22°C , Mostly cloudy | Kigali-Rwanda
Minisitiri w'Imari n'igenamigambi Dr Uzziel Ndagijimana na Yasser El Gammal basinya amasezerano y'inkunga ya miliyoni 100 z'amadolari u Rwanda rwahawe na Banki y'Isi (Foto Kayitare J.P)

Ubuhinzi mu Rwanda bwatewe inkunga y’amadolari miliyoni 100

Yanditswe na KAYITARE JEAN PAUL

Ku ya 01-06-2018 saa 07:36:00

Banki y’Isi (World Bank) yahaye inkunga u Rwanda ya miliyoni 100 z’amadolari y’Amerika, angana na Miliyari zisaga 85 z’amafaranga y’u Rwanda, akazakoreshwa mu buhinzi no kongerera ubushobozi abakora uwo mwuga.

Minisitiri w’Imari n’igenamigambi Dr Uzziel Ndagijimana na Yasser El Gammal basinya amasezerano y’inkunga ya miliyoni 100 z’amadolari u Rwanda rwahawe na Banki y’Isi (Foto Kayitare J.P)

Amasezerano ajyanye n’iyo nkunga yashyizweho umukono ejo hashize tariki 31 Gicurasi 2018, Minisiteri y’Imari n’Igenamigambi ikaba itangaza ko iyi nkunga izafasha Leta y’u Rwanda muri gahunda z’ikerekezo k’igihugu.

Minisitiri w’Imari n’igenamigambi Dr Uzziel Ndagijimana yasobanuye ko Leta yatangiye gahunda yo gushyira mu bikorwa gahunda y’iterambere ryihuse guhera mu 2017 kugeza 2024, aho Leta yihaye intego zikomeye mu nzego zitandukanye harimo n’iz’ubuhinzi.

Avuga ko Inkunga ya Miliyoni 100 z’amadolari u Rwanda rwahawe izafasha mu kongera ingano y’umusaruro w’ubuhinzi.

Ati: “Ikerekezo cy’ubuhinzi muri iyi myaka irindwi ya Guverinoma, ni ukuzamura umusaruro w’ubuhinzi ari na cyo iyi nkunga igiye kudufasha, haba ku bwinshi bw’umusaruro ndetse no ku bwiza bwawo. Ubu dufite 30% y’umusaruro mbumbe w’igihugu. Ubukungu bw’igihugu buzakomeza gushingira ku buhinzi nubwo n’izindi nzego zizakomeza guteza imbere ibijyanye n’inganda cyangwa serivisi.”

Minisitiri Ndagijimana atangaza ko kugira ngo bigerweho hasabwa ishoramari ndetse n’inyongeramusaruro. Ati: “Kugira ngo tugere ku musaruro twifuza mu buhinzi, birasaba ishoramari n’inyongeramusaruro mu buhinzi, gukoresha uburyo bugezweho bw’ikoranabuhanga, gukoresha amasoko y’ubuhinzi n’ibikorwaremezo.”

Akomeza avuga kandi ko hari no gukomeza gukangurira abikorera kugira ngo binjire mu buhinzi bw’umwuga, abantu bave mu buhinzi bwa gakondo butanga umusaruro muke, bagana mu buhinzi bwa kijyambere butanga umusaruro mwinshi.

Ati: “Iyi nkunga ya miliyoni 100 z’amadolari zizakoreshwa muri ibyo byose, ni na bumwe mu buryo buzadufasha kugira ngo tugere kuri iyo ntego. Iyi nkunga izakoreshwa mu gihe k’imyaka itatu uhereye mu 2018 kugeza mu 2021 ariko byose birajyana no gushyira mu bikorwa gahunda y’imyaka irindwi Guverinoma y’u Rwanda yiyemeje.”

Yasser El Gammal uhagarariye Banki y’Isi mu Rwanda, avuga ko Banki y’Isi ishishikajwe no gushyigikira ibikorwa bya Guverinoma y’u Rwanda no kwita kuri gahunda iba yarihaye mu guteza imbere ubuhinzi.

Ati “Banki y’Isi inejejwe no gushyigikira gahunda za leta kandi ubona ko zitanga umusaruro ushimishije kuko hibandwa cyane kuri gahunda zigamije kongera ishoramari mu bijyanye n’ubuhinzi.”

TANGA IGITEKEREZO

Leave a Reply

Be the First to Comment!

avatar