28°C , Sunny | Kigali-Rwanda

Ubuhamya: Abanyarwanda bafatirwa muri Uganda bahingishwa umunsi wose bakarya rimwe ku munsi

Yanditswe na Sezibera Anselme

Ku ya 02-09-2019 saa 17:04:00
Muhire J. Baptiste agaragaza uko Abanyarwanda bafatwa nabi muri Uganda, bakoreshwa agahato, bagakubitwa amanywa n'ijoro (Foto Sezibera A)

Umunyarwanda Muhire J. Baptiste w’imyaka 32 wari ufungiye muri Uganda akaza kurekurwa akagarurwa mu Rwanda, aravuga ko ababazwa cyane n’ibikorwa by’urugomo, ihohotera no gukoreshwa uburetwa bikorerwa Abanyarwanda bafatirwayo.

Yatabarije Abanyarwanda abasigaye mu magereza ya Uganda ndetse yihanangiriza abafite ibyifuzo byo kwerekezayo nta mpamvu.

Muhire yerekeje muri Uganda mu mwaka wa 2017, nk’Umunyarwanda wese ufite ibyangombwa bimwemerera kujyayo, yaciye ku mupaka wa Cyanika nyuma afatirwa Gisolo hamwe na bagenzi be 40 barimo abavaga Kampala n’aberekezagayo, nk’uko abisobanura.

Mu kiganiro yagiranye n’Imvaho Nshya, yagize ati: “Nyuma yo gusohorwa muri bisi tukanamburwa ibyangombwa na Polisi, bahise bajya kudufungira muri Gereza ya Gisolo. Abantu badufata nta mwambaro ugaragaza umurimo uwo ari wo wose bakora kuko baba bambaye imyambaro isanzwe, gusa aho badukusanyirije twahasanze Abasirikari n’Abapolisi.”

Muhire avuga ko bidatinze bashyikirijwe urukiko bakatirwa amezi y’igifungo 23 bakoreye muri gereza y’agateganyo ya Gisolo, ariko nyuma abo bafatanywe bagenda bimurirwa mu yandi magereza babaho mu buzima bubi burimo guhingishwa umunsi wose buri munsi no gukubitwa.

Ati: “Kubera kuba nari nsanzwe menyereye muri icyo gihugu, menyeranye n’inzego z’umutekano za Uganda, nta kibazo gikomeye nagize mu ifatwa no mu ifungwa ryange. Icyambabaje gikomeye ni uburyo bagenzi bange twafatiwe hamwe bagiye bafatwa nabi. Mu by’ukuri n’iyo ntafatwa ngo mfungwe nari kuza mu Rwanda nkajya kuri radiyo imwe nkabatabariza kandi nkihanangiriza Umunyarwanda n’Umunyarwandakazi wese wifuza kujya mu gihugu cya Uganda kuko atari ahantu bapfa kwirukankira uko umuntu ashatse nta kimujyanye”.

Muhire akomeza agira ati: “Kubera ko nabashije kuyobora abafungiye gereza ya Gisolo harimo abo nagiye mpa ubufasha bakubiswe cyane bafite ibikomere, abananiwe kurya kubera guhingishwa igihe kirekire, harimo n’uwo bangije imbavu twazanye ariko hari n’uwo babaze barimo uwitwa Mushimiyimana yabazwe inshuro 2, mbese abagiye bamererwa nabi bajyanywe kurwarira mu bitaro bya Gisolo ngo babashe kwitabwaho.

Ibyo ndabibwira cyane cyane abana bato birukankirayo, Abapolisi babakozemo bizinesi, kuko umwana arambuka umupaka yerekeza Uganda abapolisi bakamwaka icyangombwa ke barangiza bakamushyikiriza inkiko. Iyo bafashe umuntu bamusaba hagati y’amashilingi ya Uganda 500.000 na miriyoni, iyo uyabonye barakureka ukagenda, bitabaye ibyo aho bakwerekeje muri gereza bakubyaza umusaruro bakagufata nabi cyane.”

Nk’Umunyarwanda wari umaze imyaka myinshi muri Uganda mbere y’uko afata umwanzuro wo kujya gukomerezayo amashuri ye y’ubukanishi ahitwa Nkole aho yari amaze amezi 3 yiga, avuga ko mbere yari asanzwe akora ibijyanye no kogosha kuko yari yarashinze salo yogosha.

Muhire agaruwe mu Rwanda yirukanwe muri Uganda amaze kurangiza igifungo yakatiwe ku itariki ya 31 Kanama 2018, aho ubuyobozi bwa gereza bwamwohereje kuri Polisi ya Uganda, nayo ikamushyikiriza Urwego rushinzwe abinjira n’abasohoka rwa Uganda ari rwo rwamushyikirije urw’u Rwanda.

Muhire J. Baptiste agaragaza uko Abanyarwanda bafatwa nabi muri Uganda, bakoreshwa agahato, bagakubitwa amanywa n’ijoro (Foto Sezibera A)

 

TANGA IGITEKEREZO

One Comment on “Ubuhamya: Abanyarwanda bafatirwa muri Uganda bahingishwa umunsi wose bakarya rimwe ku munsi”

  1. Mureke kujya mubeshya abantu umenyeranye nabo se mubiki wabafashaga umutekano??? nyuma se bakuziza iki kdi muziranye??

Leave a Reply

Your email address will not be published. Required fields are marked *