17°C , Partly cloudy | Kigali-Rwanda
Romeo Dallaire

Ubuhamya bwa Dallaire kuri Jenoside: Umugabo mwiza mu muriro

Yanditswe na Mugabo Lambert

Ku ya 12-04-2019 saa 05:36:41

Lt. Gen. Roméo Dallaire wari uyoboye ingabo za Loni (MINUAR) zari mu Rwanda mu gihe cya Jenoside yakorewe Abatutsi mu 1994, yagiranye ikiganiro n’Inzu Ndangamurage yo kwibuka Jenoside yakorewe Abayahudi iba muri Leta Zunze Ubumwe z’Amerika (USHMM).

Iki kiganiro kiswe “Umugabo mwiza mu muriro: Gen. Romeo Dallaire na Jenoside”. Dallaire avuga ko ibyo yabonye byamwangije mu mutwe.

Jerry Fowler, umuyobozi wa komite y’Inzu Ndangamurage yo kwibuka Jenoside yakorewe Abayahudi iba muri Leta Zunze Ubumwe z’Amerika (USHMM) ni we wayoboye iki kiganiro Dallaire yagiranye n’umunyamakuru witwa Ted Koppel.

Roméo Dallaire yatangiye avuga ibyo yabonye muri Jenoside yakorewe Abatutsi mu Rwanda, agira ati “Ingaruka z’ibyo nabonye mu Rwanda zageze no ku bwonko, bituma nsigara nta bushobozi mfite bwo kugira ibyiringiro byo kubaho.”

Yavuze ko nk’umuyobozi wari uyoboye ingabo yananiwe gukiza Abanyarwanda, ananirwa kubafasha. Yabonye byinshi, abana bicwa, ababyeyi, ati: “Abasaza bagupfiraga mu maboko, mu kivunge cy’abantu ibihumbi 50, ibihumbi 60, bari mu mvura, mu misozi, bakureba mu maso, bavuga bati ‘Habaye iki? Ntimuhari se? Ni gute twarokoka ibi?”

Dallaire yakomeje agira ati: “Biciwe mu nsengero, aho twashoboye kugera, intagondwa zabizezaga kujyayo, bakabwirwa kujya mu nsengero niba bumva badatekanye, ko bazarindwa n’amasezerano ya Geneva. Kuko mu rusengero babaga ari benshi, harimo nk’ibihumbi bibiri, bafunguraga igisenge, bakajugunyamo amagrenade, noneho bakinjiramo bakabatemeramo…”

Dallaire avuga ko yababajwe n’uko nta bushobozi yari agifite, ati “Ingabo za Canada nta bwo zari zigishoboye kunkoresha nka General w’inyenyeri eshatu, kuko ntashoboraga kuyobora ingabo mu bikorwa, kuko nta bushobozi n’inshingano nari ngifite. None se wakorana iki n’umujenerali w’inyenyeri eshatu udashobora kuyobora ingabo, kandi azi uko yabikora…”

Romeo Dallaire

Dallaire yamenye mbere y’igihe itegurwa rya Jenoside

Ted Koppel yabajije Dallaire icyamumenyeshaga ko mu Rwanda hategurwa Jenoside, kuko Dallaire yavuze ko yabibonaga, maze avuga ko byonyine kuba mu Rwanda haroherejwe ingabo za Loni ari uko ibintu bitari bimeze neza.

Ngo nubwo bo batagiraga za maneko, Roméo Dallaire yavuze ko babonaga amakuru avuye ku mpande zombi, kandi ko ubutegetsi bwa Habyirimana bwari bwaratoje umutwe w’abicanyi, uhabwa n’intwaro, kandi uyu mutwe washoboraga kwica Abatutsi barenga 4.000 mu isaha imwe mu Mujyi wa Kigali.

Lt. Gen. Dallaire yakomeje avuga ko baje no kuvumbura intwaro zari zihishwe, ibyo byose byaberekaga ibizakurikiraho, ari byo kurimbura Abatutsi. Ati “Noneho nohereje ubutumwa i New York mbasaba kubirwanya uwo mwanya mu masaha 36, kujya ahantu twari twamenye ko hari intwaro tugahera aho.”

Dallaire avuga ko yangiwe kubikora, ati “Nangiwe kubikora kuko twaba dusubiye muri Somalia, maze Loni n’igihugu bakarwana. Batekereje ko twaba tugiye kwirukanwa, bikaba nko muri Somalia […] Loni ivuga ko mutajya mu bikorwa by’imirwano, ahubwo muganira n’abantu. Twabiganiriyeho n’izo ntagondwa, tubabwira ko tuzi ibirimo gukorwa, tubabwira ko bitajyanye n’amasezerano y’amahoro yendaga gushyirwa mu bikorwa.”

Roméo Dallaire ubwo yandikiraga Umuryango w’Abibumbye awumenyesha ibigiye kuba mu Rwanda, avuga ko yahise asubizwa uwo mwanya, mu masaha make, ko atemerewe kwinjira mu bikorwa nk’ibyo.

Abo yahaga ayo makuru, ni urwego rushinzwe ibikorwa byo kubungabunga amahoro ku Isi, harimo abo yise “Triumvirate” (agatsiko ka batatu), ari bo Kofi Annan, Iqbal Riza n’umujenerali w’Umunyakanada wari inshuti ya Dallaire, ari we Gen. Maurice Baril. Kandi bavuganaga kuri telefoni. Intwaro zari zarateguwe harimo n’iziremereye yavuze ko zari zihishe mu Majyaruguru y’Iburengerazuba bw’u Rwanda, ahari n’inzu ya Perezida wariho, Habyarimana.

Mu buhamya bwe, Dallaire avuga uko Jenoside yatangiye, ko babanje kwica Abaminisitiri, ko yabonye aho abantu batandukanya abandi, ati “Hari ikiremwamuntu kitari abantu cyangwa se abari hejuru y’abandi?”

Amahanga yacyuye abaturage bayo n’imburamumaro z’Abanyarwanda

Dallaire akomeza agira ati “Nyuma y’minsi ibiri indege y’Abafaransa iba igeze i Kigali. Nyuma y’iminota 45 gusa, numvise ko haje indi. Indege y’Ababiligi yaje ku munsi wakurikiyeho. Abataliyani baje nyuma y’iminsi ine.”

Ati “Hari kandi ingabo 300 z’Abanyamerika zari i Bujumbura, kandi hari ubwato bw’abasirikare babo bwari Dar-es-Salaam bufite abagera kuri 800 n’igihumbi. Bari baje kujyana abagabo b’abazungu n’Abanyarwanda b’imburamumaro b’abanyapolitiki bakoraga neza ibyo bashaka.”

Dallaire atanga urugero rw’abo yise imburamumaro, ati “Urugero ni uko Abafaransa batwaye umuryango wa Perezida (Habyarimana) batari abantu beza bakenewe na busa kuri iyi si. Bose bajyanywe mu minsi itanu, basiga Abanyarwanda bari barabakoreye imyaka myinshi irenga 10, bareze abana babo, babasigira kwicirwa inyuma yabo basubira Brussels, Paris n’ahandi.”

Mu gusoza iki kiganiro, Lt. Gen. Dallaire yagize ati “Abantu bicirwaga kuri buri bariyeri yabaga mu ntera ya buri metero 100, bicwaga kubera indangamuntu zatanzwe n’Ababiligi. Wagombaga kuba ufite indangamuntu iriho ko uri Umuhutu cyagwa Umututsi. Iyo wabaga uri Umututsi bagushyiraga ku ruhande bakakwica.”

Romeo Dallaire akaba yaragize ibibazo by’ihungabana kubera ibyo yabonye mu gihe cya Jenoside yakorewe Abatutsi, ahanini bishingiye ku kuba atarashoboye gutabara abicwaga.

TANGA IGITEKEREZO

One Comment on “Ubuhamya bwa Dallaire kuri Jenoside: Umugabo mwiza mu muriro”

  1. ubwami bw’Imana buzahanagura amarira abanyarwanda n’isi yose butwibagize ibyabaye umuntu atabona amagambo yo kuvugamo. ibyah.21:4

Leave a Reply

Your email address will not be published. Required fields are marked *