21°C , Partly cloudy | Kigali-Rwanda
Umunyamabanga Nshingwabikorwa w'Inama y'Igihugu y'Itangazamakuru, Peacemaker Mbungiramihigo

Ubufatanye bw’itangazamakuru ry’Afurika bwahindura isura yayo

Yanditswe na Kayitare Jean Paul

Ku ya 07-11-2018 saa 12:09:34

Uyu munsi, u Rwanda rurizihiza umunsi Nyafurika w’Itangazamakuru, wizihizwa buri tariki 7 Ugushyingo.

Bamwe mu bafite aho bahurira n’itangazamakuru ndetse n’abarikoramo, bavuga ko habayeho ubufatanye bw’ibitangazamakuru, byatuma itangazamakuru ry’Afurika rigira uruhare mu iterambere ry’uyu mugabane, no guhindura isura yayo.

Kayigamba Jean Baptiste, inararibonye mu itangazamakuru, wanakoreye ibinyamakuru mpuzamahanga binyuranye, avuga ko hari ibibazo mu itangazamakuru muri Afurika, bikaba bituma ridatera imbere, ngo rinahindure Afurika.

Yagize ati “Nko mu ikoranabuhanga ntabwo Afurika ifite uburyo buhagije bwo gukwirakwiza amakuru yayo ku Isi ugereranyije n’ibihugu byateye imbere, n’ubushobozi bw’abanyamakuru b’umwuga bumva ko umurimo wabo n’amakuru batangaza, ari ukumenyesha.”

Agaragaza kandi ko igitekerezo cyo gushinga igitangazamakuru nka PANA cyandika ku nkuru zo muri Afurika cyashinzwe mu 1983 cyari kiza, akavuga ko gikeneye kongera gusuzumwa hakarebwa impamvu iyi myaka yose PANA itageze ku mugambi wayo.

Kuri we, Kayigamba avuga ko hari ibihugu by’Afurika bitarumva ko hakwiye gushyirwaho igitangazamakuru cy’Afurika gishobora guhindura isura yayo.

Ati “Ikibazo ni uko bimwe mu bihugu by’Afurika bitumva impamvu hagomba kubaho itangazamakuru ry’Afurika ritanga indi sura y’umugabane wacu itari iy’intambara, inzara, ruswa n’ibindi.”

Umunyamabanga Nshingwabikorwa w’Inama Nkuru y’Itangazamakuru mu Rwanda, Peacemaker Mbungiramihigo, avuga ko uruhare rw’itangazamakuru mu iterambere ry’Afurika ari ugukorera hamwe kugira ngo abanyamakuru barusheho kugaragaza neza Umugabane w’Afurika, agashimangira ko bisaba gukorera hamwe, gufatanya no gusangira amakuru.

Ati “Ibi bizarushaho gufasha abantu kudatatanya imbaraga bafite no guhuza ubushobozi. Gukorera hamwe ni byo bizatuma abanyamakuru bagaragaza isura nziza y’Umugabane w’Afurika.”

Mbungiramihigo atangaza ko itangazamakuru mu Rwanda rigeze ahashimishije ugereranyije n’aho rivuye, kuko ngo rimaze gutera imbere ku kigero cya 72%, mu gihe mu myaka 2 ishize ryari kuri 69,6%.

Ku bijyanye n’ubwisanzure bw’itangazamakuru, Mbungiramihigo avuga ko mu Rwanda itangazamakuru rikorera mu bwisanzure. Raporo y’ubushakashatsi ku itangazamakuru mu Rwanda (Rwanda Media Barometer) yakozwe n’urwego rw’Igihugu rw’Imiyoborere RGB, mu 2016, igaragaza ko ubwisanzure bw’itangazamakuru bugeze kuri 81%.

Kagame Faustin, inararibonye mu itangazamakuru akaba n’umusesenguzi waryo, avuga ko itangazamakuru ry’imigabane igize Isi ridashobora guhuza ibibazo n’imiterere.

Akimana Latifah, umunyamakuru w’Ikigo k’Igihugu k’Itangazamakuru RBA, avuga ko kugira ngo iterambere ry’Afurika rigerweho itangazamakuru ribigizemo uruhare, hakwiye kubanza gushakwa uko hakubakwa itangazamakuru rifite ingufu kandi rifite n’ibikoresho ku buryo rishobora kugera ku muturage.

Akomeza avuga ko abanyamakuru bakwiye kudahora batangaza ibitagenda, ahubwo ko bagombye no gutangaza ibyiza by’Afurika, kuko bifasha sosiyete.

Ati “Nta bwo ari byiza guhora uvuga ibintu bitagenda gusa ahubwo hatangazwe n’ibyiza kuko bifasha sosiyete bikagaragaza aho abantu bavuye. Nk’u Rwanda rwavuye mu bibazo bya Jenoside yakorewe Abatutsi, none rufite aho rugeze, rukoresha indege zitagira abapilote, rwaciye amasashi, izo ni inkuru nziza zikwiye gutangazwa zikagaragaza neza u Rwanda ndetse n’Umugabane w’Afurika.”

Sekanyange Jean Léonard, umuyobozi wa Sosiyete Sivili mu Rwanda, yavuze ko itangazamakuru kugira ngo rigire aho rigeza Afurika, rikwiye kuba iry’umwuga. yagize ati “Itangazamakuru rigomba gukora kinyamwuga, abantu bakajya mu itangazamakuru kuko babona ko ari akazi bagiyemo atari ukuvuga ko bagiye gushakiramo amaramuko.”

Avuga ko kugira ngo itangazamakuru mu Rwanda no muri Afurika rishobore gutera imbere, ari uko ryaba rifite abanyamakuru bafite ubumenyi, barabyigiye cyangwa barize ibindi nyuma bagakurikirana amahugurwa ashobora gutuma bagira ubumenyi ku itangazamakuru ku buryo barikora kinyamwuga.

Uyu munsi Nyafurika w’Itangazamakuru wizihizwa none, nyuma y’ibiganiro bitandukanye harabaho umuhango wo guhemba abanyamakuru bahize abandi mu kwandika inkuru zinyuranye mu byiciro by’ubuzima bw’Abanyarwanda.

TANGA IGITEKEREZO

Leave a Reply

Your email address will not be published. Required fields are marked *