Ubuhamya bwa Higiro, umugabo waboneje urubyaro ku buryo bwa burundu

Yanditswe na Imvaho Nshya

Ku ya 15-10-2019 saa 13:53:28
Higiro yahamije ko amaze kuboneza urubyaro ku buryo bwagenewe abagabo byatumye iterambere ry'umuryango we na Nyiransabimana barigendamo byoroshye (Foto RBC)

Higiro Simon ni umugabo washakanye na Nyiransabimana Perpetue bo mu karere ka Karongi, mu murenge wa Mubuga, avuga ko ubu babana yaraboneje urubyaro ku buryo bwa burundu nyuma yo kubona uko umugore we yahoranaga imvune yaterwaga no guhora atwite umwaka ku wundi, ku buryo ntacyo yabashaga kwikorera ageze ku mbyaro ya gatandatu.

Ni ibikubiye mu buhamya yahaye bagenzi be b’abagabo hamwe n’abagore bitabiriye ubukangurambaga bwo kwita ku buzima bw’umwana n’umubyeyi, bashishikarizwa kwitabira gahunda yo kuboneza urubyaro, babyara abo bashobora kwitaho, mu gufasha kugera ku iterambere ry’umuryango neza.

Higiro yavuze ko bwa mbere yumvise gahunda yo kuboneza urubyaro amaze gusobanukirwa akamaro kayo biramubabaza kuko yari yarakererewe kuyitabaza mu guteza imbere urugo no kuruhura umugore we.

Ati “Nkimara kumva gahunda yo kuboneza urubyaro, ari byo bita kubyara abo ushoboye, numvise binshimishije ariko biranambabaza kuko bari babimbwiye mu gihe ngewe cyararenze, urumva ko mfite abana batandatu. Numvise bikererewe kuri nge, ndavuga nti iyo biba byaraje kera.

Ariko ntabwo byambujije n’ubundi kubikunda, nahise mvuga nti isambu mfite ni ntoya, ntacyo nzabona ndaga umwana, n’abo nari mfite nabonaga ntazabageza mu buzima burambye cyangwa se ku bwo leta yifuzaga cyane cyane ko nabonaga no kubashyira mu ishuri nabyo byari imbogamizi kuri ngewe.”

Yakomeje atanga ubuhamya ko amaze kubona imbogamizi aterwa no kugira abana benshi adashobora kwitaho uko bikwiye, yagiye inama n’umugore we, bibaza niba batajya kuboneza urubyaro. Ati “Madamu ntabwo yanduhije. Nkimara kubimubwira ni we wahise aboneza urubyaro, mu mwaka wa 2007.

Yafashe urushinge rw’amezi atatu, aruvaho ajya ku buryo bw’imyaka itatu, nyuma haza kumvikana amagambo yavugaga ngo bijya bigira ingaruka kuri bamwe, ubwo nari maze kugira abana bajya mu ishuri, ndavuga nti niba bizamuhinduka wenda ntabashe gukora abana bacu baziga gute?”

Akomeza agira ati “Ngira amahirwe numva haje irindi tangazo rivuga ko abagabo nabo bashobora kuboneza urubyaro, nahise mbwira madamu wange nti rero madamu aho kugira ngo uzagire ingaruka wenda uhura nazo reka nkwakire kuko nge bambwiye ko nta ngaruka nzagira.

Naragiye ndabyitabira kwa muganga ndetse n’abandi bagenzi bange twajyanye, mboneza urubyaro ku itariki 10 z’ukwezi kwa 11 mu 2011. Ikiza nakuyemo ni uko kugeza ubu mfite abana batatu barangije amashuri yisumbuye, abandi mbasha kubabonera amafaranga y’ishuri najya kuyashaka umugore agasigara ari guhinga, afite imbaraga kuko nta ruhinja rwa buri mwaka ahetse, na za mpungenge mu kuboneza urubyaro kuri we ntazo afite, nkaba nshishikariza bagenzi bange bandi bafite abana benshi kwitabira gahunda yo kuboneza urubyaro mu buryo bwa burundu cyangwa ubundi bihitiyemo.”

Nyiransabimana, umugore we, yunzemo ko banogeje umugambi wo kuringaniza urubyaro, bumvikana ko bajya kwa muganga bakabibafashamo.

Ati “Aho tubikoreye dushima Imana ko ubu tubona ibyo tugaburira abana, ubu mfite imbaraga zo gukora, ntabwo nkibyaragura nk’uko byari bimeze mbere, ubu tukaba dushima leta yacu  yatumye tumenya igikorwa cyo kuringaniza urubyaro. Ubu abana bacu barabona mituweli ku gihe, tubabonera ibyo kurya mbega ubu turashima.”

Undi muturage, Singirankayo Obedi, yabwiye Imvaho Nshya ko ku myaka 43 amaze kubyara abana 5 ariko yagerageje kuboneza urubyaro amaze kubona ko agize abana atabasha kwitaho kandi ari n’umukene.

Minisiteri y’Ubuzima ishishikariza ababyeyi kwifashisha gahunda yo kuboneza urubyaro mu gihe babona bashobora kubyara abana badashoboye kubonera ibyangombwa byose, bikabafasha mu kwiteza imbere no gufasha igihugu kugira igenamigambi rijyanye n’abaturage biyongera ku muvuduko mwiza.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.