18°C , Partly sunny | Kigali-Rwanda
?

Ubukirisitu nyabwo bukwiye kubakira ku bunyarwanda –Uwacu

Yanditswe na MUKAGAHIZI ROSE

Ku ya 16-04-2018 saa 07:24:37

Minisitiri w’Umuco na Siporo Uwacu Julienne asanga ubukirisitu nyabwo bukwiye kubakira ku bunyarwanda nyabwo, ntibibe bya bindi by’umusonga w’undi, utakubuza gusinzira, ahubwo bakazirikana ko ni yo yaba ari umuntu  umwe ubangamiwe, wahohotewe, wahutajwe, hari igipimo ku bukirisitu bwabo kerekana ko hari aho bataragera.

Muri iri sengesho abantu batandukanye batanze ubuhamya butandukanye bw’ukuntu Imana yabakirije imitima nyuma yo kubabarira, abandi batanga ubuhamya ukuntu Imana yabakijije indwara zidakira zitandukanye

Ibi yabivuze ejo hashize tariki 15 Mata 2018 mu isengesho ryo kwibuka no gusabira abazize Jenoside yakorewe Abatutsi mu 1994, aho Paruwasi Regina Pacis/Remera ibifashijwemo na Minisiteri y’Umuco na Siporo, yakoze isengesho ryo gusabira inzirakarengane, abarwayi ndetse n’abafite ibikomere by’umubiri n’umutima. Ni isengesho ryayobowe na Padiri Ubald Rugirangoga kuri Sitade Amahoro i Remera.

Minisitiri Uwacu yavuze ko  kwibuka ari inshingano za buri wese. Yagize ati “Iri sengesho kandi ryahujwe no kwibuka ku nshuro ya 24 Jenoside yakorewe Abatutsi mu Rwanda tukaba twibuka amateka atoroshye, amateka ashaririye aturuka kuri bya bikomere by’umubiri ndetse n’iby’umutima abari hano ndetse n’abari hirya no hino mu gihugu Abanyarwanda ndetse no mu mahanga bagize kubera ayo mateka.”

Uwacu avuga ko kwibuka biri mu muco w’Abanyarwanda ariko kwibuka uko byakomeje no kuvugwa biba mu nshingano zacu nk’Abakirisitu.

Yagize ati “Iyo tuvuze Pasika n’igisibo twinjiramo mbere yo kwizihiza Pasika, tuba tuzirikana, tuba twibuka inzira y’umusaraba Yezu Kirisitu yanyuzemo, tukishimira ko izuka rye ryabaye isoko y’ubuzima bwiza kuri twe kandi ko urupfu rutagifite ijambo rya nyuma ku buzima bwacu.”

Yungamo ati “Ni byiza ko duhuza uku kwibuka nk’Abakirisitu, tukabihuza no kwibuka kw’Abanyarwanda twibuka abavandimwe, inshuti, ababyeyi, abana bacu, abaturanyi n’abandi twasenganaga batakiriho bishwe batazira igicumuro bakoze, bishwe urw’agashinyaguro, bambuwe agaciro bahawe n’Imana yabaremye biturutse kuri Jenoside yateguwe ikanashyirwa mu bikorwa n’ubuyobozi bubi”.

Uwacu avuga ko muri uko kwibuka aya mateka ashaririye, buri muntu wese amaze kwisuzuma bikwiye kuba  intandaro yo gutuma hafatwa  ingamba zihamye zituma bitazongera.

Minisitiri Uwacu yashimiye by’umwihariko Kiliziya Gaturika uruhare rwayo mu rugendo rwo kubaka Abakirisitu nyuma ya Jenoside.

Avuga ko kwiyubaka ari urugendo kuko hubakwa imitima ifite ibikomere, yashengutse, yahungabanye.

Akomeza yungamo ati “Igihugu cyarababariye, gishyira imbere ubumwe bw’abagituye, gishyiraho inzego z’ubutabera kugira ngo turwanye umuco wo kudahana ariko gishaka n’igisubizo gituma ubutabera butangwa Abanyarwanda bakongera kuba abana ni yo mpamvu twagiye muri gacaca”.

Kuba hirya no hino mu gihugu hakiri bamwe mu bantu bakigaragarwaho n’ingengabitekerezo ya Jenoside, Minisitiri Uwacu yagize icyo asaba abihaye Imana, agira ati, “Usanga hari ibibazo n’ubu ng’ubu tugifite by’abagisabitswe n’ingengabitekerezo ya Jenoside, abakibiba amacakubiri n’abadaha agaciro aya mateka twibuka rimwe na rimwe bamwe mu barokotse aho batuye hirya no hino bagatotezwa, bakagirirwa nabi, bamwe bakumva ko ari nta cyo bibabwiye hari ababishinzwe. Nyamara ukabasanga mu muryango remezo aho duhurira mu masengesho, ntidukwiye kurenza amaso ibyo bibazo aho byaba bikiri mu miryango yacu, ariko kandi guhindura cyangwa guhinduka bisaba ko buri muntu wese yiheraho, nidukora ibitandukanye n’ibyo tuvuga cyangwa ibyo dusaba abandi gukora tuzaba twigiza nkana”.

Yasabye  Abasaseridoti gushyira imbaraga ku rubyiruko kuko ari imbaraga zubaka zishobora no gusenya zikoreshejwe nabi bityo, bakaruha uburere, imico n’imyifatire bikwiye Umunyarwanda muzima kuko ari na we uzaba  Umukirisitu mwiza.

Padiri Ntabyera Charles, Padiri Mukuru wa Paruwasi Regina Pacis/ Remera  yashimye Imana ikorera Abanyarwanda ibyiza nta kiguzi, ashima ubuyobozi bw’u Rwanda ku bwisanzure bwo gusenga nta we usubijwe inyuma, avuga ko batazahwema gusabira igihugu no kukiragiza Imana.

Muri iri sengesho abantu batandukanye batanze ubuhamya butandukanye bw’ukuntu Imana yabakirije imitima nyuma yo kubabarira, abandi batanga ubuhamya ukuntu Imana yabakijije indwara zidakira zitandukanye, abandi yabahaye urubyaro bari bararubuze n’ibindi bitangaza byinshi Imana yakoreye Abanyarwanda kandi igikora.

TANGA IGITEKEREZO

Leave a Reply

Be the First to Comment!

avatar