28°C , Sunny | Kigali-Rwanda

Ubuhamya: Hari Abanyarwanda bakoreshwa ubucakara muri Uganda, bamwe bakicwa n’inzoka

Yanditswe na Rutayisire Emile

Ku ya 03-09-2019 saa 15:41:48
Twambajimana Prince wafunzwe arengana agakubitirwa Uganda akibonera bagenzi be b'Abanyarwanda baribwa n'inzoka bikabaviramo urupfu (Foto Rutayisire E)

Amakuru aturuka muri Uganda aravuga ko hari Abanyarwanda bakomeje gukoreshwa ubucakara abandi bakaribwa n’inzoka bikabaviramo urupfu.

Bashinjwa kwinjira muri icyo gihugu nta byangombwa, mu gihe abahohoterwa bavuga ko banyura ku mupaka bafite ibyangombwa bagera muri Uganda bakabyamburwa.

Ibi ni bimwe mu bitangazwa n’umwe mu Banyarwanda bahohoterewe muri Uganda, Twambazimana Prince, uvuka mu Karere ka Musanze, wamaze kuzinukwa inzira ijya muri Uganda kubera ibyo yaboneyeyo.

Avuga ko bamwe mu bo yasizeyo babakoresha imirimo y’ingufu, bagakubitwa, bamwe bakicwa n’inkoni, abandi bakabamugaza, bakabajyana mu mashyamba bamwe bakaribwa n’inzoka ndetse bikabaviramo urupfu.

Twambazimana yagize ati “Nihereyeho narafashwe, namburwa ibyangombwa barabica, banjyana mu rukiko nshinjwa ko nta byangombwa mfite binyinjiza muri Uganda. Bankatiye igifungo k’imyaka ibiri, ariko ibyo nahaboneye biteye ubwoba kuko twajyanwaga mu ishyamba riri muri Kiburara Prison Farm, guhinga no gukonda ibiti. Nge niboneye Abanyarwanda babiri bariwe n’inzoka zaho ndetse barapfa n’undi wishwe n’inkoni. Nakubiswe inshyi nyinshi cyane ntibuka umubare, amatwi arashyuha azaho ibisebe, bankubise mu mbavu, bankubita mu matako ku buryo ntabashaga kugenda ariko baza kumpa imiti.”

Akomeza avuga ko bavugaga ko abapfuye babajyana mu Rwanda ariko nta gihamya babonaga ko bajyanwa mu Rwanda. Ikindi ni uko batukwaga bavuga ko bagomba kubavunagura ntibazagaruke muri Uganda kandi ko nta muntu bafite ubavuganira muri Uganda. Afite ikibazo cy’uko inshyi yakubiswe zishobora kuzamuviramo gupfa amatwi.

Uburyo yafashwe agafungwa

Tariki 9 Gicurasi 2018 Twambazimana yanyuze ku mupaka wa Cyanika agiye gusura umwana w’inshuti ye na we wari ufungiye Kabale. Ageze ahitwa Gasheregenyi arafatwa arafungwa bavuga ko nta byangombwa afite kandi anyura ku mupaka ngo yari abifite.

Avuga ko Polisi yamwatse amashiringi angana n’umutwaro umwe nka ruswa, yanga kuyabaha ababwira ko yinjiye mu buryo bwemewe n’amategeko, bamwicaza hasi bahita baca ibyangombwa byamwinjije ku mupaka.

Hamwe n’abandi bari bafashe bashinjwa icyaha kimwe, umucamanza yabakatiye igifungo k’imyaka ibiri kubera kwinjira mu gihugu nta byangombwa bibemerera bafite kandi ko niba badashaka gufungwa bishyure miriyoni ebyiri, Twambazimana avuga ko ababonye izo miriyoni bazitanze bakabarekura utayafite arafungwa.

Mu myaka ibiri yari yarakatiwe yafunzwemo amezi 16 akurirwaho amezi 8, arafungurwa Rwanda ku Cyumweru tariki ya 1 Nzeri 2019.

Icyamubabaje ni ukubakoresha ubucakara babatuka bavuga ko ntawubavugira kandi u Rwanda rurimo amahoro n’umutekano.

Arasaba abatekereza kujya muri Uganda kubireka kuko kujyayo ari ugushyira ubuzima mu kaga, akagira ati “Muntu wese ushaka kujya Uganda bireke kuko uzahura na Polisi yaho igufate igucire ibyangombwa bagushinje ko nta byangombwa ufite ufungwe kandi ukoreshwe ubucakara bushobora gutuma ubura ubuzima.”

Akomeza avuga ko yakunze kubona aho yari ari haza bisi yuzuye Abanyarwanda ku buryo abo yasizeyo bari hagati ya 180 na 200 kandi ko hari abandi benshi batarashyikirizwa inkiko ngo zibakatire.

Twambajimana Prince wafunzwe arengana agakubitirwa Uganda akibonera bagenzi be b’Abanyarwanda baribwa n’inzoka bikabaviramo urupfu (Foto Rutayisire E)

TANGA IGITEKEREZO

Leave a Reply

Your email address will not be published. Required fields are marked *