18°C , Mostly cloudy | Kigali-Rwanda

U Rwanda si Igihugu aho abicwa na COVID-19 batabarurwa

Yanditswe na NTAWITONDA JEAN CLAUDE

Ku ya 08-01-2021 saa 09:29:58

Muri iki cyumweru imwe mu nkuru zaciye ibintu ku Isi n’icukumbuye yakozwe na The New York Times ishimangira uburyo muri Afurika abantu batagira ingano bakomeje kwicwa na COVID-19 nyamara ntibatangazwe mu mibare abazahajwe n’icyo cyorezo.

Ubucukumbuzi bwakozwe n’icyo kinyamakuru bugaragaza ko imibare y’abatangazwa ko banduye icyo cyorezo n’iy’abacyanduye mu by’ukuri ntaho bihuriye kuko akenshi hari abarwara bikarangira batamenyekanye, ari na ko barinda bicwa n’icyo cyorezo bataragaragara ko ari cyo bazize ngo batangazwe.

Imibare imaze gutangazwa y’abishwe na COVID-19 mu bihugu 54 by’Afurika byose iri hasi y’iyatangajwe n’igihugu cy’u Butaliyani cyonyine. Abamaze gupfa muri Afurika bararenga ibihumbi 68 mu gihe mu Butaliyani basaga ibihumbi 77.

Bisobanuye ko muri Afurika badapfa nubwo icyorezo cyahageze? Imibare igaragazwa mu bihugu bitandukanye by’Afurika iracyari hasi ariko imiterere y’uko icyorezo cya COVID-19, ishobora kuvugwa n’abagurisha amasanduku yo gushyinguramo, abacukura imva bakeka ko icyorezo cya COVID ari cyo ntandaro y’ubwiyongere bw’icyashara babonye mu mwaka ushize.

Iyo nkuru igaruka ku musore witwa Christopher Johnson wo muri Nigeria wazize urupfu rw’amayobera nyuma yo guhura n’abanyamahanga benshi.  Ni umusore wari uzwiho kuba umubyinnyi wabigize umwuga washimishaga abantu ku muhanda bakamuha amafaranga, akaba yarakundaga no gutebya atuka abanyamahanga rimwe na rimwe bikamuviramo guhura n’ingorane.

Mu gihe Johnson yapfaga muri Nzeri 2020, bivugwa ko yazize kubura umwuka mwiza (oxygen) mu maraso nyuma y’ihungabana ry’utunyangingo tugize abasirikare b’umubiri bagombaga guhangana n’igikomere yari afite ku kuguru nk’uko bivugwa n’inshuti ze ndetse n’abandi bari bamuzi mu Mujyi wa Oluti.

Nubwo bose bemezaga ko yapfuye ariko The New York Times itangaza ko nta na hamwe hagaragara urupfu rwe mu nzego za Leta zishinzwe kubarura imfu zagaragaye mu Gihugu.

Mu mwaka wa 2020, igihe COVID-19 yari yugarije Isi, byagiye bigaragara akenshi ko umubare munini w’ibihugu by’Afurika byabanje gusigara inyuma mu gutangaza umubare w’abantu bandura n’abicwa na COVID-19.

Byahumiraga ku mirari hamwe na hamwe wasangaga badafite n’uburyo bwubatse neza kandi buhamye  bwo kwandika imfu zagaragaye mu Gihugu no kubarura abavuka mu bitabo by’irangamimerere.

Amakuru  yakusanyijwe mu bihugu by’Afurika bitandukanye agaragaza ko ibyinshi usanga nta makuru baba bafite ku bantu bapfa buri munsi n’icyo bazize, ari na ho hava ingorane z’uko rimwe na rimwe Leta zishobora kutabona amakuru ahagije ku bibera mu baturage, ugasanga na politiki zubakwa zidashingira ku makuru afatika ari mu baturage.

Bivugwa ko mu bihugu bimwe  byo ku mugabane hari amakuru menshi abacika nubwo batangaza imibare ku rwego rw’Igihugu isa n’iri hasi.

U Rwanda ni kimwe mu bihugu by’Afurika bifite imiyoborere yubatswe ku buryo amakuru y’Inzego zose ahera kuri buri muryango akagera ku rwego rw’Igihugu, ku buryo bigoye ko hagira amakuru ashobora gucika Inzego z’Igihugu  mu igenamigambi no mu guhangana n’ingorane zirimo n’icyorezo cya COVID-19.

Uhereye ku buzima, umutekano, imibereho y’abaturage ukageza ku bukungu, usanga Inzego zubatswe ku buryo amakuru yose akusanywa ava ku muturage.

Ingamba u Rwanda rwafashe mu guhangana na COVID-19 zatumye ruba kimwe mu bihugu by’intangarugero ku Isi

Mu rwego rw’ubuzima, amakuru y’umuturage urwaye amenywa n’Umujyanama w’Ubuzima, ay’imiyoborere akava ku Muyobozi w’Isibo. Ku bijyanye n’imikorere y’Inzego n’uko handikwa hakanandukuzwa abitabye Imana, usanga hari Inzego zishinzwe irangamimerere ku rwego rw’Akagari na zo zihabwa amakuru aturutse hasi ku Isibo.

Umuntu wese witabye Imana aramenyekana ndetse n’icyamuhitanye kiba kizwi bigashyirwa mu bitabo by’irangamimerere nk’uko bikorwa ku bana bavuka umunsi ku wundi. Imfu z’abaguye kwa muganga zihita zandikwa ndetse n’abaguye mu rugo bikaba uko kuko Inzego z’ibanze ziba zifite inshingano zo kumenya abavuka n’ababura ubuzima.

Ku bijyanye na COVID-19 na bwo usanga uwanduye amenyekana byoroshye bitewe n’inzira binyuramo. Leta ubwayo ifata ibipimo by’abaturage yibanda ku handuye abaturage baba bafite ibyago byo kwandura, hanyuma bikongerwa ku by’abantu bisuzumisha ku bushake buri munsi.

Uwapfuye wese haba hazwi icyo yazize cyane ko ufite ibimenyetso by’ibicurane n’ubwo yaba arwaye indi ndwara yose adashobora kuvurwa atabanje gusuzumwa icyo cyorezo.  Hashyizweho ikoranabuhanga ryoroshya ihanahana ry’amakuru mu nzego zose, ku buryo n’uwarwaye Malaria aboneka mu mibare y’abayirwaye ku rwego rw’Igihugu mu gihe gito cyane.

Abapfa muri Afurika ntibangana n’abo ku yindi migabane

Nubwo hari abavuga ko imibare y’abapfa bashobora kuba bayingayinga abo ku yindi migabane, abahanga mu kurwanya ibyorezo bavuga ko Abanyafurika benshi bagiye bubaka ubudahangarwa bitewe n’uburyo bagiye bahura n’ubundi bwoko bwa visuri za corona (coronaviruses) bagahangana na zo bakazikira akenshi batagiye no kuzivuza kwa muganga.

Birashoboka ko hari ababa babura ubuzima mu bihugu bimwe na bimwe by’Afurika ntibamenyekane nk’uko bigenda mu bindi bihugu, ariko na bo baba ari bake ugereranyije n’abatangazwa buri munsi ku Mugabane w’u Burayi, Aziya n’Amerika.

Stéphane Helleringer, impuguke mu gukurikirana imiterere y’abantu, yavuze ko ibihugu bike muri Afurika ari byo bishobora kugaragaza amakuru yizewe y’abantu bapfa ku munsi n’icyo baba bazize.

Aha uyu muturage ni umwe mu bashyinguwe muri Nigeria azize COVID-19

Ni muri urwo rwego mu bindi bihugu usanga muri ibi bihe bya COVID-19, ubucuruzi bw’amasanduku bwarabonye icyashara aho n’ababukora bavuga ko abakoresha amasanduku biyongereye ugereranyije n’uko byari byifashe mbere y’icyorezo.

Hari abashakashatsi batangiye gukora ubushakashatsi bwihariye bifashishije uburyo bw’ikoranabuhanga, babara imva nshya bifashishije za satellite, babaza abacukura izo mva.

Amakuru bagiye babona ashimangira ko abantu bapfa biyongereye cyane, ndetse abenshi ugasanga bishwe no kubura umwuka. Uko byamera kose ntiyigeze izahaza indi migabane nk’uko yazahaje Afurika, nubwo hari abakeka ko ibihugu by’Afurika bimwe na bimwe byaba bitarabashije kubara neza abapfa.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.