuma atagikura mu gihagararo ariko ibyo byose bikajya kuboneka harabanje kugabanyuka kw’ibiro n’ibindi.

Avuga kandi ko ubusanzwe 80 % by’ubwonko bw’umwana bukura mu myaka itatu ye ya mbere. Umwana wagwingiye iyo atitaweho akiri muto bimugiraho ingaruka mu mitsindire ye mu ishuri kuko byangiza imikorere y’ubwonko. Umwana wagwingiye atanga umusarururo udahagije ku manota yakabaye abona mu ishuri ku buryo hagabanyukaho hagati ya 5 na 11.

Ikindi ni uko ingaruka ziza zitinze ari uko iyo umwana wagwingiye ageze mu myaka y’ubukure, umusaruro atanga mu byo akora uba muke ugereranyije n’igihe yari kuba ataragwingiye ku musaruro yakabaye atanga kuko hagabanyukaho 10%.  Aba afite kandi ibyago byo kurwara indwara zituruka ku mubyibuho ukabije n’izindi zitandura.

Gutuma umwana agwingira ni ukumubuza amahirwe ye kuko ingaruka za vuba ziba ku mwana wagwingiye harimo ibyago byo kurwaragurika cyane, bikamushyira mu bana bafite ibyago byo gupfa ugereranyije n’abana batagwingiye.

Dr. Asiimwe avuga ko ibituma umwana atagwingira atari ibintu bigoye. Agira ati “Umugore utwite wariye indyo yuzuye, wapimishije ku gihe, agafata inyongera tubaha (ibinini bya fer na acide folique) akaruhuka, uwo mudamu afite amahirwe menshi yo kubyara umwana utagwingiye”.

Akomeza avuga ko uwavutse yaragwingiye ariko akitabwaho, akonka neza amezi atandatu nta kindi bamuvangiye, yarangiza akabona imfashabere ikwiye, indyo yuzuye, agakurikiza gahunda zo kwa muganga, uwo mwana afite amahirwe yo gukura ntagwingire.

Avuga ariko ko iyo umwana yagejeje imyaka ibiri yaragwingiye, amahirwe yo kubigarura ngo za ngaruka zitazamugeraho aba ari make cyane.

Mutuyeyezu Alphonse atuye mu Karere ka Rulindo avuga ko umuti wo gutuma abana be batagwingira harimo kubana neza n’umugore.

Agira ati “Nasanze amakimbirane mu muryango agira uruhare mu kugwingira ku mwana. Iyo utumvikana n’umugore, imibereho y’abana ukayiharira umugore gusa kandi na we akenshi usanga atishoboye, haba hari ibyago byinshi byo kuba mu gihe atwite abura ibimutunga byujuje intungamubiri zikenewe ku mugore utwite”.

Akomeza avuga ko n’iyo umwana avutse agwingiye haba hari ibyago byinshi by’uko atitabwaho neza uko bikwiye ndetse ko abura intungamubiri akura mu mashereka, ntabone imfashabere n’indyo yuzuye bigatuma ikibazo cyo kugwingira kitamuvaho.

Mutuyeyezu avuga ko umuti w’ikibazo k’igwingira mu bana cyakurwaho no kubana neza hagati yabashakanye bagasenyera umugozi umwe, umugabo akumva ko afite inshingano zo gufasha umugore we amushakira ibiryo byujuje intungamubiri zikenerwa ku mugore utwite, akirinda kumukoresha imirimo ivunanye kandi akamenya ko agomba no kuruhuka.

Ati “Iyo umugore adahari menya ko ngomba gutekera abana. Ikindi ni ukwita ku karima k’Igikoni ntikage kaburamo imboga ndetse n’ubworozi bw’inkoko zitanga amagi, nkita no ku nka zange nkamenya ko abana bagomba kunywa amata n’iyo nagurisha nkagurishaho make”.

Nambajemariya Marie Fidele atuye mu Mujyi wa Kigali mu Murenge wa Bumbogo mu Karere ka Gasabo, avuga ko atari azi ko umwana ashobora kugwingirira mu nda ahubwo ko umwana yitabwaho neza amaze kuvuka.

Agira ati “Nta bwo nigeze menya ko umwana ashobora kugwingira akiri mu nda kuko hari igihe nabwirirwaga ahubwo ngashimishwa n’uko abandi bana babonye ibyo kurya nge nkumva nta cyo bimbwiye. Ahubwo iyo umwana yavukaga akenshi yabaga atujuje ibiro bisabwa, abaganga bagahita batangira kumwitaho bareba ubuzima bwe ndetse nange ngafashwa kubona ibituma ngira amashereka cyane cyane aho haziye amafu ya Nootri Mama yaradufashije cyane”.

Akomeza avuga ko yaje kumenya ko umwana ashobora kugwingira akiri mu nda ya nyina biramubabaza kuko yangizaga umwana we akiri mu nda atabizi. Ati “Namenye neza ko umwana uri mu nda amenya n’ibibera hanze kuko iyo ubabaye cyangwa wishimye umwana arabyumva mu nda kandi bikamugiraho ingaruka. Ubu niyemeje kujya ndya indyo yuzuye mu gihe ntwite kandi nkirinda ibintu bituma mpangayika kuko bigira ingaruka ku mwana”.

Ubushakashatsi bwa DHS busohoka buri myaka itanu, ubuheruka bwa 2015, bwagaragaje ko igwingira riri kuri 38%, aho uturere twari dufite igwingira riri hejuru mu turere 30 tw’u Rwanda ari 13. Kuva icyo gihe ni bwo uburemere bw’igwingira mu Rwanda bwagaragaye kubera ko hari Uturere twari ku gipimo cyo hejuru kandi turi mu Turere twihagije mu biribwa.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.