26°C , Partly sunny | Kigali-Rwanda

Ubukungu Afurika yifuza busaba ibikorwaremezo bijyanye n’umurongo mugari-Kagame

Yanditswe na TWAGIRA WILSON

Ku ya 08-05-2018 saa 05:39:58

Perezida Paul Kagame agaragaza ko kugira ngo Afurika igere ku bukungu yifuza bisaba ibikorwaremezo bijyanye n’umurongo mugari wa interineti ubasha kugerwaho na buri wese.

Umukuru w’Igihugu akaba yarabitangaje ejo hashize tariki 7 Gicurasi 2018, mu nama ya Komisiyo abereye umuyobozi, y’Umurongo Mugari wa Internet yabereye i Kigali, igamije Iterambere Rirambye.

Umukuru w’Igihugu Paul Kagame ayoboye inama ya Komisiyo y’Umurongo mugari wa Interineti

Perezida Kagame yagize ati: “Kugira ngo Afurika igere ku bukungu yifuza bisaba ibikorwaremezo bijyanye n’umurongo mugari wa interineti ubasha kugerwaho na buri wese mu bushobozi bwe”.

Yavuze ko bitewe n’imiterere y’Afurika ari ngombwa gukoresha uburyo bw’ikoranabuhanga butandukanye, ati: “Ingano y’Afurika, imiterere yayo ndetse n’uburyo ituwe bituma tugomba gukoresha uburyo bw’ikoranabuhanga butandukanye kugira ngo tugeze umurongo mugari (ibyogajuru, fibre optic, telefoni ngendanwa) kuri bose.”

Yavuze ko ukuri ari uko ikoranabuhanga rikoreshwa ahandi hose haba mu bucuruzi, mu burezi, no mu buzima, rishingiye ku murongo mugari wa interineti.

Perezida Kagame agaragaza ko igihe haganirwa kuri 5G n’ahazaza h’umurongo mugari, iyi komisiyo igomba guhora ibitekerezaho.  Ati: “Ni twe tugomba kuyobora izi mpinduka mu guhanga ibishya no gushyiraho gahunda n’uburyo kugira ngo umurongo mugari wihutishwe aho byatinze”.

Umukuru w’Igihugu yabwiye abari bitabiriye inama ko ibyo nibikorwa hazabaho ubufatanye n’abandi. Ati: “Tuzabasha gufatanya n’abandi dusangiye intego nk’Umuryango w’Afurika Yunze Ubumwe n’Ubunyamabanga bwa Smart Africa”.

Yishimiye kuba iyi nama yaritabiriwe n’uwo bafatanyije kuyobora iyi komisiyo, Carlos Slim, ndetse n’ubungirije, Houlin Zhao, avuga ko imbaraga bashyira muri iyi gahunda ari izo gushimirwa.

TANGA IGITEKEREZO

Leave a Reply

Your email address will not be published. Required fields are marked *